ကသံၣ်သရၣ်တဂၤ ကူစါယါဘျါ ခဲစၢၣ် ပှၤဆါတဖၣ် လၢအနံၣ်သၢဆံဃၣ်ဃၣ်ဝံၤ အလီၢ်ခံ, အဝဲပာ်လီၤအသးလၢ ကအိၣ်ဘှံးက့ၤလၢ အတၢ်ဖံးတၢ်မၤန့ၣ်လီၤ. အဝဲဒွးက့ၤတၢ်ဒီး ကဒွဲစရီ အခီပနံၣ်တခါ ဒ်သိး ကဃ့ၣ်လီၤဘှါလီၤ အတၢ်ဆါဒၢး အကျိၣ်စ့ အဂ့ၢ်ဝီတဖၣ်န့ၣ်လီၤ. အဝဲဃုထၢလၢ ကပျၢ်ဖျဲးကွံာ် ဒ့ၣ်ကမၢ်စ့ ဒီလၣ် ၆၅၀,၀၀၀ လၢပှၤတဖၣ် ကဘၣ်ဟ့ၣ်အီၤဒံးန့ၣ်လီၤ. လၢတၢ်ထံၣ်လိာ်သံကွၢ်တၢ်အပူၤ, ကသံၣ်သရၣ်အံၤ တဲနၢ်ပၢၢ်တၢ်ဒီးစံး, “ထီဘိန့ၣ် ယသးတမုာ်ဘၣ်လၢ ပှၤဆူးပှၤဆါတဖၣ်န့ၣ် အိၣ်ဒီး တၢ်ကိၢ်တၢ်ဂီၤ တမ့ၢ်ထဲလၢ အနီၢ်ကစၢ် အတၢ်အိၣ်ဆူၣ်အိၣ်ချ့အဂီၢ်ဧိၤဘၣ်, မ့မ့ၢ် အပှၤဟံၣ်ဖိဃီဖိ, ဒီးအတၢ်ဖံးတၢ်မၤ, ဒီးကျိၣ်စ့အဂီၢ်စ့ၢ်ကီးန့ၣ်လီၤ. တၢ်တမံၤအံၤ ဖ့ၣ်ထဲးယသးထီဘိန့ၣ်လီၤ”.
ပမ့ၢ်တတုၤလၢ ကျိၣ်စ့ဒ့ၣ်ကမၣ်ယိာ်အပူၤ နီတဘျီဘၣ်ဒၣ်လဲာ်န့ၣ်, လၢသူၣ်ဂ့ၢ်သးကျိၤန့ၣ် ပဝဲကိးဂၤဒဲး ပလဲၤခီဖျိဘၣ်တၢ်လၢ အလီၤဂာ်ဒီး တၢ်တမံၤအံၤန့ၣ်လီၤ. လံာ်စီဆှံဒုးလီၤဂာ် တၢ်ဒဲးဘး ဒီး “ဒ့ၣ်ကမၣ်န့ၣ်လီၤ” (မး ၆:၁၂). လံာ်စီဆှံ စံးစ့ၢ်ကီးလၢ ကျဲတအိၣ်နီတဘိလၢ ပကဟ့ၣ်ဆၢက့ၤ တၢ်လၢ ပကဘၣ်ဟ့ၣ်က့ၤယွၤ အဂီၢ်ဘၣ်. ဒ်သိး ပကကျၢၢ်ဘၢတၢ်လၢ ပကဘၣ်ဟ့ၣ်က့ၤတၢ်အဂီၢ်, ပမၤဘူၣ်မၤတီၢ်တၢ်ဆူ တၢ်မၤဂ့ၤမၤစၢၤတၢ် မ့ၢ်ဂ့ၤ, ပမၤတၢ်ခ့တၢ်ပှၤအတၢ်မၤလၢ ပှၤဂၤအဂီၢ်မ့ၢ်ဂ့ၤ, ပမၤတၢ်အၢၣ်လီၤဒီး ယွၤမ့ၢ်ဂ့ၤ တသ့ဘၣ်. ပတၢ်မုၢ်လၢ်ထဲတမံၤဧိၤန့ၣ် မ့ၢ်ကစၢ်ယ့ၣ်ရှူးန့ၣ်လီၤ. ခီဖျိ အတၢ်သံဒီး အတၢ်ဂဲၤဆၢထၢၣ်သမူထီၣ်က့ၤန့ၣ်, ခရံာ် “တြူာ်ကွံာ် တၢ်ကွဲးနီၣ်ကွဲးဃါဘၣ်ဃး ပဒ့ၣ်ကမၣ်ခဲလၢာ်ဃုာ်ဒီး တၢ်သိၣ်တၢ်သီလၢ အစၢဃာ်တၢ်တဖၣ် လၢာ်လၢာ်ဆ့ဆ့ ခီဖျိ အပျၤထီကွံာ်ဝဲလၢ ထူၣ်စုညါအလိၤန့ၣ်လီၤ” (ကလီ: ၂:၁၄ – ခ့ခါ).
တၢ်တူၢ်လိာ် ကစၢ်ယ့ၣ်ရှူး အတၢ်ဟ့ၣ်လီၤသးလၢ ပတၢ်ကမၣ်တဖၣ်အဂီၢ် အခီပညီ မ့ၢ်ဝဲ တၢ်ပၢၢ်ထီၣ်ဆူ မုၢ်နံၤအသီတနံၤ လၢတၢ်ပူၤဖျဲးလၢာ်လၢာ်ဆ့ဆ့ လၢ တၢ်ဒဲးဘးအတၢ်ဝံတၢ်ယိးန့ၣ်လီၤ. မ်ယွၤအတၢ်သးကညီၤ ဒီးအတၢ်ပျၢ်တၢ်ဒဲးဘးန့ၣ် ကကပီၤဝဲဆူ ဟီၣ်ခိၣ်ချၢ, ဒီး မၤစၢၤပှၤဒ်သိး ပကရ့လိာ်ဘၣ်ထွဲဒီး ပှၤကညီတဖၣ်ဒီး တၢ်အိၣ်မူအတၢ်အိၣ်အသးတဖၣ်လၢ တၢ်အဲၣ်တၢ်ကွံအပူၤတက့ၢ်.
