လၢကီၢ်အမဲရကၤ အတၢ်စံၣ်စိၤတဲစိၤအပူၤ, သ့ၣ်ပှၢ်မ့ၣ်အူလၢ အမၤသံမၤဟးဂီၤတၢ် အဒိၣ်ကတၢၢ်န့ၣ် လၢဝ့ၢ် လၣ်ဟဲနၣ် (Lahaina), ဟၣ်ဝါယံၣ် (Hawaii), ဖဲလါအီကူာ် (၂၀၂၃) နံၣ်, ဒီးမၤသံဝဲဒၣ် ပှၤကညီအဂၤ ခွံဆံခွံဂၤ, ဒီးမၤဟးဂီၤ တၢ်သူၣ်ထီၣ် အါန့ၢ် အဖျၢၣ် ခံကထိန့ၣ်လီၤ. လၢတၢ်ဟးဂူာ်ဟးဂီၤတဖၣ်အဃိ ပှၤလၣ်ဟဲနၣ်ဖိတဖၣ် တူၢ်ဘၣ်နးဘၣ်ဖှီၣ်ဒိၣ်ဒိၣ်မုၢ်မုၢ်အကတီၢ်, သးအတၢ်တူၢ်ဘၣ်ခီၣ်ဘၣ်တၢ် အါထီၣ်ဝဲဒၣ် ခီဖျိလၢပှၤနုာ်လီၤဂုာ်ဟံးန့ၢ်ဆူၣ်တၢ်လၢ တၢ်သူၣ်ထီၣ်တဖၣ်အပူၤ, ဒီးပှၤဆါတၢ်ပှ့ၤတၢ် ပှၤအခၢၣ်စး (ပွဲစား) တဖၣ် ကျဲးစၢးဂုာ်ဟံးန့ၢ်ဆူၣ် တၢ်လီၢ်တၢ်ကျဲတဖၣ်အဃိန့ၣ်လီၤ.

တၢ်ဆၢန့ၢ်ဘၣ် တၢ်တတီတလိၤတဖၣ် လၢတၢ်ဂုာ်ဟံးန့ၢ် ခွဲးယာ်အတၢ်ဘၣ်ဘျုး ခီဖျိတၢ်အိၣ်အသးမၤအသး လၢအလီၤသးအုးတဖၣ်န့ၣ် မ့ၢ်တၢ်ဂ့ၢ်မိၢ်ပှၢ်လၢ ကစၢ်ယွၤ အတၢ်ကစီၣ် အဒိၣ်အဆူၣ်ဆူ အဒိၣ် (Edom) ထံကီၢ်အဂီၢ်န့ၣ်လီၤ. မ့ၢ်လၢ အဒိၣ်ထံကီၢ် ဟံးန့ၢ် တၢ်လီၢ်တၢ်ကျဲခွဲးဂ့ၤယာ်ဘၣ် (ဧိၤ ၁:၃), ဒီးမါအါထီၣ် အတၢ်ထူးတၢ်တီၤ (:၆), ပာ်ဖှိၣ်ထီၣ်အသးဒီးကလုာ်ဂၤ, ဒီးထီဒါအံၣ်စရ့လး (:၇). မၤန့ၢ်တၢ်ကူၣ်သ့ (:၈), ဒီးသုးမုၢ်အဂံၢ်အဘါ (:၉). ဒ်သိးကမၤအၢမၤနး ပှၤဂံၢ်စၢ်ဘါစၢ်တဖၣ်အဃိ, ဝံဧိၤဘါဒယၤ ဟ့ၣ်ပလီၣ် ပှၤအဒိၣ်ဖိ, လၢအမ့ၢ် ထီဘိအံၣ်စရ့လးဖိတဖၣ် အဒုၣ်အဒါလၢ တယံာ်ဘၣ်န့ၣ် ကစၢ်ယွၤ အတၢ်စံၣ်ညီၣ်တီ ကဟဲလီၤဘၣ်အဝဲသ့ၣ်န့ၣ်လီၤ. ပှၤအံၣ်စရ့လးဖိတဖၣ် ဘၣ်တၢ်စိာ်မၢကဲကုၢ်န့ၣ် ပှၤအဒိၣ်ဖိတဖၣ် အသူၣ်ခုသးခုအဃိ, ဧိၤဘါဒယၤ သိၣ်ဃီၣ်စ့ၢ်ကီး ပှၤအဒိၣ်ဖိတဖၣ်န့ၣ်လီၤ. တၢ်ကဘၣ်သးကညီၤ ပှၤအံၣ်စရ့လးဖိတဖၣ်အလီၢ်န့ၣ် ပှၤအဒိၣ်ဖိတဖၣ် နုာ်လီၤဂုာ်ဟံးန့ၢ်ဆူၣ် ပှၤအံၣ်စရ့လးဖိ အဟံၣ်ဃီတဖၣ်, ဒီးနုာ်လီၤမၤန့ၢ်မၤနၢၤ ဝ့ၢ်တဖၣ် လၢအဘၣ်တၢ်မၤနၢၤအီၤတဖၣ်အပူၤ (:၁၂-၁၃) န့ၣ်လီၤ.

လၣ်ဟဲနၣ် အပှၤဝ့ၢ်ဖိတဖၣ် ဘၣ်ကွၢ်ဆၢၣ်မဲာ်ဒီးတၢ်မၤအသး တမုာ်တလၤတဖၣ်ဘၣ်ဆၣ်, အဝဲသ့ၣ် ဒိးန့ၢ်ဝဲဒၣ် တၢ်သူၣ်ကညီၤသးကညီၤ ခီဖျိလၢ ကိးပူၤ တၢ်အိၣ်ဖှိၣ် တဖၣ် သူၣ်အိၣ်သးအိၣ် တူၢ်လိာ်မုာ် အဝဲသ့ၣ်လၢ, တၢ်အိၣ်ကဒုအလီၢ်အကျဲတဖၣ်, တၢ်အီၣ်ကိၢ်ကိၢ်လၢၤလၢၤတဖၣ်, ဒီးဂ့ၢ်ဂီၢ်အူအတၢ်မၤစၢၤတဖၣ်န့ၣ်လီၤ. ဖဲပှၤတဂၤဂၤ တူၢ်ဘၣ်တၢ်နးတၢ်ဖှီၣ်အကတီၢ်, ပအိၣ်ဒီးတၢ်ဃုထၢတမံၤဃီန့ၣ်လီၤ. ပှၤဂၤအတၢ်လီၤမၢ်အပူၤ, ပကျဲးစၢးမၤန့ၢ်တၢ်အဘျုးသ့ဝဲဒၣ်န့ၣ်လီၤ. (မ့) ဒ်ကစၢ်ယွၤ အဲၣ်ဒိးဝဲအသိး, ဒ်တၢ်အိၣ်ဖှိၣ်တဖၣ်လၢ ဝ့ၢ် လၣ်ဟဲနၣ် မၤဝဲအသိး, လၢတၢ်သးကညီၤ, ဒီးလၢတၢ်သးအိၣ်ဟ့ၣ်ညီတၢ်အပူၤန့ၣ် ပစံးဆၢမၤဆၢက့ၤတၢ် သ့ဝဲဒၣ်န့ၣ်လီၤ.