ဘလ့း(စ) ပး(စ)ကဲၣ် (Blasie Pascal) အတၢ်ကတိၤ “တၢ်အပူၤယိာ် လၢပှၤထိၣ်ဒွးအီၤ တန့ၢ်တသ့န့ၣ် အိၣ်ဝဲလၢပသးကံၢ်ပူၤ” န့ၣ် ထဲဒၣ်သ့တၢ်လၢာ် ကစၢ်ယွၤ တဂၤဧိၤ မၤပှဲၤသ့ဝဲဒၣ်န့ၣ်လီၤ. အီကၢးစတံ(န) (Augustine) ထုကဖၣ်ဝဲလၢ “နတ့လီၤပှၤဒၣ်နဲ လၢနဂီၢ်, အိကစၢ်ဧၢ,” “ဒီးတချုးပသးအံၤ အိၣ်ဘှံးလၢနပူၤန့ၣ် ပသးအိၣ်ဂၢၢ်အိၣ်ဘှံးတန့ၢ်တသ့” ဘၣ်န့ၣ်လီၤ. စီၤဒၤဝံး ပာ်ဖျါဝဲလၢ, ပလီၤဂာ်ဒီးပှၤအသးသူထံ လၢမဲးမုၢ်ခိၣ်တဖၣ်အသိး, ပတၢ်မ့ၢ်တၢ်ခဲလၢာ်န့ၣ် “ဆၢမိၣ်န့ၢ်သးလီ” ဝဲဒၣ်ကစၢ်ယွၤ (စံး ၆၃:၁) န့ၣ်လီၤ.
ဘၣ်ဆၣ်, လၢတၢ်လီၤကမၢကမၣ်အပူၤန့ၣ် တမ့ၢ်ထဲပှၤကညီသ့ၣ်တဖၣ် ဆၢမိၣ်န့ၢ်သးလီတၢ်ဘၣ်. ကစၢ်ယွၤ ဆၢမိၣ်န့ၢ်သးလီတၢ်စ့ၢ်ကီးန့ၣ်လီၤ. ဖဲတၢ်ဘၣ်တ့ခဲလၢာ်အကစၢ် တဂၤ, ကဘၣ်မၤလၢပှဲၤဝဲလၢ အနီၢ်ကစၢ်ဒၣ်ဝဲအဂီၢ်န့ၣ် တၢ်တအိၣ်နီတမံၤဘၣ်ဆၣ်. လံာ်စီဆှံ ပာ်ဖျါဝဲလၢ, ဖဲပဟးဖျိးကျဲအကတီၢ် ဒ်သိးပကဃၣ်က့ၤပသးဆူ ယွၤအအိၣ်အဂီၢ်, ကစၢ်ယွၤ “အသးဆၢမိၣ်န့ၢ်ပှၤ” (ယၤ ၄:၄-၅), ဒီးကစၢ်ယွၤ စံးဝဲဒၣ်တလီၢ်လီၢ်လၢအဝဲအဲၣ်ဒိးပှၤဂီၢ်မုၢ် ဒ်သိးကစံးဝဲလၢအတၢ် ( ၂ မိၤ ၆:၇, ဧ့ၤဘြံၤ ၈:၁၀) န့ၣ်လီၤ.
နံၣ်လၢအကထိတဖၣ်အပူၤန့ၣ် တၢ်သးဆၢမိၣ်န့ၢ်ဒ်သိးအံၤ ထိၣ်ဟူးထိၣ်ဂဲၤ တၢ်ဂုာ်ကျဲးစၢးမၤ ကစၢ်ယွၤ မံးရှၢၣ်အတၢ်မၤတဖၣ်, ဒ်သိးကမၤန့ၢ်က့ၤ အပှၤဂီၢ်မုၢ်လၢအဟးဖျိးကျဲတဖၣ်အဂီၢ်, ယွၤ ဆှၢလီၤဝဲ ဝံသ့ၣ်တဖၣ်, ဒီးအကတၢၢ်န့ၣ်, ဆှၢလီၤအဖိခွါ, ဒ်သိးကဃုထံၣ်န့ၢ်က့ၤ အသိလၢအလီၤမၢ်တဖၣ် (ရှါ ၃၀:၁၈, လူၤ ၁၉:၁၀) န့ၣ်လီၤ. တၢ်ကစီၣ်လၢအဂ့ၤတမံၤန့ၣ် အကတီၢ်လၢခံကတၢၢ်န့ၣ် ကစၢ်ယွၤ အတၢ်ဆၢမိၣ်န့ၢ်တမံၤအံၤ ကလၢထီၣ်ပှဲၤထီၣ်ဝဲဒၣ်န့ၣ်လီၤ. “အဝဲသ့ၣ်ကမ့ၢ်အပှၤဂီၢ်မုၢ်, ဒီးယွၤအကစၢ်ဒၣ်ဝဲ ကအိၣ်ဒီးအီၤ, ဒီးကကဲထီၣ်အကစၢ်,” ဒီးကစၢ်ယွၤဒီးပှၤကညီတဖၣ် ကအိၣ်ဝဲဆိးဝဲတပူၤဃီ (လီၣ်ဖျါ ၂၁:၂-၃) န့ၣ်လီၤ.
ပှၤကညီတဖၣ် အသးဆၢမိၣ်န့ၢ်ဘၣ် ကစၢ်ယွၤ, ဒီးတၢ်လၢကမၤမံသူၣ်မံသး ပှၤကညီတဖၣ်အသးအဂီၢ် တၢ်တအိၣ်ဝဲဒၣ် နီတမံၤဘၣ်န့ၣ်လီၤ. ကစၢ်ယွၤ အသးဆၢမိၣ်န့ၢ်ဘၣ် ပှၤကညီတဖၣ်, ဒီးတၢ်ကမၤပှဲၤတၢ်အံၤအဂီၢ်, တၢ်တအိၣ်နီတမံၤဘၣ်န့ၣ်လီၤ. လၢတၢ်န့ၣ်အဃိ, ဖဲပှၤတၢ်ဒဲးဘးဖိတဂၤ မ့ၢ်ပီၢ်ယၢ်လီၤက့ၤအသးန့ၣ်ဒီး, တၢ်သးခုအိၣ်ဝဲလၢ မူခိၣ်န့ၣ် တၢ်လီၤကမၢကမၣ်အလီၢ်တအိၣ်ဘၣ် (လူၤ ၁၅:၇) န့ၣ်လီၤ. ဖဲပဃ့ၢ်ဃီၤဆူ ယွၤအစု, လၢအအိးထီၣ်သးအပူၤန့ၣ်ဒီး, ပှၤခံကပၤလိာ် (ကစၢ်ယွၤဒီးပှၤကညီတဖၣ်) အသးဆၢမိၣ်န့ၢ်တၢ်န့ၣ် လၢထီၣ်ပှဲၤထီၣ်ဝဲဒၣ်န့ၣ်လီၤ.
