လၢတနံၤအဂီၢ်, တၢ်လၢအကဘၣ်မၤဝဲတဖၣ်န့ၣ် စၤရါ (Sara) ကွဲးလီၤဆိဝဲဒၣ်လၢဂီၤန့ၣ်လီၤ. ဘၣ်ဆၣ်, ပှၤသးစၢ် အဟံၣ်ဒူၣ်လၢအဖှီၣ်တဒူၣ် ဃ့အီၤတၢ်မၤစၢၤတမံၤန့ၣ် နုာ်လီၤမၤတံာ်တာ်အီၤန့ၣ်လီၤ. တၢ်ကပှ့ၤ ဂာ်သဝံ အဂီၢ်, တၢ်အိၣ်ဖှိၣ် ကတဲာ်ကတီၤန့ၢ် ကဲး(စ) လံာ်က့ဖိ (Gas-Card) န့ၣ် အဝဲသ့ၣ် လိၣ်ဘၣ်ဝဲသပှၢ်တၢၢ်န့ၣ်လီၤ. စၤရါ တဂၤအတၢ်ဖံးတၢ်မၤအါဘၣ်ဆၣ်, ကစၢ်ယွၤ အဲၣ်ဒိးလၢ အဝဲကဘၣ်မၤဝဲန့ၣ် သ့ၣ်ညါဝဲအဃိ, စၤရါ တူၢ်လိာ်ဝဲလၢ ကလဲၤဆှၢဝဲဆူ ဟံၣ်ဒွဲ (Hotel), တၢ်လီၢ်ဖဲတၢ်အိၣ်ဖှိၣ် ကတဲာ်ကတီၤဒုးအိၣ်အဝဲသ့ၣ် စှၤနွံန့ၣ်လီၤ. စါရါ ဟံးန့ၢ် လံာ်က့ဖိဝံၤ, ကွၢ်ဝဲတၢ်အိၣ်ဆိးအလီၢ်အကျဲန့ၣ်ဒီး, ကဘၣ်လဲၤနီၣ် သိလ့ၣ် အတၢ်လဲၤန့ၣ် ယံၤန့ၢ်ဒံး အတယာ်ဆိပာ်ဝဲအဃိ, ကဒူးကဒ့ၣ် ကစၢ်ယွၤလၢ, ယကလဲၤဆှၢန့ၢ် လံာ်က့ဖိဆူ အဝဲသ့ၣ်အအိၣ်န့ၣ် ယသိလ့ၣ် အဂာ်သဝံကလၢာ်အါထီၣ်ဝဲဒၣ်န့ၣ်လီၤ.
လၢအသးပူၤန့ၣ် စၤရါ တူၢ်ဘၣ်ဝဲဒၣ် ဒ်သိးကစၢ်ယွၤ စံးဘၣ်အီၤလၢ ယကတဲာ်ကတီၤဟ့ၣ်တ့ၢ်နၤဝံၤလံ တမ့ၢ်ဘၣ်ဧါ. “စၤရါ စံးဆၢဝဲဒၣ်, မ့ၢ် ကစၢ်ယွၤဧၢ, နဟ့ၣ်တ့ၢ်ယၤ ဝံၤလံ, ပျၢ်လၢ်ဘၣ် ယတၢ်ပာ်သူၣ်ပာ်သးန့ၣ်တက့ၢ်.” စၤရါ လဲၤတုၤ, ဒီးထံၣ်ပှၤနီၢ်ဒီမိဝၤဝံၤ, ဟ့ၣ်လီၤဝဲလံာ်က့ဖိ, ဒီးစိာ်ဝဲဒၣ် အဝဲသ့ၣ် အဖိဖိန့ၣ်လီၤ. လၢအတၢ်ဟဲက့ၤဆူဟံၣ်အကျဲန့ၣ် စၤရါ စံးဘျုးယွၤ, လၢအဆိၣ်ဂ့ၤအီၤ ခီဖျိလၢခွဲးယာ်ယိယိဖိဘၣ်ဆၣ်, ဒိးန့ၢ်ဘၣ်ဝဲ တၢ်သူၣ်ခုသးခု ဒ်သိးအံၤအဃိန့ၣ်လီၤ.
ဖဲဝံအလံၤရှါ အတၢ်လဲၤဝဲဆူ ဝ့ၢ်ရှူန့ၢ်, လၢအံၣ်စရ့လးအကီၢ်န့ၣ်, ထံၣ်ဝဲဒၣ် ပိာ်မုၣ်တဂၤလၢအအိၣ်ဒီးတၢ်ခ့တၢ်ပှၤအသး လၢအဂီၢ်န့ၣ်လီၤ. ပိာ်မုၣ်န့ၣ် “ကညးအီၤလၢ အကအီၣ်ကိၣ်” န့ၣ်လီၤ. ဒီးဖဲဒၣ်အလဲၤတၢ်ဘၣ်ကျဲတဘျီဘျီန့ၣ် “လဲၤနုာ်လီၤအီၣ်ကိၣ် ဖဲန့ၣ်လီၤ” (၂ စီၤ ၄:၈). ဖဲ ဝံအလံၤရှါ ဟဲဝဲဆူ အဝဲသ့ၣ် အဝ့ၢ်တဘျီလၢ်လၢ်န့ၣ်, ဒ်သိး ကအိၣ်ဆိးဝဲအဂီၢ်ဒၣ်လဲာ်, ပိာ်မုၣ်ဒီးအဝၤန့ၣ် ဘှီန့ၢ်ဝဲဒၣ် ဒၢးတဖျၢၣ် (:၉-၁၀) န့ၣ်လီၤ. လၢတၢ်သူၣ်အိၣ်သးအိၣ်အပူၤန့ၣ် ကစၢ်ယွၤ ဃုထၢဆိၣ်ဂ့ၤ ပှၤနီၢ်ဒီမိဝၤခံဂၤ, ခီဖျိလၢ ဝံအလံၤရှါ စံးကတိၤတဲဆိဝဲဘၣ်ဃးဒီးကဒိးန့ၢ်ဝဲဒၣ် အဖိခွါတဂၤ (:၁၆) န့ၣ်လီၤ.
တၢ်မၤတၢ်ခ့တၢ်ပှၤအတၢ်မၤလၢ ယွၤအဝံတဂၤအဂီၢ်မ့ၢ်ဂ့ၤ, ဟံၣ်ဖိဃီဖိလၢ ဟံၣ်ဃီ တအိၣ်ဝဲတဒူၣ်အဂီၢ်မ့ၢ်ဂ့ၤ, ဖဲပအိးထီၣ်ကျဲလၢ ကစၢ်ယွၤ အတၢ်တိာ်ကျဲၤအဂီၢ်, ဒီးတူၢ်လိာ်တၢ်လၢ ကစၢ်ယွၤ အဲၣ်ဒိးဝဲလၢပကဘၣ်မၤတဖၣ်န့ၣ်ဒီး, ကစၢ်ယွၤ ကမုာ်လၤသးခုဝဲ, ဒီးကဆိၣ်ဂ့ၤ ပသူၣ်ပသးတဖၣ်လၢ တၢ်သးခုန့ၣ်လီၤ.
