ဖံထၢၣ် တၤခၠံၣ် (Peter Turchi) လၢ အသိၣ်လိတၢ်ကွဲးလံာ်န့ၣ်, မ့ၢ်ထံၣ်ဟီၣ်ခိၣ်ဂီၤတဘ့ၣ်န့ၣ်, အဝဲဃုတၢ်လီၤသူၣ်ဟူးသးဂဲၤအသီ လၢအပူၤန့ၣ်လီၤ. အဝဲစံးဝဲ, “တၢ်ဃ့ကွၢ်ဟီၣ်ခိၣ်ဂီၤ တဘ့ၣ်န့ၣ် မ့ၢ်တၢ်စံး “တဲန့ၢ်ယၤပူတယုၢ်တက့ၢ်” န့ၣ်လီၤ.” ယဖီၣ်စှီၤဃာ် အတၢ်ဆိကမိၣ်အဝဲန့ၣ်, ဒီးကတဲာ်ကတီၤတၢ်လၢ ယကသိၣ်လိ အိၣ်ဘှံးနံၤ တၢ်မၤလိ လၢခရံာ်အိၣ်ဖျဲၣ်အကတီၢ်, ဘၣ်ဃးဒီး “ပှၤမၢ်ကူးတဖၣ် အတၢ်နာ်” အဂ့ၢ်န့ၣ်လီၤ. ဖဲယမၤလိနၢ်ပၢၢ် ဟီၣ်ခိၣ်ဂီၤတဖၣ်အခါ, ယသ့ၣ်ညါဘၣ်လၢ ပှၤမၢ်ကူးဖိတဖၣ် လဲၤတၢ်န့ၣ် ယံၤဝဲ အမံးလာ် ၉၀၀, လၢ တၢ်ဆၢကတီၢ် နွံလါဘျဲၣ်သ့ၣ်သ့ၣ်, ဒ်သိး ကထံၣ်န့ၢ် ဖိသၣ်ခရံာ်ကစၢ်အဂီၢ်, ဒီးလၢခံကတၢၢ် ထံၣ်ဘၣ်ဝဲန့ၣ် တမ့ၢ် ဖိသၣ်ဆံးဖိလၢ ကျီၢ်အီၣ်ဆၣ်အလီၢ်ပူၤဘၣ်, မ့မ့ၢ် ဖိသၣ် ဟးလိသီဖိလၢ အအိၣ်ဒီး အမိၢ်အပၢ်လၢဟံၣ်တဖျၢၣ်အပူၤတဂၤန့ၣ်လီၤ. တၢ်လဲၤလၢ အယံာ်ဝဲထၢဝဲ ထဲအံၤဝံၤ အလီၢ်ခံ, အဝဲသ့ၣ် မၤဝဲမနုၤလဲၣ်. အဝဲသ့ၣ် “ထိၣ်လီၤပှီၤအသး, ဒီးဘူၣ်ထီၣ်ဘါထီၣ်အီၤ”န့ၣ်လီၤ (မး ၂:၁၁).

ပှၤမၢ်ကူးတဖၣ် အတၢ်လဲၤန့ၣ် ကွဲန့ၢ် ပှၤမၤလိတၢ်ဖိတဖၣ် ဒီးယၤ, လၢပကတိာ်ကျဲၤဃု ခရံာ် လၢလၢပှဲၤပှဲၤအဂီၢ်န့ၣ်လီၤ. ဒ်ယွၤအကလုၢ်ကထါ တဲဘၣ်ပှၤအသိး, လၢခံကတၢၢ်ဖဲ ပှၤမၢ်ကူးတဖၣ် လဲၤတုၤဆူ ဝ့ၢ်ယရူၤရှလ့ၣ်အခါန့ၣ်, အဝဲသ့ၣ် အတၢ်သံကွၢ်တဘျီဃီန့ၣ် မ့ၢ်ဝဲ “ပှၤအိၣ်ဖျဲၣ်ယူဒၤအစီၤပၤန့ၣ် မ့ၢ်အအိၣ်ဖဲလဲၣ်. အဂ့ၢ်ဒ်အံၤ, ပထံၣ်ဘၣ် အဆၣ်တဖျၢၣ်လၢ မုၢ်ထီၣ်န့ၣ်, ဒီးပဟဲဘူၣ်ထီၣ်ဘါထီၣ်အီၤလီၤ” (:၂).

တၢ်ဒ့ၣ်စၢၤန့ၣ် တမၤစၢ်လီၤအတၢ်သူၣ်ဆူၣ်သးဆူၣ်လၢ ကလဲၤဘူၣ်ထီၣ်ဘါထီၣ် တၢ်အဂီၢ်ဘၣ်. တၢ်ဘၣ်ယိၣ်အလီၢ်မ့ၢ်ဂ့ၤ, တၢ်ဆၢကတီၢ် စဲၤခံမ့ၢ်ဂ့ၤ, တမၤဟးဂီၤ အဝဲသ့ၣ်အသးဘၣ်. စီၤပၤဟ့ၤရိာ် အတၢ်မၤဆူၣ်လၢက “လဲၤသံကွၢ်တၢ်လီၤတံၢ်လီၤဆဲး လၢဖိသၣ်န့ၣ်အဂ့ၢ်အကျိၤ” (:၈) န့ၣ် မ့ၢ်တၢ်လၢ အအိၣ်ဒီး အခီပညီ ဒၢက့ၣ်န့ၣ်လီၤ. ပှၤလၢ အဃုကစၢ်ယ့ၣ်ရှူးလၢတၢ်ကျဲးစၢး ထုးဂံၢ်ထုးဘါအပူၤ အါန့ၣ် ပှၤမၢ်ကူးတဖၣ်န့ၣ်, တအိၣ်ဘၣ်နီတဂၤဘၣ်.

ပဝဲစ့ၢ်ကီး ပပးကဲပှၤမၢ်ကူးတဖၣ် အဒိအတဲာ်သ့ဝဲ ခီဖျိတၢ်ဃုခရံာ်လၢ တၢ်သးစွံကတုၤအပူၤန့ၣ်လီၤ. အန့ၣ်ဒီး, ဖဲပဘူၣ်ထီၣ်ဘါထီၣ်အီၤအခါ, ပမုၢ်လၢ်သ့လၢ ပပၢ်ယွၤလၢမူခိၣ်တဂၤန့ၣ် ကကတိၤတၢ်ဆူ ပသူၣ်ပသး, ဒီးဆှၢပဝဲဒၣ်လၢ ကျဲလီၢ်လံၤဆူကျဲအသီတဖၣ် ဒ်သိးကလဲၤတၢ်ဒီးအီၤအဂီၢ်န့ၣ်လီၤ.