ဘီမဲရံၣ် ဖလဲနရံၣ် အိၣ်ခီနၢၣ် (Born Mary Flannery O’Connor), မ့ၢ်ပှၤကွဲးလံာ် အမံၤဟူသၣ်ဖျါတဖၣ်အကျါတဂၤလၢ ကီၢ်အမဲရကၤ ကလံၤထံးကပၤ, ဒီးအါတက့ၢ်န့ၣ် ပှၤသ့ၣ်ညါအီၤလၢ ဖလဲနရံၣ် အိၣ်ခီနၢၣ်န့ၣ်လီၤ. အတၢ်ကွဲးပူတဖၣ်အပူၤန့ၣ် အိၣ်ပှဲၤဝဲဒီးတၢ်နးတၢ်ဖှီၣ်, ဒီးယွၤအဘျုးအဖှိၣ်အဂ့ၢ်န့ၣ်လီၤ. ခီဖျိလၢဖံးဘ့ၣ် (lupus) တၢ်ဆါအဃိ, ဖဲအသးအိၣ်ဝဲတဆံယဲၢ်နံၣ်န့ၣ် အပၢ်တဂၤသံလဲၤပူၤကွံာ်ဟီၣ်ခိၣ်န့ၣ်လီၤ. ဖဲန့ၣ်, အိၣ်ခီနၢၣ်, ပိာ်မုၣ်သးစၢ်ဖိလၢ အသူၣ်လီၤဘှံးသးလီၤဘှါတဂၤအံၤ ဘျုးလီၤအသးလၢာ်လၢာ်ဆ့ဆ့လၢ အတၢ်ကွဲးပူဖးထီ အဆိကတၢၢ်တယုၢ်န့ၣ်လီၤ. တယံာ်ဘၣ်န့ၣ်, အဝဲဘၣ်ကူစါယါဘျါအသးလၢ ဖံးဘ့ၣ်တၢ်ဆါ, လၢပှၤကူဆါတန့ၢ်, ဒီးဖဲအသးအိၣ် သၢဆံခွံ နံၣ်န့ၣ် တၢ်ဆူးတၢ်ဆါအံၤ ဟံးထီၣ်ကွံာ်အသးသမူန့ၣ်လီၤ. အိၣ်ခီနၢၣ် အတၢ်ကွဲးတဖၣ် ဒုးနဲၣ်ဖျါထီၣ် အတၢ်တူၢ်ဘၣ်ခီၣ်ဘၣ် အနီၢ်ခိနီၢ်သးအဂ့ၢ်န့ၣ်လီၤ. ပှၤကွဲးပူဖးထီ အဲလ့း(စ) မဲးဒၢမီး (Alice McDermott) စံးဝဲဒၣ်, “ယဆိကမိၣ်လၢ တၢ်ဆူးတၢ်ဆါတမံၤအံၤအဃိ, အဝဲကဲထီၣ် ပှၤကွဲးလံာ်ဖိလၢ အမံၤဟူသၣ်ဖျါတဂၤ” န့ၣ်လီၤ.

၂ ကရံၣ် ၁၂:၇ အပူၤန့ၣ် စီၤပီလူး ပာ်ဖျါထီၣ်ဝဲ “တၤဆှုၣ်” အဂ့ၢ်န့ၣ် ပှၤအါဂၤ ဟ့ၣ်ထီၣ် တၢ်ထံၣ်ဆိကမိၣ်တဖၣ်ဘၣ်ဆၣ်, ပတသ့ၣ်ညါအဂ့ၢ်လီၤတံၢ်လီၤဆဲးန့ၣ်ဘၣ်. တၢ်လၢပသ့ၣ်ညါဝဲန့ၣ် စီၤပီလူး စံးဝဲဒၣ်, “လၢတၢ်န့ၣ်အဂ့ၢ်, ဒ်သိးအကဟးဖးဒီးယၤဒီး, ယဃ့ကညးကစၢ်သၢစု” (:၈) န့ၣ်လီၤ. ကစၢ်ယွၤ တစံးဆၢဝဲ အတၢ်ထုကဖၣ် (:၉) န့ၣ် ပသ့ၣ်ညါစ့ၢ်ကီးန့ၣ်လီၤ. တၢ်ဂ့ၢ်အံၤ ဒုးကဲထီၣ် စီၤပီလူး ဒ်သိးအကဆီၣ်လီၤအသးအဂီၢ်န့ၣ်လီၤ. စီၤပီလူး ပာ်ဖျါထီၣ်ဝဲလၢ “ဒ်သိးယသုတပာ်ထီၣ်ထီအသးဒိၣ်ကဲၣ်ဆိးတဂ့ၤ” (:၇) အဂီၢ်, တၤဆှုၣ်အံၤ ပၢၤဃာ်အီၤန့ၣ်လီၤ. စီၤပီလူး အတၤဆှုၣ်အံၤ ဒုးကဲထီၣ်အီၤလၢ ဒ်ပှၤတၢ်မၢဖိ အတၢ်မ့ၢ်တၢ်တဂၤအသိးန့ၣ်လီၤ. ဘၣ်ဆၣ်, စီၤပီလူး ဒိးန့ၢ်ဝဲဒၣ်န့ၣ် တမ့ၢ်ထဲတၤဆှုၣ်ဧိၤဘၣ်, ကစၢ်ယွၤ အဘျုးအဖှိၣ်လၢလၢလီၢ်လီၢ်, ဒီးအတၢ်စိတၢ်ကမီၤအလၢအပှဲၤန့ၣ် ပိာ်ထွဲထီၣ်အခံအဃိ, ပှၤတၢ်မၢဖိလၢ အဘၣ်နးဘၣ်ဖှီၣ်တဂၤ ပာ်ဖျါထီၣ်သ့ဝဲဒၣ်လၢ, “တုၤယဂံၢ်စၢ်ယဘါစၢ်ဒီး, ယအိၣ်ဒီးယစိယကမီၤ” (:၁၀) န့ၣ်လီၤ.

လၢပတၢ်အိၣ်မူအပူၤ, တၤဆှုၣ်တဖၣ် ကမ့ၢ်ဝဲဒ်လဲၣ်ဂ့ၤဒ်လဲၣ်ဂ့ၤန့ၣ်, တ့ပှၤဘှီပှၤ ဒီးဒုးကဲထီၣ်ပှၤ ဒ်ပတၢ်မ့ၢ်တၢ်အသိးန့ၣ်လီၤ. ဘၣ်ဆၣ်, တမ့ၢ်ဝဲဒၣ်ထဲတၤဆှုၣ်တဖၣ် ဧိၤဘၣ်. ဒ်စီၤပီလူးဒီးဖလဲနရံၣ် အိၣ်ခီနၢၣ်အသိး, ဒီးလၢပှၤကညီအတၢ်စံၣ်စိၤတဲစိၤအပူၤန့ၣ်, မ့ၢ်လၢပှၤအုၣ်အသးတဖၣ် အိၣ်တ့ၢ်လံအါမးအဃိ, ဒီးကစၢ်ယွၤ အဘျုးအဖှိၣ် အိၣ်လၢအိၣ်ပှဲၤဝဲဒၣ်လၢပဝဲကိးဂၤဒဲးအဂီၢ်န့ၣ်လီၤ.