လၢဖျၣ်ဂုာ်ကွံာ်တၢ်လိာ်ကွဲကရၢ (NBA) န့ၣ် တၢ်လိာ်ကွဲအဖုတဖၣ်အကျါ ဒါလး(စ) မါဘရ့း(စ) (Dallas Mavericks) အကစၢ်, ဟ့ၣ်ဝဲဒၣ် ဒီလၣ် တကလီၢ် ဆူ ခၠံၣ်ကၣ်ကိၢ် ပှၤစံးကတိၤတၢ်လိာ်ကွဲ အတၢ်ကစီၣ်တဂၤ, လၢတၢ်ဖိးမံဒီးသဲစးအပူၤန့ၣ် ဒ်သိးကဆီ တလဲအမံၤလၢ “ဒါလး(စ) မါဘရ့း(စ)” အဂီၢ်န့ၣ်လီၤ. တကးဒံးဘၣ်န့ၣ်, စံးစ့ၢ်ကီးဝဲလၢ ကဟ့ၣ်မၤဘူၣ် ဒီလၣ် တကလီၢ် ဆူ တၢ်ဟ့ၣ်သးကညီၤကရၢတဖုဖုလၢ ပှၤတဂၤအံၤ ဘၣ်သူၣ်ဘၣ်သးအဒိၣ်ကတၢၢ်န့ၣ်လီၤ. လၢတၢ်ကွၢ်ထံဆိကမိၣ်လီၤက့ၤ အသးဒၣ်ဝဲ လီၤတံၢ်လီၤဆဲးဝံၤန့ၣ်ဒီး, ကွဲၤလ့လိၤအပှၤစံးကတိၤ တၢ်လိာ်ကွဲ အတၢ်ကစီၣ်တဂၤအံၤ လၢတၢ်ပာ်လီၤသးအဂၢၢ်အကျၢၤအပူၤန့ၣ် စံးဆၢက့ၤ တၢ်မၤအကစၢ်လၢ “ယတမၤဘၣ်” န့ၣ်လီၤ. အဝဲ ပာ်ဖျါထီၣ်ဝဲဒၣ် “ပှၤမ့ၢ်စံးဘၣ်ယၤလၢ ယကမၤတၢ်တမံၤမံၤ, ထဲဒၣ်လၢ ကျိာ်စ့တမံၤဧိၤအဂီၢ်န့ၣ်, ကကဲထီၣ် တၢ်သးတံာ်တာ်လၢယဂီၢ်န့ၣ်လီၤ. ယမံၤန့ၣ် မ့ၢ်ယတၢ်မ့ၢ်တၢ် အတၢ်န့ၢ်သါခွဲးယာ်တမံၤန့ၣ်လီၤ. ယသးအိၣ်ဟံးဃာ်ဂၢၢ်ကျၢၤ ယတၢ်အိၣ်မူ သကဲာ်ပဝးလၢအတီအလိၤ, ဒီးသူးသ့ၣ်ကံၢ်စီလၢပှၤနာ်န့ၢ်အီၤသ့” န့ၣ်လီၤ.
ဒ်ကွဲၤလ့လိၤအပှၤစံးကတိၤတၢ်အမံၤ မ့ၢ်အတၢ်န့ၢ်သါခွဲးယာ်အသိး, လၢသီပှၤခရံာ်ဖိ, လၢအစူၢ်နာ်ကစၢ်ယ့ၣ်ရှူးတဖၣ် ဟံးန့ၢ်အမံၤ “ပှၤခရံာ်ဖိ” ဒ်အမ့ၢ်အဝဲသ့ၣ် အနီၢ်သး တၢ်န့ၢ်သါခွဲးယာ်န့ၣ်လီၤ. စီၤဘၤနါဘၢ်ဒီးစီၤစီလူး မၤဝဲယွၤအတၢ်မၤ, ဒီးခီဖျိလၢတၢ်စံၣ်တဲၤတဲလီၤတၢ်သးခုအကစီၣ်အဃိ, တနံၣ်အတီၢ်ပူၤန့ၣ် တၢ်အိၣ်ဖှိၣ်ဒိၣ်ထီၣ်အါထီၣ်ဝဲလၢ ဝ့ၢ်အၤတံၤအီာ်န့ၣ်လီၤ. လၢ ဝ့ၢ်အၤတံၤအီာ်န့ၣ် ပှၤခရံာ်ဖိ အဆိကတၢၢ်တဖၣ် အတၢ်အိၣ်မူန့ၣ် လီၤဂာ်ဒီးခရံာ်ဒိၣ်မးအဃိ, ပှၤလၢ အတစူၢ်နာ် ကစၢ်ယ့ၣ်ရှူးတဖၣ်န့ၣ် ကိးအဝဲသ့ၣ်လၢ “ပှၤခရံာ်ဖိ” (မၤ ၁၁:၂၆) န့ၣ်လီၤ. လၢတၢ်န့ၣ်အဃိ, “ပှၤခရံာ်ဖိတဖၣ်” မ့ၢ်ပှၤသ့ၣ်တဖၣ်လၢအဘၣ်ဃးဒီးကစၢ်ခရံာ်န့ၣ်လီၤ. အကတၢၢ်န့ၣ်, တၢ်ဒိးန့ၢ်မံၤ ပှၤခရံာ်ဖိ ကဲထီၣ် တၢ်ဂ့ၢ်အခီၣ်ထံးလၢ တၢ်ကမၤအၢမၤသီအဝဲသ့ၣ်အဂီၢ်န့ၣ်လီၤ. တၢ်ကိးန့ၢ် ပှၤခရံာ်ဖိအမံၤအဃိ, ဘၣ်တၢ်မၤနးမၤဖှီၣ်အဝဲသ့ၣ်ဘၣ်ဆၣ်, လၢအတၢ်န့ၢ်သါခွဲးယာ်အဃိ, “အသုတမဲာ်ဆှး” (၁ ပ့း ၄:၁၆) ဝဲအဂီၢ်, စီၤပ့းတရူး သဆၣ်ထီၣ် ပှၤစူၢ်နာ်ကစၢ်ခရံာ်တဖၣ်န့ၣ်လီၤ.
ပှၤစူၢ်က့ၤနာ်က့ၤ ကစၢ်ယ့ၣ်ရှူးတဖၣ်အဂီၢ်, မံၤ “ပှၤခရံာ်ဖိ” စံးတၢ်န့ၣ် မ့ၢ်တၢ်န့ၢ်သါ ခွဲးယာ်အဃိ, လၢကျိာ်စ့အဂီၢ်မ့ၢ်ဂ့ၤ, ပဘၣ်တၢ်မၤအၢမၤနး, (မ့) ပဘၣ်တၢ်မၤတရီတပါပှၤအဃိမ့ၢ်ဂ့ၤ, မ်ပသုတမၤဆံးလီၤစှၤလီၤ မံၤ “ပှၤခရံာ်ဖိ” အံၤန့ၣ်တဂ့ၤ. တၢ်လၢပလိၣ်ဘၣ်တဖၣ်န့ၣ် ဒ်ကစၢ်ယွၤ ကတဲာ်ကတီၤန့ၢ်ပှၤအသိး, မူဒါလၢအလီၤဘၣ်ပှၤန့ၣ်, မ့ၢ်ဒၣ်ထဲ ပကအိၣ်မူ မၤလၤကပီၤ ခရံာ်ကစၢ်အမံၤ ကိးမုၢ်နံၤဒဲးန့ၣ်လီၤ.
