တနံၤဘၣ်တနံၤအဂီၢ်, တၢ်ဘူၣ်ထီၣ်ဘါထီၣ်ယွၤအဂီၢ်န့ၣ် ကၠူလံၣ် စးထီၣ်သးဝံၣ်ဝဲဒၣ် ယွၤအကလုၢ်ကထါတဖၣ်န့ၣ်လီၤ. ကၠူလံၣ် စံးဝဲဒၣ်လၢ “ဒ်ယသးဝံၣ်ထီၣ် ယွၤအကလုၢ်ကထါန့ၣ်ဒီး, ကယဲၢ်တၢ်လၢယသးဝံၣ်ထီၣ်အသိး, လၢယသူၣ်ယသး, ဒီးယသး အတၢ်သ့ၣ်ညါတၢ်တဖၣ် စးထီၣ်မၤဝဲ, ဒီးနာ်ဝဲဒၣ်နီၢ်နီၢ်” န့ၣ်လီၤ. ခီဖျိအတၢ်စံးကတိၤပာ်ဖျါထီၣ် ယွၤအကလုၢ်ကထါလၢ တၢ်သးဝံၣ်အပူၤန့ၣ် ကျုလံၣ် အဲၣ်ဒိးဝဲလၢ ယွၤအတၢ်မ့ၢ်တၢ်တီ ကမၤဆှဲထီၣ် တၢ်လၢအသးတဘၣ်ဝဲဒီးအနီၢ်ကစၢ်အသး, လၢအမ့ၢ် အကလုၢ်, ဒီးအနီၢ်အဖုၣ်အထီအဂ့ၢ်န့ၣ်လီၤ.
ကၠူလံၣ် စံးဝဲဒၣ်လၢ, “ယစးထီၣ်သးဝံၣ် တၢ်သးဝံၣ်တဖၣ်အတၢ်သးဝံၣ် ၁:၅, “ယသူဘၣ်ဆၣ်ယဃံလၤ” န့ၣ်လီၤ. (ပှၤထူအီၣ်စံာ်ဖိတဖၣ် အတၢ်ဆဲးတၢ်လၤအပူၤန့ၣ် ပိာ်မုၣ်လၢ မုၢ်အတၢ်ကိၢ်ဘၣ်အီၤဒီးအဖံးဘ့ၣ်ထီၣ်သူန့ၣ် ဖျါတဃံတလၤဘၣ်.) ဖဲလၢကၠူလံၣ် သးဝံၣ်ဝဲဒၣ် လံာ်စီဆှံတဆၢအံၤန့ၣ်ဒီး ယွၤ ဆီတလဲလိာ် အတၢ်ဆိကမိၣ်တဖၣ်န့ၣ်လီၤ. တကီၢ်ခါန့ၣ်, ကၠူလံၣ် နၢ်ပၢၢ်ထီၣ်ဝဲဒၣ်လၢ, “ယတလၢတပှဲၤယဲဒၣ်လဲာ်, ကစၢ်ယွၤအဲၣ်ယၤန့ၣ်လီၤ.”
ကၠူလံာ် သးဝံၣ်ထီၣ် ထါအဃံအလၤ, ဘၣ်တၢ်ထံၣ်န့ၢ်အီၤလၢ လံာ်စီဆှံအလီၢ်လံၤတကတြူၢ် တၢ်ကူၣ်ဘၣ်ကူၣ်သ့အလံာ်လဲၢ်အပူၤန့ၣ်လီၤ. ပှၤအိၣ်ဝဲတနီၤ ထုးထီၣ်ဝဲတၢ်သးဝံၣ်တဖၣ်အတၢ်သးဝံၣ် အခီပညီ ဒ်အမ့ၢ် ယွၤအတၢ်အဲၣ်လၢအပှၤဂီၢ်မုၢ်အဂီၢ် ဘၣ်ဆၣ်, ပှၤအါဂၤန့ၣ် ထံၣ်ဝဲဒၣ် ဒ်အမ့ၢ် တၢ်မၤလၤကပီၤအမူးသးဖှံလၢ နီၢ်ဒီမါဝၤအတၢ်အဲၣ်အဂီၢ်န့ၣ်လီၤ. လၢတၢ်ထံၣ်န့ၢ် နီၢ်ဒီမါဝၤ အတၢ်ဟ့ၣ်လီၤအးလီၤအသးကဒဲကဒဲ အတၢ်ဃံတၢ်လၤန့ၣ်ဒီး, ပပာ်ဖျါထီၣ်က့ၤ တလးမူးပိာ်မုၣ် အတံၤသကိးတဖၣ်အတၢ်ကတိၤတဖၣ်, လၢအမ့ၢ် “ပကသူၣ်ဖှံသးညီ, ဒီးသူၣ်ခုသးခုလၢနပူၤလီၤ. ပကစံးထီၣ်ပတြၢၤနတၢ်အဲၣ်အါန့ၢ် စပံးထံတက့ၢ်” (:၄) န့ၣ်လီၤ.
လၢပျၢၤအတၢ်ကွဲးတဖၣ်အံၤ ပထုးထီၣ် အခီပညီဘၣ်ဆၣ်, ဒ် ကၠူလံၣ် အသိး, ပပာ်ဂၢၢ်ပာ်ကျၢၤအီၤ သ့ဝဲဒၣ်လၢ ကစၢ်ယွၤ ဒုးနဲၣ်ဖျါထီၣ်အသးဆူ အပှၤဂီၢ်မုၢ်, လၢအဃုထၢဝဲဒၣ်န့ၣ်လီၤ. ဒ်ကစၢ်ယွၤ စံးဝဲဒၣ်လၢ လံာ်စီဆှံအလီၢ်လံၤ အဂၤတတီၤအပူၤအသိး, “မ့ၢ်နမ့ၢ် တၢ်လုၢ်ဒိၣ်ပှ့ၤဒိၣ်လၢ ယမဲာ်ညါ, ဒီးနဘၣ်တၢ်လၤကပီၤ, ဒီးယအဲၣ်နၤ…..” (ယရှါ ၄၃:၄) န့ၣ်လီၤ.
