ဖဲလါမ့ၤ ၂၉ သီ, ၁၉၂၅ နံၣ်န့ၣ်, ဖၢစံၣ် ဖီဆဲး (Percy Fawcett) တဂၤ တချုးလဲၤဃုထံၣ်န့ၢ်တၢ်အသီလၢ ဘရၣ်စ့(လ) (Brazil) အပှၢ်မုၢ်ကနၢအဒိၣ်အယိာ်တဖၣ်အပူၤအကတီၢ်န့ၣ်, ကွဲးဆှၢဝဲဒၣ် လံာ်ပရၢလၢခံကတၢၢ်တဘ့ၣ်ဆူအမါအအိၣ်န့ၣ်လီၤ. ဒ်သိးကမ့ၢ်ပှၤအဆိကတၢၢ်တဂၤလၢ အနီၤဟ့ၣ်ခီ ဝ့ၢ်လၢအလီၤကမၢကမၣ်, ဒီးလီၤမၢ်တ့ၢ်လံလၢပျၢၤတဖျၢၣ်အံၤအဂ့ၢ်ဆူ ဟီၣ်ခိၣ်ဒီတဘ့ၣ်အဂီၢ်, ပာ်လီၤအသး, ဒီးလဲၤကွၢ်ဃုဝဲဒၣ်အါနံၣ်အါလါန့ၣ်လီၤ. ဘၣ်ဆၣ်, ပှၤလူၤဃုထံၣ်တၢ်အကရူၢ်တဖုအံၤ လီၤမၢ်ကွံာ်ဝဲ, ဒီး တၢ်တဃုထံၣ်န့ၢ် ဝ့ၢ်တဖျၢၣ်အံၤဘၣ်န့ၣ်လီၤ. တကးဒ်ဘၣ်န့ၣ်, ပှၤလဲၤဃုထံၣ်က့ၤ အဝဲသ့ၣ်တလီၢ်လီၢ်ဘၣ်ဆၣ်, ပှၤတထံၣ်က့ၤအဝဲသ့ၣ်နီတဂၤဘၣ်န့ၣ်လီၤ.
ဖၢစံၣ် အတၢ်သူၣ်ဒူသးဒူ, ဒီးအတၢ်သူၣ်ဆူၣ်သးဂဲၤအံၤ မ့ၢ်တၢ်လၢအလီၤစံးပတြၢၤဘၣ်ဆၣ်, စူးကါမၤလၢာ်ဂီၤကလီဝဲဒၣ် ခီဖျိတၢ်လူၤကွၢ်ဃု ဝ့ၢ်လီၤမၢ်တဖျၢၣ်လၢ ပှၤဃုထံၣ်တန့ၢ်တသ့နီတစုဘၣ်န့ၣ်လီၤ. ပတၢ်အိၣ်မူအပူၤ တၢ်ပညိၣ်လၢပမၤလၢပှဲၤအီၤတသ့တန့ၢ်, လၢအဒိၣ်စိလုၣ်ဘၢပှၤတဖၣ် အိၣ်ဝဲအါမးလီၤန့ၣ်, ပကဘၣ်အၢၣ်လီၤပသးတီတီလိၤလိၤန့ၣ်လီၤ. ဘၣ်ဆၣ်, လၢပှၤတဂၤစုာ်စုာ်အဂီၢ် တၢ်လုၢ်ဒိၣ်ပှ့ၤဒိၣ်နီၢ်နီၢ် လၢပကြၢးလူၤဃုထံၣ်န့ၢ်အီၤ လၢသူၣ်လၢသး, လၢပသးပတၢ်သ့ၣ်ညါ, ဒီးပဂံၢ်ပဘါခဲလၢာ်န့ၣ် အိၣ်ဝဲဒၣ်န့ၣ်လီၤ.
စီၤပီလူး ကွဲးဆှၢလီၤဝဲဆူ ပှၤဖံလံးပံၤဖိလၢ အစူၢ်က့ၤနာ်က့ၤတၢ်တဖၣ်အဂီၢ်, လံာ်ပရၢ တဘ့ၣ်အပူၤန့ၣ်, စံးဝဲဒၣ် “ယပာ်တၢ်ခဲလၢာ်ဒ်အမ့ၢ် တၢ်လီၤမၢ်ကွံာ်လၢယဂီၢ်လၢာ်လၢာ် ဆ့ဆ့လၢ တၢ်လၢအလုၢ်အပှ့ၤဒိၣ်န့ၢ်အန့ၣ်တက့ၢ်လၢအမ့ၢ်ဝဲ တၢ်သ့ၣ်ညါယကစၢ်ယ့ၣ်ၡူးခရံာ်အဃိန့ၣ်လီၤ” (ဖံး ၃:၈). တမ့ၢ်ဝဲဒၣ် ဒ်လၢပျၢၤ ဝ့ၢ်တဖျၢၣ်အသိး, လၢအကဟဲစိာ်န့ၢ် တၢ်ထူးတၢ်တီၤ, တၢ်မံၤဟူထီၣ်သါလီၤ, (မ့) တၢ်စိတၢ်ကမီၤန့ၣ်ဘၣ်. တၢ်သ့ၣ်ညါ ကစၢ်ယ့ၣ်ရှူး, ဒီးတၢ်စူၢ်က့ၤနာ်က့ၤအီၤန့ၣ် မ့ၢ်တၢ်လုၢ်ဒိၣ်ပှ့ၤဒိၣ်, လၢပထိၣ်သတြီၤအီၤတန့ၢ်တသ့ဘၣ်တမံၤန့ၣ်လီၤ. ဟီၣ်ခိၣ်အတၢ်ပညိၣ်တဖၣ် လၢအမ့ၢ် တၢ်စိတၢ်ကမီၤ, (မ့) တၢ်အလီၢ်အလၤ, (မ့) တၢ်ပာ်ဖျါထီၣ် တၢ်အိၣ်မူအတီအလိၤ, ခီဖျိလၢတၢ်လူၤပိာ်ထွဲတၢ်သိၣ်တၢ်သီ ဒၣ်လဲာ်, ပမ့ၢ်ထိၣ်သတြီၤလၢ တၢ်သ့ၣ်ညါကစၢ်ယ့ၣ်ရှူးန့ၣ် တမ့ၢ်တၢ်နီတမံၤလၢၤဘၣ် (:၆-၇) န့ၣ်လီၤ. တၢ်လၢအကမၤမံ ပသူၣ်ပသး တသ့ဝဲဒၣ်နီတစုဘၣ်တမံၤမံၤအပူၤန့ၣ် မ့ၢ်ပစူးကါဘၣ် ပတၢ်ဆၢကတီၢ်, ဒီးပဂံၢ်ပဘါတဖၣ်န့ၣ်ဧါ. ဒ်သိးပကကွၢ်ထံမၤလီၤတံၢ် “ဝ့ၢ်” လၢပလူၤဃုထံၣ်န့ၢ်အီၤအဂီၢ်, မ်ကစၢ်ခရံာ် ကမၤစၢၤပှၤန့ၣ်တက့ၢ်.