ပှၤအမဲာ်သၣ်တဘ့ၣ်န့ၣ် အိၣ်ဝဲဖဲန့ၣ် ဒီဆၢကတီၢ်ညါဘၣ်ဆၣ်, ပှၤတသ့ၣ်ညါဝဲနီတဂၤဘၣ်. ဆၣ် ကၠီရှၣ် ရ့နိ(လ) (Sir Joshua Reynold) တ့ခဲၣ်ဝဲဒၣ် “ခၣ်ဒံၢ်နၢၣ် ဘူဖီး(ဒ) အတၢ်သံ” (The Death of Cardinal Beaufort) ဖဲ ၁၇၈၉ နံၣ်အကတီၢ်, တ့ခဲၣ်ဝဲတၢ်နါတဒု အမဲာ်သၣ်, ဖဲပှၤလၢဘူးထီၣ်ကသံဝဲဒၣ်တဂၤအလီၢ်ခံတၢ်ခံးကျါန့ၣ်လီၤ. ရှ့းစပံယၢၣ် အတၢ်ဒုးနဲၣ်တပတီၢ်, လၢအပာ်ဖျါထီၣ် “ပှၤအၢတူာ်ကိာ် လၢအတၢ်မၤအါ, မၤတံာ်တာ်တၢ်တဂၤ” အတၢ်အိၣ်ဖဲန့ၣ်အဂ့ၢ်န့ၣ်, ရ့နိ(လ) တ့ခဲၣ်ပာ်ဖျါဝဲ လီၤတံၢ်လီၤဆဲးဘၣ်ဆၣ်, ပှၤအိၣ်ဝဲတနီၤ လၢတဘၣ်အသးဒီးအတၢ်ဟံးန့ၢ် အခီပညီလိၤလိၤန့ၣ်ဘၣ်. ဖဲ ရ့နိ(လ) သံဝဲဒၣ် ဖဲ ၁၇၉၂ နံၣ် ဝံၤအလီၢ်ခံ, ပှၤအမဲာ်သၣ်အံၤ ဘၣ်တၢ်ဖှူဘၢက့ၤအီၤဒီး ကသံၣ်ခဲၣ်, ဒီးပှၤသးပ့ၤနီၣ်အီၤန့ၣ်လီၤ. ဖဲတၢ်တယံာ်ဒံးဘၣ်န့ၣ် တၢ်ကတီၤကယာ်ဒီဒၣ် ဒွဲလၤကူၣ်သ့အတၢ်မၤန့ၣ် ဒုးလီၣ်ဖျါထီၣ်က့ၤအီၤ, လၢကသံၣ်ခဲၣ်ဒီးကသံၣ်ဖၠူကတြ့ၣ် အကဘျံးတဖၣ်အကဘျံးအဖီလာ်န့ၣ်လီၤ.

ဖဲကစၢ်ယွၤ ပၢဆှၢတၢ် လၢအစိဒိၣ်အကမီၤထီအပူၤန့ၣ် လံာ်စီဆှံ ပာ်ဖျါထီၣ် ဝံဧိၤကလၤဧိၤအတၢ်အိၣ်သးနီၢ်နီၢ် လၢပခိၣ်ပဃၢၤ, တၢ်လၢပထံၣ်န့ၢ်အီၤလၢပမဲာ်ချံအတၢ်ထံၣ်တသ့ဘၣ်န့ၣ်လီၤ. ဖဲ ဝံအလံၤရှါ ဘၣ်တၢ်ကဝီၤဃာ်အီၤလၢ ဒုၣ်ဒါအပှၤသုးဖိ, ဒီးအလ့ၣ်ကဟ့ၣ်တဖၣ် လၢအဆူၣ်အကတီၢ်, အခ့အပှၤန့ၣ် ပျံၤတၢ်အဃိ, သံကွၢ်ဝဲဒၣ်လၢ “ပကမၤဒ်လဲၣ်” န့ၣ်လီၤ. ဝံအလံၤရှါ စံးဘၣ်အီၤ “ပှၤအိၣ်ဒီးပှၤအံၤ အါန့ၢ်ပှၤအိၣ်ဒီးအီၤ တက့ၢ်လီၤ.” ဒီး “ဘါထုကဖၣ်တၢ်, ဒီးစံးဝဲဒၣ်, ယွၤဧၢ, အိးထီၣ်အမဲာ် ဒ်သိးအကထံၣ်တၢ်တက့ၢ်” န့ၣ်လီၤ. တကီၢ်ခါန့ၣ် အခ့အပှၤ “ထံၣ်တၢ်, ဒီးကွၢ်ကွၢ်, ကစၢၢ်ကလိပှဲၤဝဲဒီးကသ့ၣ်မ့ၣ်အူ, ဒီးလ့ၣ်ကဟၣ်မ့ၢ်အူ အိၣ်ဝးတရံး စီၤအလံၤရှါ” (၂ စီၤ ၆:၁၄-၁၇) န့ၣ်လီၤ.

ကသ့ၣ်မ့ၣ်အူ, ဒီးလ့ၣ်ကဟၣ်မ့ၣ်အူတဖၣ် ဒုးနဲၣ်ဝဲဒၣ်လၢ မူခိၣ်ကလူးတဖၣ်အိၣ်ဆိးဝဲဖဲန့ၣ် ဒ်သိးဒီးကဒီသဒၢ စီၤအလံၤရှါအဂီၢ်န့ၣ်လီၤ. တၢ်ဂ့ၢ်အံၤ မ့ၢ်တၢ်မၤမုာ်ထီၣ်က့ၤပှၤအမ့ၢ်အတီတဖၣ်လၢ လံာ်စီဆှံ ပာ်ဖျါထီၣ်ဝဲဒၣ်အကျါတတီၤ, ဒ်အမ့ၢ် ဟီၣ်ခိၣ်လၢ တၢ်လီၤဘၣ်ယိၣ်တဖၣ် အိၣ်ခိးခူသူၣ်, ကမၤအၢမၤနးတၢ်, ဒီးသူၣ်ဂ့ၢ်သးကျိၤအတၢ်ဒုးတၢ်ယၤတဖၣ်အကတီၢ်န့ၣ်, ကစၢ်ယွၤ အံးထွဲကွၢ်ထွဲပှၤအဖၢမုၢ်န့ၣ်လီၤ. ပဘၣ်ကွၢ်ဆၢၣ်မဲာ်တၢ်တမံၤဂ့ၤတမံၤဂ့ၤန့ၣ်, “တၢ်ကမၤလီၤဖးပှၤဒီးယွၤအတၢ်အဲၣ်တၢ်ကွံ” (ရိမ့ၤ ၈:၃၉) အဂီၢ်, တၢ်တအိၣ်နီတမံၤဘၣ်အဂ့ၢ်န့ၣ် ဖဲပသ့ၣ်ညါဝဲန့ၣ်ဒီး, ကမ့ၢ်တၢ်အဂ့ၤလၢပဂီၢ် ဆံးဒိၣ်လဲၣ်.