ဘဲ(န) စံးဝဲဒၣ်, “ဖဲယမ့ၢ်ဖိသၣ်, ယနီၢ်ဆံးအကတီၢ်, ယဆ့ၣ်နီၤ လၢယပၢ်အကံၣ်ဒုၣ်လိၤဒီးယနီၣ်သိလ့ၣ်န့ၣ်လီၤ. နီၢ်နီၢ်န့ၣ်, တမ့ၢ်ယနီၣ်သိလ့ၣ်ဘၣ်. မ့ၢ်ဒၣ်ယပၢ်နီၣ်ဝဲဒၣ်” န့ၣ်လီၤ. ခဲကနံၣ်အံၤ, ယသ့ၣ်ညါလၢ ယပၢ်အိၣ်လၢမူခိၣ်န့ၣ် ကမၤဝဲဒၣ်တမံၤဃီန့ၣ်လီၤ. ဘဲ(န) အမါသးဘိန့ၣ် လဲၤပူၤကွံာ်ဝဲဒၣ် ဟီၣ်ခိၣ်, ဒီးတၢ်သူၣ်အုးသးအုး လုၣ်ဘၢဝဲဒၣ်အီၤန့ၣ်လီၤ. ဘၣ်ဆၣ်, အဝဲဟံးဃာ်ဂၢၢ်ကျၢၤ တၢ်သ့ၣ်ညါလၢ ကစၢ်ယွၤ မ့ၢ် ပှၤလၢအပၢဆှၢတၢ်တဂၤ, အိၣ်ဒီးအတၢ်ပညိၣ် လၢအသးသမူအဂီၢ်န့ၣ်လီၤ.

လၢတၢ်သူၣ်အုးသးအုး အကတီၢ်, ဘဲ (န) အတၢ်နာ်န့ၣ် အိၣ်ဖျါတ့ၢ်လံလၢ လံာ်စီဆှံ အလီၢ်လံၤတကတြူၢ်အပူၤန့ၣ်လီၤ. ဝံယံးရမံယၤ အသူၣ်အုးသးအုးဝဲလၢ အပှၤဂီၢ်မုၢ်တဖၣ်အဂီၢ်, ကစၢ်ယွၤပျဲ ဒုၣ်ဒါတဖၣ် ကစိာ်မၢကဲကုၢ် ပှၤအံၣ်စရ့လးဖိတဖၣ်န့ၣ်လီၤ. အတၢ်သးအုးဖးဒိၣ်လၢ အလီၤပျံၤလီၤဖုးအဂ့ၢ်န့ၣ်, ဝံယံးရမံယၤ ပာ်ဖျါထီၣ်ဝဲလၢ “တၢ်နးတၢ်ဖှီၣ်,” “တၢ်အၢ,” “သဘူးအပၤစံၣ်တူး” (bitterness), ဒီးတၤသၣ်ခၣ် (gall) တဖၣ် (သးသယုၢ် ၃:၁၉) န့ၣ်လီၤ. ဘၣ်ဆၣ်, ဒ်သိးအကအိၣ်ဒီးတၢ်မုၢ်လၢ်အဂီၢ်, တၢ်အိၣ်ဝဲတမံၤန့ၣ် မ့ၢ်ဒၣ် ကစၢ်ယွၤ “အတၢ်အဲၣ်,” “အတၢ်သူၣ်ကညီၤသးကညီၤ,” ဒီး “အတၢ်သးတီ” တဖၣ် (:၂၂-၂၃) န့ၣ်လီၤ.

တၢ်ဃုထၢမ့ၢ်အိၣ်ဒီးပှၤန့ၣ်ဒီး, မ့ၢ်သ့န့ၣ် ပကဟးဆှဲးဃုထၢ တၢ်မၤဘၣ်ဒိဆါပှၤ, ဒီးတၢ်နးတၢ်ဖှီၣ်တဖၣ်န့ၣ်လီၤ. ဘၣ်ဆၣ်, ဟီၣ်ခိၣ်အတၢ်ထံၣ် လၢအတလၢတပှဲၤတဖၣ်န့ၣ် ဒိၣ်စိလုၣ်ဘၢဝဲ ပထံၣ်သ့ၣ်ညါတၢ်န့ၣ်လီၤ. ဒ်သိးကမိၤက့ၤပှၤဆူ အအိၣ်အဂီၢ်, ကစၢ်ယွၤ ဟံးဃာ်ပၢဆှၢ ဟီၣ်ခိၣ်ချၢအံၤ, ဒီးစူးကါဝဲဒၣ် တၢ်သးခု,ဃုာ်ဒီးတၢ်သးအုး ဒ်လဲၣ်န့ၣ် ပစးထီၣ်ဆိကမိၣ် တထီၣ်ဘးဝဲဒၣ်ဘၣ်. တၢ်ဟ့ၣ်လီၤ ပတၢ်အိၣ်မူတဖၣ်ဆူ ကစၢ်ခရံာ် စံးတၢ်န့ၣ်, မ့ၢ်ဒၣ် ပစူၢ်က့ၤနာ်က့ၤ အတၢ်အဲၣ်, အတၢ်ကူၣ်သ့, ဒီးအတၢ်ဘၣ်အသးတဖၣ်န့ၣ်လီၤ. ပတၢ်အိၣ်မူအတၢ်လဲၤကျဲတဖၣ်မ့ၢ်အိၣ်ပှဲၤဒီးတၢ်နးတၢ်ဖှီၣ်တဖၣ်ဘၣ်ဆၣ်, ပအိၣ်ကဒုလၢ တၢ်သ့ၣ်ညါ ပပၢ်ကစၢ်ယွၤ မ့ၢ်ပှၤလၢအဟံးဃာ်, ဒီးကမၤလိၤ ပတၢ်လဲၤကျဲ, ဒ်ဝံယံးရမံယၤစံးဝဲအသိး, “ယပာ်တၢ်အံၤ လၢယသးကံၢ်ပူၤလီၤ, မၤသးဒ်န့ၣ်ဒီး ယမုၢ်လၢ်တၢ်” (:၂၁) န့ၣ်လီၤ.