လၢကဘီယူၤအပူၤ, ပှၤလဲၤက့ၤတၢ်အကျဲန့ၣ် ပှၤဒိးကဘီယူၤလၢ အနီၢ်ထီတဂၤ, ဖျါလၢ ဂဲၤဆၢထၢၣ်ထဲးယူာ်ထီၣ်အသးန့ၣ်လီၤ. ဖဲန့ၣ်, ယပာ်သူၣ်ပာ်သး လံာ်အခိၣ်တီလၢ “လီၤဂာ်ဒီးကစၢ်ယ့ၣ်ရှူး” အိၣ်ဖျါဝဲဖျိဖျိဖျါဖျါလၢအလံာ်ခိၣ်ကုအလိၤန့ၣ်လီၤ. စှၤမံးနံးလဲၤပူၤကွံာ်ဝံၤအလီၢ်ခံ, ယထံၣ်ဝဲဒၣ် ပိာ်ခွါတဂၤဃီအံၤ ဒ်သိးကဟံးန့ၢ်က့ၤ အထၢၣ်လၢ လ့ၣ်ဆီၣ်ဖိအပူၤအဂီၢ်, ဆီၣ်ဖျိးကွံာ် ပှၤဂုၤပှၤဂၤတဖၣ်န့ၣ်လီၤ. အတၢ်မၤ မ့ၢ်အလီၤဂာ်ဒီးကစၢ်ယ့ၣ်ရှူးန့ၣ်ဧၣ်. ပိာ်ခွါတဂၤအံၤ မ့ၢ်ဒီပုၢ်ဝဲၢ်တဂၤလၢ အသ့ၣ်ညါကစၢ်ခရံာ်နီၢ်နီၢ်ဧါန့ၣ် ယတသ့ၣ်ညါလၢၤဘၣ်. ဘၣ်ဆၣ်, ခီဖျိလၢယထံၣ်ဘၣ် အတၢ်အဲၣ်လီၤအသးန့ၣ် မ့ၢ်လၢတကဲထီၣ် တၢ်ဟ့ၣ်ဒိ ကစၢ်ယ့ၣ်ရှူးအဃိ, ယသးဟးဂီၤဝဲဒၣ်န့ၣ်လီၤ.

ဖဲယယီၢ်လီၤကဟၣ်ဃီသွါန့ၣ်ဒီး, ယထံၣ်ကဒီးပိာ်ခွါ, ဒီးအလံာ်အခိၣ်ကုန့ၣ်အိၣ်ဖျါဒံးဝဲအဖၢမုၢ်န့ၣ်လီၤ. လံာ်မဲာ်ဖျၢၣ်တဖၣ် ဟဲနုာ်လီၤဘၣ်ဒိဘၣ်ထံးယသူၣ်ယသးန့ၣ်လီၤ. ယစံးလီၤယသးလၢ ” အလံစၣ် (Elisa) ဧၢ, လီၤဂာ်ဒီး ကစၢ်ယ့ၣ်ရှူးန့ၣ်တက့ၢ်. စံၣ်ညီၣ်တၢ်တဂ့ၤ” န့ၣ်လီၤ. ယဆိကမိၣ်ထီၣ်က့ၤယဲလၢ, ယတၢ်အိၣ်မူန့ၣ် မ့ၢ်အဒုးနဲၣ်ပာ်ဖျါထီၣ် ကစၢ်ယ့ၣ်ရှူးအဂ့ၢ်တမံၤမံၤစ့ၢ်ကီးဧၣ်န့ၣ်လီၤ.

တၢ်လီၤဂာ်ထီၣ်ဒီး ကစၢ်ယ့ၣ်ရှူးန့ၣ် မ့ၢ်တၢ်ဆီတလဲကျိၤကျဲတဆီဘၣ်တဆီ, က့ၢ်ဂီၤ အန့ဆၢၣ် အတၢ်လဲလိာ် _ ကစၢ်ယွၤ အတၢ်ဒိၣ်ထီၣ်လၢ ပပူၤ ဖဲပဟ့ၣ်လီၤသးဆူ ယွၤအကျဲလီၤ. စီၤပီလူး ကွဲးဝဲလၢ ပှၤစူၢ်နာ်ယ့ၣ်ရှူးတဖၣ် “ဘၣ်တၢ်လဲလိာ်ပသးဆူ တၢ်အက့ၢ်အဂီၤတမံၤဃီအံၤ, လၢတၢ်လၤကပီၤဆူ တၢ်လၤကပီၤ, ဒ်လၢ ကစၢ်အသးအသိးန့ၣ်လီၤ” ( ၂ကရံၣ် ၃:၁၈). စီၤယိၤဟၣ်ပှဲၤဒီး တၢ်ကမၢကမၣ်လၢ တၢ်အံၤလၢပဂီၢ် ပကနၢ်ပၢၢ်ကီဝဲ ဒ်လဲၣ်အဂ့ၢ် – တၢ်တုၤအိၣ်စှၤဒိၣ်မး “ခဲအံၤ ပမ့ၢ်ယွၤအဖိဒီး ပကကဲထီၣ် ဒ်လဲၣ်ဒ်လဲၣ်န့ၣ် တအိၣ်ဖျါဒံးဘၣ်. ဘၣ်ဆၣ် ဒီး ပသ့ၣ်ညါလၢ အမ့ၢ်အိၣ်ဖျါထီၣ် ဒီး, ပကလီၤဂာ်ဒီးအီၤလီၤ. အဂ့ၢ်ဒ်အံၤ, ပကထံၣ်အီၤ ဒ်အအိၣ်ဝဲအသိးန့ၣ်လီၤ” (၁ ယိၤ ၃:၂-၃).

ဖဲပဟးထီၣ်ဆူတၢ်ချၢလၢကဟၣ်ဃီသွါအကတီၢ်, ယကွၢ်ကဒီးလံာ်ဖိတဘ့ၣ်အံၤ တစိၤဖိန့ၣ်လီၤ. လီၤဂာ်ဒီးကစၢ်ယ့ၣ်ရှူး- လံာ်ဖျၢၣ်တဖၣ်အံၤ ဟ့ၣ်ထီၣ်အခီပညီအသီလၢ ယဂီၢ်, ဒီးနဲၣ်ဆှၢက့ၤယၤလၢ ယကကွၢ်ထံဆိကမိၣ်လီၤက့ၤ ယသူၣ်ယသး, ဒီးယတၢ်အိၣ်မူန့ၣ်လီၤ.