ဖံဒရိၣ် (Pedro) ကဲထီၣ်ဝဲဒၣ် ကစၢ်ခရံာ်အပျဲၢ်အဘီၣ် ဖဲအသးအိၣ် အနံၣ်ယဲၢ်ဆံန့ၣ်လီၤ. အဝဲမ့ၢ်တ့ၢ်ဝဲ ပှၤလၢအသးဒိၣ်ညီ, သးအိၣ်မၤကၣ်က့ၤတၢ်တဂၤ, ဒီးပှၤအိၣ်ဆိးလၢအခိၣ်အဃၢၤတဖၣ်န့ၣ် မၤဘၣ်ဒိဆါဝဲဒၣ်န့ၣ်လီၤ. ဒ်အဝဲဒိးန့ၢ်ဘၣ် တၢ်စံးကတိၤသကိး ဟ့ၣ်ကူၣ်တၢ်လၢ အတၢ်အိၣ်ဖှိၣ်န့ၣ်ဒီး, လၢအပူၤကွံာ်အတၢ်အိၣ်မူအိၣ်ဂဲၤအဂီၢ်, အဝဲပီၢ်ယၢ်လီၤက့ၤအသး, ဒီးစံးဝဲဒၣ်လၢ “ခဲကနံၣ်အံၤ, ယမုၢ်နံၤမုၢ်သီ လၢအအိၣ်လီၤတဲာ်တဖၣ်န့ၣ် စှၤန့ၢ်ဒံးတၢ်လၢယလဲၤပူၤကွံာ်ဝဲတဖၣ်န့ၣ်လီၤ. ယအဲၣ်ဒိးအိၣ်မူအီၤဂ့ၤဂ့ၤ ဘၣ်ဆၣ်, ယကဘၣ်အိၣ်မူအိၣ်ဂဲၤယဲဒ်လဲၣ်” န့ၣ်လီၤ.
ဖဲထူထံးစၢၤသွဲၣ်ဂ့ၢ်ဝီတၢ်ကွဲးတမံၤအပူၤန့ၣ် ဖံဒရိၣ် ဃုထံၣ်န့ၢ် အတၢ်စံးဆၢလၢအဂီၢ်န့ၣ်လီၤ. ဖဲအဝဲဖးဘၣ် စီၤအၤဒၣ် အဟံၣ်ဖိဃီဖိ တၢ်လီၤစၢၤအဂ့ၢ်အကျိၤလၢစီၤမိၤရှ့အတၢ်ကွဲးနီၣ်အပူၤန့ၣ်ဒီး, ပာ်သူၣ်ပာ်သးဝဲ လံာ်တကျိၤလၢ အပာ်ဖျါထီၣ်က့ၤ စီၤအၤဒၣ်အစၢၤအသွဲၣ်တဖၣ် “[ပှၤကညီအမံၤ], အမုၢ်နံၤခဲလၢာ် [သးအနံၣ် နီၣ်ဂံၢ်], ဒီးသံဝဲ” န့ၣ်လီၤ (ကွၢ် ၁ မိၤ ၅:၈, ၁၁, ၁၄, ၁၇, ၂၀, ၂၇, ၃၁). ဘၣ်ဆၣ်, မ့မ့ၢ်ပှၤတဂၤန့ၣ် ဘၣ်တၢ်ပာ်ဖျါထီၣ်အီၤ လီၤလီၤဆီဆီန့ၣ်လီၤ.
လံာ်စီဆှံ ပာ်ဖျါထီၣ် စီၤဃနိာ် ဒ်အမ့ၢ် ပှၤ “လဲၤတၢ်ဒီးယွၤ” တဂၤ (:၂၂,၂၄) န့ၣ်လီၤ. အဝဲရ့လိာ်အသးဒီးကစၢ်ယွၤဘူးဘူးတံၢ်တံၢ်, ဒီးတၢ်အံၤမ့ၢ် အတၢ်အိၣ်မူလဲၤခီဖျိဝဲဒၣ်လၢဟီၣ်ခိၣ်ချၢန့ၣ်လီၤ. မ့ၢ်လၢ စီၤဃနိာ် အတၢ်နာ်အဃိ, “တၢ်အုၣ်အသးလၢ ယွၤဘၣ်အသးလၢအီၤ” (ဧ့ၤ ၁၁:၅) န့ၣ်လီၤ. ကစၢ်ယွၤ မ့ၢ်မတၤတဂၤလဲၣ်, ဒီးပှၤလၢအဃုထံၣ်န့ၢ်အီၤတဖၣ်အဂီၢ်, ကစၢ်ယွၤ ကမၤတၢ်မနုၤလဲၣ်န့ၣ် စီၤဃနိာ် အိၣ်ဒီးတၢ်နာ်သန့ၤယွၤဂၢၢ်ဂၢၢ်ကျၢၤကျၢၤ (:၆) န့ၣ်လီၤ. ခီဖျိလၢတၢ်အိၣ်မူထွဲအတၢ်နာ်, ဒီးတၢ်ဒိကနၣ်ကစၢ်ယွၤအကလုၢ်အပူၤန့ၣ်, အဝဲပာ်ဖျါထီၣ်အတၢ်နာ်ယွၤန့ၣ်လီၤ. မ့ၢ်လၢအတၢ်စူၢ်တၢ်နာ်ဒ်သိးအံၤအဃိ, ကစၢ်ယွၤ ပျဲပူၤကွံာ်အီၤလၢ နီၢ်ခိတၢ်သံတၢ်ပှၢ် (:၅) န့ၣ်လီၤ.
ဖံဒရိၣ် သံကွၢ်ဝဲ, “မ့ၢ်ယကအိၣ်မူလဲၤခီဖျိ ယမုၢ်နံၤမုၢ်သီတဖၣ်ဂ့ၤဂ့ၤဘၣ်ဘၣ် ကသ့ဝဲဒ်လဲၣ်” န့ၣ်လီၤ. ခီဖျိလၢ “တၢ်အိၣ်မူအိၣ်ဂဲၤတီတီလိၤလိၤဒီးယွၤ” န့ၣ်လီၤ.
ပတၢ်အိၣ်မူလၢဟီၣ်ခိၣ်ချၢန့ၣ် တမ့ၢ်လၢပကဘၣ်မၤလၢာ်ဝဲဒၣ် ထဲလၢနံၣ်လါမုၢ်နံၤမုၢ်သီအနီၣ်ဂံၢ်တဖၣ်ဧိၤန့ၣ်ဘၣ်. ပတၢ်စူၢ်တၢ်နာ်လၢ အပျဲယွၤ ကမၤတၢ်ကျိၤကျဲလၢပဂံၢ်ဒွးထီၣ်တန့ၢ်တသ့တဖၣ်အပူၤန့ၣ် ပမၤလၢာ်ပတၢ်အိၣ်မူ သ့ဝဲဒၣ်န့ၣ်လီၤ.