ဖဲယသးစၢ်ဒံးအကတီၢ်, ဒ်သိးယကမၤဝံၤဆှၢထီၣ် ယတၢ်ကွဲးတဖၣ် ဘၣ်ဆၢဘၣ်ကတီၢ်အဂီၢ်, တၢ်ဃ့သကွံၢ်ကညး ကစၢ်ယွၤ အတၢ်မၤစၢၤန့ၣ် ယဆိကမိၣ်လၢ တကြၢးတဘၣ် ဝဲဒၣ်ဘၣ်န့ၣ်လီၤ. ဟံၣ်ဖိဃီဖိ အတၢ်ကီတၢ်ခဲတဖၣ်, တၢ်အိၣ်ဆူၣ်အိၣ်ချ့ အတၢ်ဂ့ၢ်ကီတဖၣ်, လၢတၢ်ဖံးတၢ်မၤန့ၣ် တၢ်ဘၣ်လိာ်ဘၣ်စးတအိၣ်, ကျိၣ်စ့ အတၢ်လိၣ်တဖၣ်အိၣ်ဝဲ, ဒီးယဘၣ်ကွၢ်ဆၢၣ်မဲာ်ယဲစ့ၢ်ကီး တၢ်လိၣ်ဒ်သိးအံၤတဖၣ်ဒၣ်လဲာ်, ယစံးလီၤယသးလၢ “ပှၤဂုၤပှၤဂၤ အတၢ်လိၣ်တဖၣ်န့ၣ် ဒိၣ်န့ၢ်အါန့ၢ်ဒံး ယတၢ်လိၣ်တဖၣ်” န့ၣ်လီၤ. ဘၣ်ဆၣ်, ယကမၤဝံၤ ယတၢ်ကွဲးလံာ်ဘၣ်ဆၢဘၣ်ကတီၢ်အဂီၢ်, ယကဘၣ်လဲၤစိာ်ဆူ ယွၤအအိၣ်န့ၣ် ကမ့ၢ်တၢ်ဂ့ၢ်အဆံးဖိန့ၣ်လီၤ. နာ်သက့, ဖဲယထံၣ်ဘၣ် တၢ်အဒိအတဲာ်တဖၣ် လၢလံာ်စီဆှံအပူၤ, ဘၣ်ဃးဒီး အပှၤဂီၢ်မုၢ်တဖၣ် ဘၣ်ကွၢ်ဆၢၣ်မဲာ် တၢ်ဂ့ၢ်ကီမ့ၢ်ဂ့ၤညီမ့ၢ်ဂ့ၤ, ကစၢ်ယွၤ မၤစၢၤဝဲဒၣ်အဂ့ၢ်န့ၣ်ဒီး, ယဆီတလဲ ယတၢ်ထံၣ်န့ၣ်လီၤ.

တၢ်တဲဖိတယုၢ် ပာ်ဖျါဝဲလၢ ဒုၣ်ဒါ ပှၤဖလ့ရှသးဖိတဖၣ် ဟဲဒုး ပှၤအံၣ်စရ့လးဖိတဖၣ်, ဖဲ မံးစပၤ (Mizpah) အဃိ, ပျံၤတၢ်ဖုးတၢ်န့ၣ်လီၤ. ပှၤအံၣ်စရ့လးဖိတဖၣ် တဲဘၣ် စီၤရှမူၤအ့လးလၢ “ဆိတ့ၢ်လၢ နကကိးထီၣ်ယွၤ ပကစၢ်လၢပဂီၢ်, ဒီးဒ်သိး အကအုၣ်က့ၤခီၣ်က့ၤပှၤလၢ ပှၤဖလ့ရှသးဖိအစုပူၤန့ၣ်တဂ့ၤ” (၁ ရှမူၤ ၇:၈) န့ၣ်လီၤ. လၢတၢ်န့ၣ်အဃိ, စီၤရှမူၤအ့လး ဟံးန့ၢ်သိဖိ, လုၢ်ဝဲလၢတၢ်လုၢ်မ့ၣ်အူဒီဒုလၢ ယွၤအဂီၢ်, ဒီးကိးထီၣ်ယွၤလၢ အံၣ်စရ့လးအဂီၢ်, ဒီး “ယွၤဒိကနၣ်အကလုၢ်” (:၉) န့ၣ်လီၤ.

“ဒီးစီၤရှမူၤအ့လး လုၢ်တၢ်လုၢ်မ့ၣ်အူအဖၢမုၢ်ဒီး, တၢ်မၤအသးလၢ ပှၤဖလ့ရှသးဖိသုးဘူးအသး, ဒ်သိးအကဒုးတၢ်ဒီးအံၣ်စရ့လးလီၤ. ဒီးတၢ်လၢမုၢ်တနံၤန့ၣ် ယွၤမၢလီသီၣ်လၢတၢ်သီၣ်ဖးဒိၣ် လၢပှၤဖလ့ရှသးဖိအလိၤ, ဒီးမၤဃၣ်အီၤ, ဒီးအဝဲသ့ၣ် ဘၣ်တၢ်ကျီကွံာ်ဝဲလၢအံၣ်စရ့လးဖိအမဲာ်ညါ” (:၁၀) န့ၣ်လီၤ.

လၢခံန့ၣ်ဒီး, “စီၤရှမူၤအ့လး ဟံးန့ၢ်လၢၢ်တဖျၢၣ်, ဒီးပာ်ဝဲလၢမံးစပၤဒီးရှၢၣ် အဘၢၣ်စၢၤ, ဒီးယုၢ်ဝဲအမံၤလၢ အ့ဘ့ၣ်န့စၢ်, ဒီးစံးဝဲဒၣ်, ယွၤမၤစၢၤပှၤတုၤခဲကနံၣ်အံၤ” (:၁၂) န့ၣ်လီၤ. စီၤရှမူၤအ့လး ပာ်လီၤလၢၢ်, လၢတၢ်သ့ၣ်နီၣ် ကစၢ်ယွၤအတၢ်မၤစၢၤ အပှၤဂီၢ်မုၢ်န့ၣ်လီၤ. အ့ဘ့ၣ်န့စၢ် အခီပညီ မ့ၢ်ဝဲဒၣ် “တၢ်မၤစၢၤအလၢၢ်” န့ၣ်လီၤ.

လၢတၢ်မၤစၢၤအဂီၢ်, တၢ်ဃ့သကွံၢ်သညး ကစၢ်ယွၤန့ၣ် ကြၢးဝဲဘၣ်ဝဲထီဘိ န့ၣ်လီၤ. မ်ပကကိးထီၣ် ကစၢ်ယွၤလၢမုၢ်တနံၤအံၤန့ၣ်တက့ၢ်.