တၢ်နုာ်လီၤကွၢ် တၢ်ကွဲးပာ်ဖျါ တၢ်ထံၣ်တၢ်ဆိကမိၣ်တဖၣ် ဘၣ်ဃးဒီးအီၣ်လဲ (online) တၢ်ကစီၣ်တဖၣ်အဂ့ၢ်န့ၣ် မ့ၢ်တၢ်လၢအလီၤဘၣ်ယိၣ်တမံၤန့ၣ်လီၤ. တၢ်ဘၣ်ယိၣ်အလီၢ်အိၣ်ဝဲဘၣ်ဆၣ်, မ့ၢ်တၢ်လၢအလီၤသးစဲဒိၣ်မးန့ၣ်လီၤ. တၢ်ထံၣ် သံကွၢ်စံးဆၢ အတၢ်ရဲၣ်တၢ်ကျဲၤတထံၣ်အပူၤန့ၣ် ပှၤထူးပှၤတီၤလၢ ဂုာ်ကျဲးစၢးအိၣ်မူအိၣ်ဂဲၤလီၤထူလီၤယိာ်လၢဟီၣ်ခိၣ်ချၢတဂၤ အဂ့ၢ်အကျိၤန့ၣ် ပှၤတဂၤ ကွဲးပာ်ဖျါ တၢ်ထံၣ်တၢ်ဆိကမိၣ် လၢအမ့ၢ် “ဖဲဒၣ်ပှၤလၢတၢ်မိၣ် အုၣ်က့ၤခီၣ်က့ၤတၢ်တဂၤဂၤန့ၣ် ကမၤဟါမၢ်ကွံာ်ဝဲလီၤ. ဒီးဖဲဒၣ်ပှၤလၢအဒုးဟါမၢ်အသးလၢယဃိတဂၤဂၤန့ၣ်, ကထံၣ်န့ၢ်က့ၤအီၤ- ကစၢ်ယ့ၣ်ရှူး စံးဝဲ” န့ၣ်လီၤ. လၢတၢ်စံးဆၢ တၢ်ကွဲးပာ်ဖျါတမံၤအံၤအဂီၢ်န့ၣ်, ပှၤတဂၤကွဲးဝဲဒၣ် “တၢ်ကွဲးပာ်ဖျါ ယ့ၣ်ရှူးအဂ့ၢ်န့ၣ် မ့ၢ်လံာ်အိၣ်ဝဲတဘ့ၣ်ဘ့ၣ်ဧါ,” ဒီးပှၤသၢဂၤတဂၤ နုာ်လီၤကွဲးပာ်ဖျါဝဲလၢ “လံာ်တဖၣ်န့ၣ်အိၣ်ဝဲ, ဒီးမ့ၢ်တၢ်တဲမုာ်နၢ်တဖၣ်” န့ၣ်လီၤ.

ပှၤလၢအစံးကတိၤဒုၣ်ဒွဲၣ် တၢ်စူၢ်က့ၤနာ်က့ၤ ကစၢ်ယ့ၣ်ရှူးအဂ့ၢ်န့ၣ် ကအိၣ်ဝဲဒၣ်ထီဘိန့ၣ်လီၤ. ဖဲစီၤပီလူး စံးကတိၤလီၤ ကစၢ်ခရံာ် အဂ့ၢ်ဆူ ပှၤအၤသ့ၣ်ဖိ အပှၤဂီၢ်မုၢ်တဖၣ်အအိၣ်န့ၣ်ဒီး, တၢ်အစဲတဖၣ် ဟဲထီၣ်ဝဲ အကလုာ်ကလုာ် န့ၣ်လီၤ. မၤ ၁၇:၃၂ ပာ်ဖျါဝဲလၢ “ဒီးတုၤအနၢ်ဟူ ပှၤဂဲၤဆၢၣ်က့ၤလၢ တၢ်သံအဂ့ၢ်ဒီး, ပှၤတနီၤနီၤဒုၣ်ဒွဲၣ်တၢ်” န့ၣ်လီၤ. ဘၣ်ဆၣ်, ပှၤတနီၤနီၤစံးဝဲဒၣ် “တၢ်န့ၣ်တဖၣ်အဂ့ၢ်အကျိၤ ပကနၢ်ဟူကဒီးလၢနၤ” န့ၣ်လီၤ. ဒီးပှၤတနီၤနီၤန့ၣ် “ဘျုးအသးဒီးအီၤ, ဒီးစူၢ်က့ၤနာ်က့ၤဝဲ ကစၢ်ယ့ၣ်ရှူး” န့ၣ်လီၤ.

ပှၤဟီၣ်ခိၣ်ဖိတဖၣ် အတၢ်ထံၣ်စံးဆၢ လံာ်စီဆှံအတၢ်မ့ၢ်တၢ်တီအဂ့ၢ်န့ၣ်, မ့ၢ်တၢ်ဂ့ၢ်ဘၣ်ဃးဒီးကစၢ်ယွၤဒီးအဝဲသ့ၣ်အဘၣ်စၢၤန့ၣ်လီၤ. ဘၣ်ဆၣ်, တၢ်ဘိးဘၣ်ဒုးသ့ၣ်ညါလၢ ပကအိၣ်မူအိၣ်ဂဲၤလီၤထူလီၤဃိာ်လၢ ဟီၣ်ခိၣ်ချၢစံးတၢ်န့ၣ် မ့ၢ်တၢ်တဲမုာ်နၢ်အပူတယုၢ်န့ၣ်လီၤ. ပနီၢ်ခိနီၢ်ကစၢ်တဖၣ်န့ၣ် ဘၣ်တၢ်တိာ်ပာ်အီၤလၢ ကဘၣ်သံဝဲဒၣ်န့ၣ်လီၤ. တၢ်လၢအတဒ်သိးလိာ်န့ၣ် လံာ်စီဆှံ စံးဘၣ်ပှၤလၢ ပှၤတဂၤအဂ့ၢ်, လၢအမ့ၢ် “ကျဲ, တၢ်မ့ၢ်တၢ်တီ, ဒီးတၢ်မူ” (ယိၤ ၁၄:၆) န့ၣ်လီၤ. ဒ်စီၤပီလူးအသိး, ကယဲၢ်ပှၤတဂၤလၢ်လၢ် လၢအဒိကနၣ်တၢ်တဖၣ်အဂီၢ်, ပကဘၣ်ဟ့ၣ်ခီနီၤလီၤ ကစၢ်တဂၤ လၢအမၤတ့ၢ်တၢ်လၢပဂီၢ်အဂ့ၢ်န့ၣ် မ့ၢ်ဝဲဒၣ် ပမူဒါန့ၣ်လီၤ.