မိၢ်ပၢ်အဂီၢ်, ဖိတဂၤ အတၢ်သံန့ၣ် မ့ၢ်တၢ်လီၤသးဘၣ်ဒိဒိၣ်ဒိၣ်ကလဲာ်န့ၣ်လီၤ. ဘၣ်ဆၣ်, နဖိမ့ၢ်လီၤမၢ်ခံဂၤန့ၣ်ဒီး, ပကွၢ်ဆိကမိၣ်တထီၣ်ဘးလၢၤဘၣ်. ဘၣ်ဆၣ်, တၢ်မၤအသးဒ်သိးအံၤန့ၣ် ပှၤအီးစတြ့လယၢၣ်ဖိ န့း က့း(ဘ) (Nick Cave) လၢအမ့ၢ် ပှၤဒ့တၢ်အူတၢ်, ပှၤကွဲးလံာ်, ဒီးခွါဂဲၤဒိတဂၤ ဘၣ်လဲၤခီဖျိဝဲနီၢ်နီၢ်န့ၣ်လီၤ. အဖိခွါ အသးအိၣ် ၁၅ နံၣ်တဂၤလီၤတဲာ်လၢ လ့ကဘျၣ်ဖးထီၤဒီးသံဝဲဒၣ် ဖဲ ၂၀၁၅ နံၣ်န့ၣ်လီၤ. စှၤနံၣ်ပူၤကွံာ်ဝံၤ, က့း(ဘ) အဖိခွါ အဒိၣ်ကတၢၢ်တဂၤ သံဝဲဒၣ်စ့ၢ်ကီးလီၤ. တၢ်သူၣ်အုးသးအုးနးနးကလဲာ် ဒ်သိးအံၤအပူၤ, က့း(ဘ) ဒီးအမါ ကအိၣ်မူဝဲဆူညါဒ်လဲၣ်. မ့မ့ၢ်နၤမီၣ်, နကအိၣ်မူနဲဒ်လဲၣ်. တၢ်အိၣ်ဝးတရံး လၢဟီၣ်ခိၣ်ချၢအပူၤန့ၣ် က့း(ဘ) ဂုာ်ကျဲးစၢး ဃုထံၣ်န့ၢ်ဝဲဒၣ်တၢ်ကမၤမုာ်ထီၣ်က့ၤအီၤန့ၣ်လီၤ. အဝဲစံးဝဲဒၣ်, “လၢတၢ်တူၢ်ဘၣ်ခီၣ်ဘၣ်နးနးကျံးကျံးအကတီၢ်ဒၣ်လဲာ်, တၢ်ကအိၣ်ဂၢၢ်ဆိးကျၢၤဆူညါဃံဃံလၤလၤန့ၣ် မ့ၢ်ဟီၣ်ခိၣ်ချၢအံၤ အတၢ်ဒူတၢ်ဃိၤန့ၣ်လီၤ. တၢ်အံၤမ့ၢ် ယတၢ်ထံၣ် ဘၣ်ဃးဒီးဟီၣ်ခိၣ်အဂ့ၢ်န့ၣ်လီၤ. အလီၢ်အိၣ်ဒၣ်ထဲ ပကဘၣ်လဲၤဆူညါ, ဃံဃံလၤလၤ ဒ်ပတၢ်မ့ၢ်တၢ်အသိးန့ၣ်လီၤ.”

ကစၢ်ယ့ၣ်ရှူး စံးကတိၤပာ်ဖျါထီၣ် တၢ်ဃံတၢ်လၤ ဒ်သိးအံၤတကလုာ်, ဒီးထံၣ်ဝဲ တၢ်ဃံတၢ်လၤအတၢ်မ့ၢ်တၢ်နီၢ်နီၢ်န့ၣ် မ့ၢ်ယွၤအတၢ်ဘၣ်တ့န့ၣ်လီၤ. အတၢ်ကတိၤ “တၢ်လၢ ဖီဒ့ၣ်ညါန့ၣ်, မ့ၢ်အဒိၣ်ထီၣ်ဝဲဒ်လဲၣ်ဒ်လဲၣ်န့ၣ်, ကွၢ်ဆိကမိၣ်တက့ၢ်” (လူၤ ၁၂:၂၇) န့ၣ် ဘၣ်တၢ်စူးကါယၢၤထီၣ်အီၤတလီၢ်လီၢ်, ဒီးတၢ်ကတိၤတထံၣ်အံၤ တထုးထီၣ်ကွံာ် တၢ်နးတၢ်ဖှိၣ် အိၣ်ဝဲဒၣ်နီၢ်နီၢ် လၢပတၢ်အိၣ်မူအပူၤန့ၣ်ဘၣ်. နီၢ်နီၢ်န့ၣ်, ကစၢ်ယ့ၣ်ရှူး အတၢ်ကတိၤတထံၣ်အံၤ မ့ၢ်တၢ်မၤလၤကပီၤ ပတၢ်သူၣ်အုးသးအုနးနးကျံးကျံးတဖၣ်, ခီဖျိလၢတၢ်ဟ့ၣ်ကသံၣ်ယါဘျါလၢ တၢ်အိၣ်အသးမၤအသးနီၢ်နီၢ်လၢ အဆူၣ်ဒိၣ်မးတဖၣ်အဂီၢ်န့ၣ်လီၤ. အိၣ်ဆိကတီၢ်, ဒီးကွၢ်ဆိကမိၣ် ဖီဒ့ၣ်ညါတဖၣ်မ့ၢ်ဂ့ၤ, စိးဝၣ်ဃးတဖၣ်မ့ၢ်ဂ့ၤ (:၂၄), (မ့) မုာ်ဟဲထီၣ်အဂ့ၢ်န့ၣ်တက့ၢ်. ကစၢ်ခရံာ် သိၣ်လိပှၤလၢ, “ယွၤမ့ၢ်ဒုးကူဒုးသိး နီၣ်ဧိၤမံၤဧိၤလၢအအံၤတနံၤ အိၣ်လၢတၢ်ပျီပူၤဒီး… ကဒုးကူဒုးသိးသုအါန့ၢ်အန့ၣ်တက့ၢ် ဆံးဒိၣ်လဲၣ်” (:၂၈) န့ၣ်လီၤ.

ဖဲပဘၣ်ကွၢ်ဆၢၣ်မဲာ် တၢ်သူၣ်အုးသးအုး, ဒီးတၢ်လီၤမၢ်အကတီၢ်, လၢဟီၣ်ခိၣ် အတၢ်ထံၣ်တဖၣ်န့ၣ် ပတၢ်နၢ်ပၢၢ်တထီၣ်ဘးဘၣ်. ကစၢ်ယ့ၣ်ရှူး ဟ့ၣ်ဂံၢ်ဟ့ၣ်ဘါပှၤလၢ ပကကွၢ်ဆိကမိၣ် ပတၢ်ဘၣ်တ့ ကစၢ်ယွၤ, လၢအဟံးဃာ်ပၢၤဃာ် အတၢ်ဘၣ်တ့လၢ အတူၢ်ဆၢတၢ်ဒူဒူ, ဒီးကွၢ်ထွဲကဟုကယာ်ပှၤဒိၣ်ဒိၣ်ယိာ်ယိာ်တဂၤန့ၣ်လီၤ.