ပိာ်မုၣ်သးစၢ် တဆံဃုနံၣ်ဖိတဂၤ တၢ်စံၣ်ညီၣ်လီၤဘၣ်အီၤလၢ ကဘၣ်လီၤဃိာ် အနံၣ် ၅၀ န့ၣ် ဆ့ၣ်နီၤဝဲဒၣ်ထဲတဂၤဧိၤလၢ တၢ်ဘံၣ်တၢ်ဘၢအထီကတၢၢ်ဃိာ်အဒၢးပူၤန့ၣ်လီၤ. မ့ၢ်လၢအသးအနံၣ်အလါအဃိ, ဘၣ်အိၣ်လီၤဖးဝဲလၢ ပှၤလီၤဃိာ်ဖိအဂၤတဖၣ်န့ၣ်လီၤ. တနံၣ်ဃၣ်ဃၣ်အတီၢ်ပူၤန့ၣ်, ပှၤဟဲအိၣ်သကိးအီၤလၢတၢ်ချၢတဖၣ် တအိၣ်ဝဲနီၤတဂၤဘၣ်. ဘၣ်တဘျီ, ဖဲတၢ်မၤတၢ်သးခုကစီၣ်, ဒီးတၢ်ဒိးစုၣ်ဒိးဘျၢအတၢ်ရဲၣ်တၢ်ကျဲၤလၢ ဃိာ်ပူၤအကတီၢ်, ဃိာ်အပှၤခိးကွၢ်တၢ်တဖၣ် ပျဲတၢ်အိၣ်ဖှိၣ်ခိၣ်နၢ်တဂၤ လဲၤနုာ်ဝဲဆူ ပိာ်မုၣ်သးစၢ် လၢအဘၣ်တၢ်ဒုးဃာ်အီၤအဒၢးန့ၣ်လီၤ. ပိာ်မုၣ်သးစၢ် နၢ်ဟူဘၣ် တၢ်သးခုကစီၣ်, ဟ့ၣ်လီၤအးလီၤအသးဆူ ကစၢ်ယ့ၣ်ရှူးအအိၣ်, ဒီးဃ့ဒိးစုၣ်ဒိးဘျၢအသးန့ၣ်လီၤ. အခီၣ်ထံးန့ၣ်, ပှၤဘၣ်မူဘၣ်ဒါတဖၣ် ဆိကမိၣ်ဝဲလၢ ကစူးကါ ထံလၢပလီတဖၣ်အပူၤဘၣ်ဆၣ်, လၢခံန့ၣ် ဃိာ်အပှၤမၤတၢ်ဖိတဖၣ် ကးတံာ်တၢ်သူၣ်ထီၣ်ဒီဖျၢၣ်, ဒီးဆှၢဝဲဒၣ် ပိာ်မုၣ်သးစၢ်ဆူ တၢ်ဒိးဘျၢထံအကမါ အိၣ်တၢ်အလီၢ်န့ၣ်လီၤ. ဖဲယွၤအပှၤဂီၢ်မုၢ်တဖၣ် ဃ့ထုကဖၣ်တၢ်အကတီၢ်, ပိာ်မုာ်သးစၢ်န့ၣ် ဟီၣ်ဝဲဒၣ်န့ၣ်လီၤ.
ကစၢ်ယွၤ ကစံၣ်ညီၣ် ပှၤလၢအစူးကွံာ်ညိကွံာ်အီၤတဖၣ်န့ၣ် အၢၣ်လီၤတ့ၢ်ဝဲဘၣ်ဆၣ်, ကစၢ်ယွၤ ယူာ်ဃီၤမၤလဲၣ်ထီၣ် အတၢ်သးကညီၤဆူ ပှၤပီၢ်ယၢ်လီၤက့ၤအသးတဖၣ်အဂီၢ်န့ၣ်လီၤ. ယွၤ မၤဂ့ၤမၤဘျါ, ဒီးဒီသဒၢဒီဒၣ် ပှၤသ့ၣ်တဖၣ်လၢအနာ်သန့ၤအမံၤ (စဖါ ၃:၁၀-၁၂) န့ၣ်လီၤ. မ့ၢ်လၢ ကစၢ်ယွၤအနီၢ်ကစၢ်ဒၣ်ဝဲ “ပာ်စီကွံာ်” တၢ်စံၣ်ညီၣ်လၢပကြၢးဒိးတဖၣ် (:၁၅) အဃိ, တၢ်ပီၢ်ယၢ်လီၤသးန့ၣ် နဲၣ်ဆှၢက့ၤဝဲဆူ တၢ်အုၣ်က့ၤခီၣ်က့ၤန့ၣ်လီၤ. လၢဝံစဖါနယၤ အတၢ်ကတိၤဘၣ်ဃးဒီးကစၢ်ယွၤအဂ့ၢ်, လၢအစံးဝဲဒၣ် “ကသူၣ်ဖှံသးညီလၢနဖီခိၣ်အိၣ်ဒီး အသူၣ်ခုသးခုလီၤ. ကအိၣ်ဘှံးလၢ အတၢ်အဲၣ်အပူၤ, ဒီးကသူၣ်ပိၢ်သးပိၢ်လၢ နဖီခိၣ်အိၣ်ဒီးတၢ်သးခုအသီၣ်” (:၁၇), ဒီး တၢ်မုၢ်လၢ်န့ၣ် ဘၣ်တၢ်ယၢၤထီၣ်က့ၤအီၤတလီၢ်လီၢ်န့ၣ်လီၤ.
လၢတၢ်န့ၣ်အဃိ, လီၤဆီဒၣ်တၢ်, ပှၤထံၣ်ဆိကမိၣ်လီၤအသးလၢဘၣ်အိၣ်ဆိးယံၤဒိၣ်မးလၢ ယွၤတဖၣ်အဂီၢ်, လၢတၢ်သူၣ်အိၣ်သးအိၣ်, ဒီးလၢတၢ်နာ်န့ၢ်လီၤသးနီၢ်နီၢ်အပူၤန့ၣ် ပနီၤဟ့ၣ်ခီလီၤ တၢ်သးခုကစီၣ်သ့ဝဲဒၣ်န့ၣ်လီၤ. ပကအိၣ်ဆိးဒၣ်ဝဲ ဖဲတၢ်လီၢ်တတီၤတီၤမ့ၢ်ဂ့ၤ, ပမၤဒၣ်ဝဲတၢ်တမံၤမံၤမ့ၢ်ဂ့ၤ, (မ့) ပကအိၣ်သယုၢ်သညိထဲတဂၤဧိၤ, တၢ်သးပ့ၤနီၣ်ပှၤဂၤ, (မ့) ပသးကလၢၢ်ဘၣ်လၢ ပတဂ့ၤတကြၢးတဘၣ်မ့ၢ်ဂ့ၤ, ကစၢ်ယွၤ အဲၣ်ပှၤ, ဒီးလူၤပိာ်ထွဲကွၢ်ဃုပှၤန့ၣ်လီၤ. ကယဲၢ်ပှၤကိးဂၤဒဲးန့ၣ် အိၣ်ဝဲဆိးဝဲလၢ ကစၢ်ယွၤအစုတုၤအိၣ်ဃီၤတၢ်အလီၢ်အကျဲန့ၣ်လီၤ.