ဖဲ ခရံာ်နံၣ် ၁၅၅ (AD 155) န့ၣ်, လၢသီတၢ်အိၣ်ဖှိၣ်အပၢ်ဖးဒိၣ်, ပိၣ်လံၣ်ကး (Polycarp) တဂၤ, မ့ၢ်လၢအစူၢ်နာ် ကစၢ်ခရံာ်အဃိ, ဘၣ်တၢ်မၤပျံၤအီၤလၢ တၢ်ကဃိသံလၢ မ့ၣ်အူန့ၣ်လီၤ. ပိၣ်လံၣ်ကး စံးဝဲဒၣ်လၢ, “ယမ့ၢ်ယဲ ကစၢ်ခရံာ် အခ့အပှၤန့ၣ် ယံာ်တ့ၢ်လံလၢ အနံၣ် ဃိးဆံဒီးဃုနံၣ်, ဒီးအဝဲတမၤကမၣ် တၢ်နီတမံၤလၢယလိၤန့ၣ်ဘၣ်. ဒီးခဲကနံၣ်အံၤ, ယစီၤပၤလၢ အအုၣ်က့ၤခီၣ်က့ၤယၤန့ၣ် ယကစံးကတိၤထီဒါအီၤ ကသ့ဝဲဒ်လဲၣ်” န့ၣ်လီၤ. မ့ၢ်လၢပစူၢ်နာ် ကစၢ်ယ့ၣ်ရှူး, ပစီၤပၤအဃိ, ဖဲပဘၣ်ကွၢ်ဆၢၣ်မဲာ် တၢ်မၤကွၢ် အဆူၣ်ကတၢၢ်အကတီၢ်, ပိၣ်လံၣ်ကး အတၢ်စံးဆၢအံၤ ကဲထီၣ်တၢ်ထိၣ်ဟူးထိၣ်ဂဲၤ သ့ဝဲဒၣ်လၢပဂီၢ်န့ၣ်လီၤ.
တချုး ကစၢ်ခရံာ် သံ, စှၤနၣ်ရံၣ်အတီၢ်ပူၤန့ၣ်, စီၤပ့းတရူး အတၢ်သးတီလၢ ကစၢ်ယ့ၣ်ရှူးအလိၤန့ၣ် အၢၣ်လီၤဝဲဒူဒူ, ဒီးစံးဝဲဒၣ် “ယကပာ်လီၤကွံာ် ယသးသမူလၢနဂီၢ်” (ယိၤ ၁၃:၃၇) န့ၣ်လီၤ. ကစၢ်ယ့ၣ်ရှူး, လၢအသ့ၣ်ညါ စီၤပ့းတရူး ဂ့ၤဒိၣ်န့ၢ်ဒံး, စီၤပ့းတရူး သ့ၣ်ညါလီၤက့ၤအသးဒၣ်ဝဲန့ၣ်, စံးဆၢဝဲဒၣ်, “ယစံးဘၣ်တဲဘၣ်နၤတီတီလိၤလိၤ, ဆီဖါ တချုးအိၣ်အိထီၣ်ဒံးဘၣ်ဒီး, နကသမၢယၤသၢဘျီ” (:၃၈) န့ၣ်လီၤ. ဘၣ်ဆၣ်, ဖဲကစၢ်ယ့ၣ်ရှူး ဂဲၤဆၢထၢၣ်သမူထီၣ်က့ၤ လၢတၢ်သံဝံၤအလီၢ်ခံန့ၣ်, ပှၤတဂၤဃီလၢ အသမၢတ့ၢ်အီၤန့ၣ် စးထီၣ်မၤ ကစၢ်ယ့ၣ်ရှူးအတၢ်မၤ လၢတၢ်သူၣ်ဒူသးဒူအပူၤ, ဒီးလၢခံအကတၢၢ်န့ၣ် မၤလၤကပီၤဝဲဒၣ် အကစၢ်, ခီဖျိလၢဟ့ၣ်လီၤကွံာ်အသးသမူ (ကွၢ် ၂၁:၁၆-၁၉) န့ၣ်လီၤ.
နမ့ၢ်နဲ ပိၣ်လံၣ်ကး (မ့) စီၤပ့းတရူးတဂၤန့ၣ်လဲၣ်. ပဝဲဒၣ်အါဂၤန့ၣ်, ပမ့ၢ်စံးတီတီလိၤလိၤန့ၣ်, ပလီၤဂာ်အါဒိၣ်ဝဲလၢ စီၤပ့းတရူး, မ့ၢ်ပှၤလၢ “အတၢ်သူၣ်ဒူသးဒူလၢအဆၢကၢ်တဲာ်” တဂၤ, ဒ်အမ့ၢ် ပှၤစူၢ်နာ်ယ့ၣ်ရှူးတဂၤအသိး လီၤတူာ်လီၤကာ်ဝဲလၢ တၢ်စံးကတိၤ (မ့) တၢ်အိၣ်မူအိၣ်ဂဲၤ မၤလၤကပီၤအကစၢ်န့ၣ်လီၤ. လၢတၢ်မၢလိဒၢးအပူၤမ့ၢ်ဂ့ၤ, လၢတၢ်အိၣ်ဖှိၣ်ရိဖှိၣ်အဒၢးမ့ၢ်ဂ့ၤ, (မ့) လၢတၢ်အိၣ်ဘှံးလီၢ်အဒၢးမ့ၢ်ဂ့ၤ, တၢ်မၤအသးလၢပလီၤတူာ်လီၤကာ်အကတီၢ်ဒ်သိးအံၤန့ၣ် တပာ်ဖျါထီၣ် ပတၢ်မ့ၢ်တၢ် လီၤတံၢ်လီၤဆဲးန့ၣ်ဘၣ်. ဖဲတၢ်လီၤတူာ်လီၤကာ်ဒ်သိးအံၤတဖၣ် မ့ၢ်အိၣ်ထီၣ်န့ၣ်ဒီး, လၢတၢ်ထုကဖၣ်အပူၤန့ၣ် ပကဘၣ်ဃၣ်လိၤက့ၤပသးဆူ ကစၢ်ယ့ၣ်ရှူး, ပှၤလၢအဒိးသံအသးလၢပဂီၢ်, ဒီးအိၣ်မူအိၣ်ဂဲၤဝဲလၢပဂီၢ်တဂၤအအိၣ်န့ၣ်လီၤ. လၢတၢ်လီၢ်အကီအခဲတဖၣ်အပူၤန့ၣ် ကစၢ်ယ့ၣ်ရှူး ကမၤစၢၤပှၤ, ဒ်သိးပကအိၣ်တီအိၣ်လိၤဒီးအီၤ, ဒီးပကအိၣ်မူလၢတၢ်သူၣ်ဒူသးဒူ ကိးမုၢ်နံၤဒဲးလၢအဂီၢ်န့ၣ်လီၤ.
