ဖဲပနံၣ်ရိကျးတဖျၢၣ်အပူၤန့ၣ် ဖုသးပှၢ်တဂၤ ကွၢ်ဝဲဖိသၣ်ထၢၣ်ဝံချၢတဖၣ် ဖးယံာ်ဖးထီန့ၣ်လီၤ. အဝဲတဲယၤ “တနံၤအံၤ, မ့ၢ်ဝဲယလံၤမုၣ်ဖိအတၢ်အိၣ်ဖျဲၣ်ဆၢက့ၤအမုၢ်နံၤ န့ၣ်လီၤ. ယမုၢ်လၢ်လၢ အဝဲကဘၣ်သူၣ်ဘၣ်သး ယတၢ်ဟ့ၣ်ဖိအံၤ” န့ၣ်လီၤ. ဖဲပှၤဟ့ၣ်တၢ်ဖိတၢ်လံၤအပှ့ၤအလီၢ်န့ၣ်, အဝဲဖီၣ်ဃာ် ထၢၣ်ဝံချၢအဂီၤစၢ်ဖိ လၢအအိၣ်ဒီးတၢ်ဂီၤ ကွံးကွး အက့ၢ်ဂီၤဒိန့ၣ်လီၤ. ဖျါလၢ ဖုသးပှၢ်တဂၤအံၤ အသူၣ်ပိၢ်သးဝးဝဲဒၣ်န့ၣ်လီၤ.

လၢခံန့ၣ်, ဖဲတၢ်အီၣ်ကျးတဖျၢၣ်အပူၤန့ၣ်, ယထံၣ်ကဒီးအီၤလၢ ဖိသၣ်မုၣ်ဖိတဂၤဃုာ်ဒီးအမိၢ်အပၢ်တဖၣ်န့ၣ်လီၤ. ဖိသၣ်မုၣ်ဖိအံၤ အိးထီၣ်ဝဲအတၢ်ဟ့ၣ်, ဒီး စံးဝဲဒၣ်လၢ “တၢ်ဂီၤကွံးကွး အက့ၢ်ဂီၤဒိအံၤ တဘၣ်ယသးဘၣ်. ဒီးယသးဟ့အလွဲၢ်ဂီၤစၢ်” န့ၣ်လီၤ. အမိၢ်အပၢ် မၢအဖိမုၣ် ဃ့ကညးက့ၤအဖုန့ၣ်လီၤ. ဘၣ်ဆၣ်, အဝဲကဒူးကဒ့ၣ်တၢ်အဖၢမုၢ်န့ၣ်လီၤ. ဖုတဂၤအံၤအဂီၢ်, ယသးတမုာ်ဘၣ်ယဲန့ၣ်လီၤ.

ဘၣ်တဘျီဘျီ, ယစံးဆၢမၤဆၢယွၤအတၢ်ဟ့ၣ်တဖၣ်ဒ်လဲၣ်န့ၣ် ယသ့ၣ်နီၣ်ထီၣ်က့ၤယဲန့ၣ်လီၤ. မ့ၢ်လၢယအဲၣ်ဒိးတၢ်အဂၤတမံၤအဃိ, ယကဒူးကဒ့ၣ်တၢ်, ဒီးယတထံၣ်တၢ်လီၤလး အိၣ်ဝဲလၢယမဲာ်ညါဘၣ်. လၢတၢ်အဲၣ်တၢ်ကွံအပူၤန့ၣ် ယွၤအနီၢ်ကစၢ်ဒၣ်ဝဲ ဟ့ၣ်တ့ၢ်လံ တၢ်တမံၤမံၤလၢယဂီၢ်န့ၣ်လံ. ပှၤအံၣ်စရ့လးဖိတဖၣ် အတၢ်အိၣ်မူစ့ၢ်ကီး ဒ်သိးအံၤန့ၣ်လီၤ. ကစၢ်ယွၤ အိၣ်တီအိၣ်လိၤဝဲလၢ အတၢ်အၢၣ်လီၤ, “ယကဒုးဟဲစူၤကိၣ်လၢမူခိၣ်လၢသုဂီၢ်” (၂ မိၤ ၁၆:၄) န့ၣ်လီၤ. လၢပှၢ်မုၢ်ကနၢန့ၣ် ယွၤ ကတဲာ်ကတီၤန့ၢ်တၢ်လၢ ပှၤဂီၢ်မုၢ်အဂီၢ် တီတီလိၤလိၤ, “တုၤပစီၤထံလီၤဘၣ်လၢ ပှၤသူၣ်ဒဲအလီၢ်ဒီး, မၤနၤန့ၣ်လီၤဘၣ်လၢအဖီခိၣ်” (၄ မိၤ ၁၁:၉) န့ၣ်လီၤ.

ဘၣ်ဆၣ်, ပှၤအံၣ်စရ့လးဖိတဖၣ် ကဘၣ်စံးဘျုးစံးဖှိၣ်ကစၢ်ယွၤအလီၢ်န့ၣ်, ကဒူးကဒ့ၣ် ယွၤအတၢ်အဲၣ်, လၢအလုၢ်အီၣ်လုၢ်အီအဝဲသ့ၣ်, ဒီးစံးဝဲဒၣ် “လၢမၤနၤအဖီခိၣ်န့ၣ် တၢ်တအိၣ်ဘၣ်လၢ ပမဲာ်ညါနီတမံၤဘၣ်” (:၆) န့ၣ်လီၤ. ဒ်သိးကဒိးန့ၢ် တၢ်အီၣ်အဂုၤအဂၤအဂီၢ်, လၢတၢ်ဆီၣ်လီၤသးအပူၤ ကဘၣ်ဃ့ဝဲဒၣ်ယွၤအလီၢ်န့ၣ်, ပှၤဂီၢ်မုၢ်တဖၣ် ဟီၣ်ကိးပသူဖးထီ, ဒီးကအုကစွါဝဲလၢ ယွၤအတၢ်ဟ့ၣ်အဃိန့ၣ်လီၤ.

မုၢ်နံၤဖဲတၢ်သးဘၣ်ဒိ အိၣ်ဖျါဝဲလၢ ဖုသးပှၢ်တဂၤအံၤ အမဲာ်ချံအပူၤန့ၣ် ယသ့ၣ်နီၣ်ဒံးယဲဒၣ်န့ၣ်လီၤ. ဖဲပကဒူးကဒ့ၣ်တၢ်အကတီၢ်, ပပၢ်ယွၤလၢမူခိၣ် အသးကတူၢ်ဘၣ်ခီၣ်ဘၣ်ဝဲဒ်လဲၣ်န့ၣ် တၢ်ဂ့ၢ်အံၤ ဒုးဆိကမိၣ်ထီၣ်ယၤန့ၣ်လီၤ. တၢ်ဟ့ၣ်လၢ ယွၤဟ့ၣ်တ့ၢ်ပှၤတဖၣ်အဂီၢ်, မ်ပကစံးဘျုးဆၢက့ၤတၢ်န့ၣ်တက့ၢ်.