မ့ၢ်လၢကလံၤအူ အတဟီၣ်ဆူၣ်အဃိ, မ့ၣ်အူအီၣ်တၢ်အမုၢ်နံၤတဖၣ် ယံာ်ဝဲဒၣ်န့ၣ်လီၤ. ဟီၣ်ခိၣ်အတၢ်စံၣ်စိၤတဲစိၤ အပှၤကူၣ်သ့ကူၣ်ဘၣ် တးစံထၢး (Tacitus) ပာ်ဖျါထီၣ်တၢ်သဘံၣ်ဘူၣ် အတၢ်ဟူးတၢ်ဂဲၤလၢ အိၣ်ပှဲၤဒီးတၢ်ကိးပသူကိးပသီ, ဒီးပှၤဝ့ၢ်ဖိတဖၣ် ဘၣ်ဃ့ၢ်ပူၤဖျဲး အသးသမူအဂီၢ်န့ၣ်လီၤ. အကတၢၢ်န့ၣ်, ဝ့ၢ်ရိမ့ၤ နွံဆံ မျးကယၤဃၣ်ဃၣ်န့ၣ် ဟးဂီၤကွံာ်ဝဲဒၣ်န့ၣ်လီၤ. ရိမ့ၤ အစီၤပၤ နံရိၤ ပာ်ဒ့ၣ်ပာ်ကမၣ်တၢ်အတတီတလိၤလၢ ပှၤစူၢ်က့ၤနာ်က့ၤ ယ့ၣ်ရှူးတဖၣ်အလိၤ, ဒ်အမ့ၢ်ပှၤသ့ၣ်တဖၣ်လၢ အစးထီၣ်ဃိကဲၤထီၣ် ဝ့ၢ်လၢမ့ၣ်အူန့ၣ်လီၤ. အဝဲသးဟ့ပှၤခရံာ်ဖိတဖၣ်အဃိ, လၢမ့ၣ်အူအီၣ်တၢ်, ဒီးမၤသံပှၤအအါအါဂီၢ်ဂီၢ်တဘျီညါအံၤအဂီၢ် ဒ်သိးတၢ်ကပာ်ထီၣ်တၢ်ကမၣ်လၢ ပှၤခရံာ်ဖိတဖၣ်အလိၤအဂီၢ်န့ၣ် ဃုထၢကူၣ်မၤဝဲ, ဒီးတၢ်ဟူထီၣ်သါလီၤတမံၤန့ၣ် တၢ်တတၢာ်တနါဒ်သိးအံၤ ကကဲထီၣ်အသးအဂီၢ်, စီၤပၤ နံရိၤ ဟ့ၣ်လီၤဝဲ အကလုၢ်န့ၣ်လီၤ.

စီၤနဃ့မယၤစ့ၢ်ကီး ဘၣ်ကွၢ်ဆၢၣ်မဲာ်ဝဲ တၢ်ပာ်ဒ့ၣ်ပာ်ကမၣ်အီၤလၢ အတတီတလိၤဒိၣ်ဒိၣ်မုၢ်မုၢ်န့ၣ်လီၤ. အဝဲမ့ၢ်တ့ၢ်လံ ပၤရၣ်အစီၤပၤ အတၢ်ခ့တၢ်ပှၤတဂၤဘၣ်ဆၣ်, ဒ်သိးကဘှီဂ့ၤထီၣ်က့ၤ ဝ့ၢ် အခိၣ်ဒူတဖၣ်အဂီၢ်, ဘၣ်တၢ်ပျဲက့ၤဝဲဒၣ်ဆူ ဝ့ၢ်ယရူၤရှလ့ၣ်,ဃုာ်ဒီးပှၤအံၣ်စရ့လးဖိအဂုၤအဂၤတဖၣ် (နဃ့ ၂:၁-၁၀) န့ၣ်လီၤ. ဖဲတၢ်တ့ထီၣ်ဘှီထီၣ် ဝ့ၢ်အခိၣ်ဒူအကတီၢ်, ဒုၣ်ဒါတဖၣ် စံးကတိၤဝဲ တၢ်တတီတလိၤလၢ ပှၤယူဒၤဖိတဖၣ်န့ၣ် “ကူၣ်ထီၣ်ထီဒါတၢ်,” ဒီးဒုးကဲထီၣ် စီၤနဃ့မယၤလၢ “အဝဲသ့ၣ် အစီၤပၤ” (၆:၆) န့ၣ်လီၤ. ပှၤအံၣ်စရ့လးဖိတဖၣ် စံးဆၢမၤဆၢဝဲဒၣ် တၢ်ပာ်ဒ့ၣ်ပာ်ကမၣ် လၢအတတီတလိၤဘၣ်တဖၣ်အံၤဒ်လဲၣ်. ခီဖျိလၢတၢ်ဘိးဘၣ်သ့ၣ်ညါဝဲ, ဒီးအဝဲသ့ၣ် တမၤကမၣ်တၢ်န့ၣ် အိၣ်မူအိၣ်ဂဲၤပာ်ဖျါထီၣ်ဝဲဒၣ်, (:၈), ဆၢထၢၣ်ဂၢၢ်ကျၢၤလၢ ယွၤအတၢ်စိတၢ်ကမီၤအပူၤဒူဒူ (:၁၁),
ဒီးဃ့ဘါထုကဖၣ် ကစၢ်ယွၤ လၢတၢ်သူၣ်ဆူၣ်သးဂဲၤအပူၤ (:၁၄) န့ၣ်လီၤ. ဖဲဒုၣ်ဒါတဖၣ် “သ့ၣ်ညါဝဲလၢ ဝ့ၢ်ခိၣ်ဒူဝ့ၢ်တြဲၤတဖၣ်ဘၣ်တၢ်ဘှီဝံၤအီၤလၢ ကစၢ်ယွၤအတၢ်မၤစၢၤ” န့ၣ်ဒီး, ဒုၣ်ဒါတဖၣ်န့ၣ် “ပျံၤတၢ်ဒီးအမဲာ်ဆှး” (:၁၆) ဝဲဒၣ်န့ၣ်လီၤ.

ဘၣ်တဘျီဘျီန့ၣ်, ပှၤဂုၤပှၤဂၤတဖၣ် ကစံးကတိၤ ပာ်ဒ့ၣ်ပာ်ကမၣ်ပှၤန့ၣ်လီၤ. ဘၣ်ဆၣ်, ဒ်ကစၢ်ယွၤ ကတဲာ်ကတီၤန့ၢ်ပှၤ ဂံၢ်ဘါလၢပလိၣ်ဘၣ်တဖၣ်အသိး, ပှၤလၢအစံးကတိၤ ပာ်ဒ့ၣ်ပာ်ကမၣ်ပှၤတဖၣ် အတၢ်ကမၣ်န့ၣ် ပပျဲပျၢ်သ့ဝဲ, ဒီး “အိၣ်မူတၢ်အိၣ်မူလၢအဂ့ၤဒ်န့ၣ်အသိး,” “ဒ်သိးပှၤလၢအစံးအၢသု ဒ်ပှၤမၤတၢ်အၢတၢ်သီန့ၣ်, တုၤအကွၢ်သုမၤတၢ်ဂ့ၤဒီး, ကစံးထီၣ်ပတြၢၤယွၤ, ဖဲတၢ်အိၣ်သကိးအမုၢ်နံၤန့ၣ်တက့ၢ်.” (၁ ပ့း ၂:၁၂).