တၢ်ဆၢကတီၢ် ဃိးမံးနံးန့ၣ် ဆီတလဲ ပှၤတဂၤအတၢ်အိၣ်မူ ကသ့ဝဲဒၣ်ဧါ. ဟီၣ်ခိၣ်လၢ တၢ်ဘျးစဲရ့လိာ်သးတဖၣ် လၢအိၣ်ဒီးအခီပညီန့ၣ် ဆံးဝဲစှၤဝဲအပူၤန့ၣ်, ပှၤကွဲးလံာ် ကၠဲ(န)စံ ဒူ (Jancee Dunn) ဆှၢနုာ်လီၤ တၢ်စံးကတိၤ ကွဲၤဒီနၢ် ထဲဒၣ် ဃိးမံးနံးဖိ အတၢ်စိတၢ်ကမီၤန့ၣ်လီၤ. အဝဲနာ်ဝဲဒၣ်လၢ တၢ်ကိးစံးကတိၤတၢ်တစိၤဖိ ဒ်သိးအံၤတကလုာ်န့ၣ် ဒ်သိးပကဘျးစဲမၤဘၣ်ထွဲလိာ်သးဒီးပဒူၣ်ဖိထၢဖိ, ပတံၤသကိးတဖၣ်အဂီၢ်, မၤစၢၤပှၤန့ၣ်လီၤ. ဒ်တၢ်ဃိထံမၤလိတၢ်တဖၣ် ဒုးနဲၣ်ပာ်ဖျါထီၣ်ဝဲအသိး, တနွံအတီၢ်ပူၤ တၢ်ကိးစံးကတိၤတၢ်တစိၤဖိ, စှၤဘျီဖိန့ၣ် မၤဆံးလီၤစှၤလီၤ ပသးအတၢ်ဆီၣ်သနံး, တၢ်သယုၢ်သညိ, ဒီးပတၢ်ဘၣ်ယိၣ်ဘၣ်ဘီတဖၣ်န့ၣ်လီၤ. ဒီး ဒူ ဟံးန့ၢ်ပာ်ဂၢၢ်ပာ်ကျၢၤစ့ၢ်ကီး ပှၤစဲၣ်နီၤအဂုၤအဂၤအတၢ်မၤကွၢ်တဖၣ်, လၢအၢၣ်လီၤတူၢ်လိာ် တၢ်မၤဘၣ်လိာ် တၢ်ရ့လိာ်ဘၣ်ထွဲလိာ်သးအဆံးဖိအံၤ ကဲဘျုးဝဲဒၣ် ပသးအတၢ်မုာ်တၢ်ပၢၤ, နီၢ်ခိအတၢ်အိၣ်ဆူၣ်အိၣ်ချ့ လၢပဂီၢ်, ဒီးပှၤဂုၤပှၤဂၤတဖၣ်အဂီၢ်စ့ၢ်ကီးန့ၣ်လီၤ.

တၢ်ထံၣ်အံၤ လီၤပလိာ်အသးဒီး ကတိၤ ၁၂:၂၅ အတၢ်ပာ်ဖျါ, “တၢ်မၤကိၢ်မၤဂီၤ…မၤသကူးလီၤအီၤ, မ့မ့ၢ် တၢ်ကတိၤမုာ်တထံၣ်န့ၣ် ဒုးသးခုအီၤ” န့ၣ်လီၤ. လၢလံာ်စီဆှံတဆၢအံၤအပူၤ တၢ်ကိၢ်တၢ်ဂီၤ (anxiety) န့ၣ် အဲၣ်ဒိးစံးဝဲလၢ ပှၤတဂၤအတၢ်သူၣ်ဟူးသးဂဲၤလၢ အစံးဆၢမၤဆၢ တၢ်လၢအမၤပျံၤမၤဖုး အတၢ်မုာ်တၢ်ခုၣ်န့ၣ်လီၤ. တၢ်ဘၣ်ကိၢ်ဘၣ်ဂီၤအံၤ အိၣ်ဟဲကဲထီၣ်အသး သ့ဝဲဒၣ်စ့ၢ်ကီးလၢ တၢ်ပျံၤတၢ်ဖုး, ဒီးခါဆူညါတၢ်တလီၤတံၢ်လီၤဆဲးတဖၣ်အဂီၢ်န့ၣ်လီၤ. မ့မ့ၢ်ပှၤလၢအစူၢ်နာ် ကစၢ်ယ့ၣ်ရှူးတဖၣ် မ့ၢ်စံးကတိၤ မၤဂၢၢ်မၤကျၢၤ, ဒီးအတၢ်စံးကတိၤဟ့ၣ်ဂံၢ်ဟ့ၣ်ဘါတၢ်တဖၣ်န့ၣ် ကဆီတလဲက့ၤ ပှၤဂုၤပှၤဂၤအတၢ်ကိၢ်တၢ်ဂီၤ တဖၣ်ဆူ တၢ်သူၣ်ခုသးခု, ဒီးကဆှၢဝဲဆူ တၢ်အိၣ်မူအတီအလိၤ (:၂၈) အဂီၢ်, မၤစၢၤသ့ဝဲန့ၣ်လီၤ. တၢ်ကတိၤတဖၣ်အံၤ ဟ့ၣ်ထီၣ် တၢ်ပနီၣ်အထူၣ်တဖၣ်, ဒ်သိးကမၤစၢၤပှၤဂၤလၢ “တၢ်ဃုထၢအတံၤသကိးတဖၣ် လီၤတံၢ်လီၤဆဲး” (:၂၆) အဂီၢ်စ့ၢ်ကီးန့ၣ်လီၤ.

မ်ပကထုကဖၣ်ဒီးသံကွၢ် ကစၢ်ယွၤလၢ မ့ၢ်မတၤတဂၤ လိၣ်ဘၣ်ဝဲဒၣ် တၢ်ကိး ဃိး မံးနံး, လၢတၢ်ကစံးကတိၤ ဟ့ၣ်ဂံၢ်ဟ့ၣ်ဘါ ခီဖျိလၢလံာ်စီဆှံအတၢ်ပာ်ဖျါအပူၤန့ၣ်တက့ၢ်. တၢ်ကတိၤမ့ၢ်ဖုၣ်ဘၣ်ဆၣ်, တၢ်မၤဘၣ်ထွဲလိာ်သးညီညီဖိအံၤ, ကကဲထီၣ် တၢ်ဂံၢ်တဟီၣ်လီၤဆီလၢ ကစၢ်ယွၤ စူးကါအီၤ, ဒ်သိးကမၤဖှံထီၣ် တၢ်ဝံဃၢ, မၤကပီၤထီၣ် အမုၢ်နံၤ, ဒီး
ကဒုးအိၣ်ထီၣ်တၢ်မုၢ်လၢ်, ဒီးကမၤဘျါက့ၤတၢ်လၢအဝဲသ့ၣ်အဂီၢ်န့ၣ်လီၤ.