“တၢ်အၢၣ်လီၤတၢ်ကမၣ်” အလံာ်ပူၤန့ၣ်, အီးကၢးစတံ (Augustine) ကွဲးပာ်ဖျါဝဲဒၣ်လၢ ကစၢ်ယွၤ အတၢ်ရ့လိာ်ဘၣ်ထွဲဒီးအီၤန့ၣ် ကဲထီၣ်အသး သ့ဝဲဒၣ်ဒ်လဲၣ်အဂ့ၢ်န့ၣ်လီၤ. ပှၤလၢ အတ့လီၤမူခိၣ်ဟီၣ်ခိၣ်ဒီးကယဲၢ်တၢ်ဘၣ်တ့ခဲလၢာ်အကစၢ်တဂၤန့ၣ် ဟဲနုာ်လီၤဆူ ပှၤဒ်သိးအီၤ, လၢအမ့ၢ်တၢ်အဆံး, ပှၤတၢ်ဒဲးဘးဖိတဂၤ အသးကံၢ်ပူၤသ့ဝဲဒၣ်ဒ်လဲၣ်. ဘၣ်ဆၣ်, အဝဲသကွံာ်ကညး ကစၢ်ယွၤ ဒ်သိးကဒုးကဲထီၣ်တၢ်ဂ့ၢ်အံၤအဂီၢ်, ဃ့ထုကဖၣ်ဝဲလၢ “ယနီၢ်သးအဟံၣ်န့ၣ် တၢ်လီၢ်အံၣ်ဝဲလီၤ. ဒ်သိးနကဟဲနုာ်လီၤအဂီၢ်, မၤလဲၣ်ထီၣ် ယနီၢ်သးအဟံၣ်န့ၣ်တက့ၢ်. ယနီၢ်သးအဟံၣ်န့ၣ် ဟးဂူာ်ဟးဂီၤဝဲ, ဒီးဘှီဂ့ၤထီၣ်က့ၤအီၤတက့ၢ်. ယသူၣ်ယသးန့ၣ် အိၣ်ပှဲၤဒီးတၢ်လၢ အတကြၢးဒီးနမဲာ်ချံ အတၢ်ထံၣ်တဖၣ်န့ၣ် ယအၢၣ်လီၤ, ဒီးယသ့ၣ်ညါယဲန့ၣ်လီၤ. ဘၣ်ဆၣ်, မ့ၢ်မတၤတဂၤကမၤကဆှီအီၤလဲၣ်. မ့တမ့ၢ်ဘၣ်လၢနၤန့ၣ်ဒီး, မ့ၢ်ယကဘၣ်ဟီၣ်ကိးထီၣ်ဆူ မတၤတဂၤအအိၣ်လဲၣ်” န့ၣ်လီၤ

ခ့ခါအကတီၢ်န့ၣ် ပသ့ၣ်ညါအီၤ ဒ် “ပှၤစီဆှံ အီကၢးစတံ” (Saint Augustine) အသိး, မ့ၢ်ပှၤကူၣ်သ့ လၢအတၢ်သ့ဆိကမိၣ်ယိာ်ယိာ်, ဒီးပှၤကူၣ်သ့လၢထူဂ့ၢ်ယွၤဂ့ၢ်, လၢအလီၤပးကဲကွၢ်လိတဂၤန့ၣ်လီၤ. ဘၣ်ဆၣ်, အီကၢးစတံ ထံၣ်လီၤက့ၤအသးကဆှီဒီဖိ, ဒ်အမ့ၢ်ပှၤလၢ ကစၢ်ယွၤ အတၢ်လီၤလိၣ်လီၤလး ဆီတလဲက့ၤအီၤ, ဒီးအဲၣ်ဒိးသ့ၣ်ညါအီၤတဂၤအသိးန့ၣ်လီၤ.

ထါစံးထီၣ်ပတြၢၤ ၁၁၉ အပူၤန့ၣ်, ပှၤကွဲးထါတဂၤစ့ၢ်ကီး ကမၢကမၣ်ဝဲဒၣ်လၢ ကစၢ်ယွၤ လီၣ်ဖျါထီၣ်အနီၢ်ကစၢ်အသး, လီၤဆီဒၣ်တၢ်, ခီဖျိလၢယွၤကလုၢ်ကထါ (:၁၈) န့ၣ်လီၤ. ပှၤကွဲးထါ စံးထီၣ်ပတြၢၤယွၤလၢ “တုၤနမၤလဲၢ်ထီၣ်ယသး” (:၃၂) န့ၣ်လီၤ. အဂ့ၢ်ဒ်အံၤ, ခီဖျိလၢအဘျုးအဖှိၣ်အဃိန့ၣ် ကစၢ်ယွၤ အသးအိၣ်မၤလဲၢ်ထီၣ် ပသူၣ်ပသး, ဒ်သိးဒီးပကလဲၤတၢ်လၢ ကစၢ်ယွၤ နဲၣ်ဆှၢပှၤ အကျဲဧိၤအကပိၤဧိၤအပူၤ ကသ့ဝဲအဂီၢ် (:၄၅) န့ၣ်လီၤ. ကစၢ်ယွၤ ဃၣ်တရံးက့ၤ ပသူၣ်ပသးလၢ တၢ်တတီတလိၤ, တၢ်ဟးဂုာ်ဟးဂီၤတဖၣ် (:၃၆-၃၇) အလီၢ်အကျဲ, ဒီးကနဲၣ်ဆှၢပှၤဆူ “အတၢ်မၤလိာ်အကျဲ,” တၢ်လီၢ်လၢ ပကဃုထံၣ်န့ၢ် ကစၢ်ယွၤ “အတၢ်မုာ်တၢ်လၤ” လၢပထိၣ်ဒွးအီၤတသ့ဘၣ်” (:၃၅) န့ၣ်လီၤ.

ပမ့ၢ်ပှၤသ့ၣ်တဖၣ်လၢအဆံး, ဒီးပသူၣ်ပသးတဖၣ်န့ၣ် ကဒံကဒါဝဲဒၣ်န့ၣ်လီၤ. ဘၣ်ဆၣ်, ပမ့ၢ်ဃၣ်ကဒါက့ၤ ပတၢ်မိၣ်န့ၢ်သးလီၤတဖၣ်ဆူ ကစၢ်ယွၤအအိၣ် (:၃၄,၃၆) န့ၣ်ဒီး, အဝဲကနဲၣ်ဆှၢပှၤဆူ တၢ်သးခု, ဒီးတၢ်သဘျ့နီၢ်နီၢ်အကျဲန့ၣ်လီၤ.