ယအိၣ်ခိးတကဲလၢၤဘၣ်. ယၤဒီးယဝၤသးဘိ, ပဟဲက့ၤလၢပနံာ်ရိကျး အခဲအံၤ, ဒီးဖဲပထုးထီၣ်ပာ်လီၤ တၢ်လၢပဟဲက့ၤစိာ်ပှ့ၤတဖၣ်န့ၣ်ဒီး, ယလူၤဃု ကိၣ်ဆီဒံၣ် (donut) အထၢၣ်ဘၣ်ဆၣ်, ယတထံၣ်ဘၣ်. လၢခံန့ၣ် ယကွၢ်ထံကွၢ်ဆးက့ၤ လံာ်တူၢ်လိာ်စ့အပူၤ, ဒီးတၢ်တူၢ်လိာ်စ့လၢကိၣ်ဆီဒံၣ်အဂီၢ်တအိၣ်ဘၣ်. လၢတၢ်သးအ့န့အပူၤ, ယကိးပသူထီၣ် “တၢ်လၢယအဲၣ်ဒိးယဲ ထဲတမံၤဧိၤလၢကျးန့ၣ် မ့ၢ်ဒၣ်ကိၣ်ဆီဒံၣ်” န့ၣ်လီၤ. တဆံယဲၢ် မံးနံး လဲၤပူၤကွံာ်ဝံၤန့ၣ်ဒီး, ယဝၤသးဘိ ဟဲဟ့ၣ်ယၤ ကိၣ်ဆီဒံၣ်တဘိၣ်န့ၣ်လီၤ. ဒ်သိးကလဲၤပှ့ၤကိၣ်ဆီဒံၣ်အဂီၢ်, ယဝၤလဲၤကဒီးဝဲလၢမူခိၣ်ဖီအကျါ လၢတၢ်ခူသူၣ်အပူၤန့ၣ်လီၤ. ယစံၢ်တံၢ်ဃာ်အစုဒုၣ်ဃံးဃံးဝံၤ, လၢတၢ်မဲာ်ဆှးအပူၤန့ၣ် ယစံးဘၣ်အီၤလၢ, “ဒ်သိးနကမၤမံမၤမုာ် ယသးဆၢအီၣ်ဘၣ်တၢ်အဂီၢ်, မ့ၢ်လၢနတဘၣ်ဒိဘၣ်ထံးအဃိ, ယသးခုယဲ” န့ၣ်လီၤ.
ကိၣ်ဆီဒံၣ်ဖိတမံၤအဂီၢ်, ယတညီနုၢ် ဆၢအီၣ်ဘၣ်ဒ်သိးအံၤန့ၣ်ဘၣ်. ဘၣ်ဆၣ်, တၢ်တနွံအံၤန့ၣ် ယသးလီၤဘှံးလီၤဘှါတ့ၢ်ယဲအဃိ, ယဃုထံၣ်န့ၢ် တၢ်မၤမုာ်ထီၣ်က့ၤ ယသးလၢ ကိၣ်ဆီဒံၣ်ဖိအံၤအပူၤ, ဒီးခီဖျိလၢယဝၤသးဘိ အတၢ်အဲၣ်ဒီးအတၢ်သးအိၣ်အဃိ, ယဒိးန့ၢ်ဘၣ်ယဲ တၢ်သူၣ်ခုသးခုဒိၣ်ဒိၣ်ယိာ်ယိာ်န့ၣ်လီၤ.
တၢ်မၤမံမၤမုာ် ပသးအတၢ်ဆၢမိၣ်န့ၢ်တဖၣ်အဂီၢ်, တၢ်မၤမုာ်ထီၣ်က့ၤပှၤ လၢပမၤန့ၢ်အီၤသ့တကလုာ်န့ၣ် ထီဘိမ့ၢ်ဒၣ်တၢ်တစိၢ်တလီၢ်ဖိန့ၣ်လီၤ. ဒ်ပှၤတၢ်မၢဖိ စီၤပီလူး စံးဘၣ်တဲဘၣ် ပှၤကရံၣ်သူးဖိတဖၣ်အသိး, တၢ်မၤမုာ်ထီၣ်က့ၤတၢ်နီၢ်နီၢ်, ဒီးအအိၣ်စံာ်အိၣ်ကျၢၤန့ၣ် အိၣ်ဟဲခီဖျိလၢ “တၢ်မၤမုာ်ခဲလၢာ် အကစၢ်” (၂ ကရံၣ် ၁:၃) န့ၣ်လီၤ.
ပှၤလၢအဖးအလံာ်ပရၢတဖၣ် အတၢ်ဂ့ၢ်လိာ်သး, ဒီးအတၢ်လိၣ်အဒိၣ်အယိာ်တဖၣ်န့ၣ် စီၤပီလူး သ့ၣ်ညါနၢ်ပၢၢ်ဝဲဒၣ်န့ၣ်လီၤ. ဒ်အဝဲသ့ၣ်တဖၣ်အသိး, လၢအတၢ်စူၢ်တၢ်နာ်အဃိ စီၤပီလူး ဘၣ်ကွၢ်ဆၢၣ်မဲာ်ဒီးတၢ်မၤကွၢ်တဖၣ် ကိးမုၢ်နံၤဒဲး, ပာ်ဃုာ်ဒီး
တၢ်မၤအၢမၤနးအီၤန့ၣ်လီၤ. ခီဖျိလၢကစၢ်ယွၤ မၤမုာ်ထီၣ်က့ၤအီၤအဃိ, အဝဲစ့ၢ်ကီး, မၤမုာ်ထီၣ်က့ၤ အဝဲသ့ၣ်သ့ဝဲဒၣ် (:၄) န့ၣ်လီၤ.
ဖဲပဘၣ်နးဘၣ်ဖှီၣ်အကတီၢ်, ပဃၣ်ဃီၤပသးဆူ ကစၢ်ယ့ၣ်ရှူး, ပှၤအိၣ်လၢအိၣ်ပှဲၤဒီးတၢ်သးကညီၤ, ဒီးတၢ်မၤမုာ်ထီၣ်က့ၤတၢ်တဂၤ (:၅) အအိၣ်သ့ဝဲန့ၣ်လီၤ. ပကဃုထံၣ်န့ၢ် တၢ်မၤမုာ်ထီၣ်က့ၤပသး လၢအအိၣ်န့ၣ်လီၤ. ဒီးဖဲပလဲၤခီဖျိကလၢၢ်ဘၣ် အတၢ်မၤမုာ်ထီၣ်က့ၤပှၤန့ၣ်ဒီး, ပဟ့ၣ်ခီနီၤလီၤဆူ ပှၤဂုၤပှၤဂၤအအိၣ်သ့ဝဲဒၣ်န့ၣ်လီၤ.
