ဘၣ်တဘျီ, တၢ်ကိၢ်ခါအကတီၢ်န့ၣ် ပလဲၤဆူ မီ(န)ထဲနၣ် (Montana), ဒီးလၢ တၢ်အိၣ်ဘှံးအိၣ်သါအဂီၢ်, ပအိၣ်ကတီၢ်လၢ တၢ်အိၣ်ဘှံးလီၢ်တတီၤန့ၣ်လီၤ. တၢ်သူၣ်ထီၣ်တဖၣ်အကျါတဖျၢၣ်အပူၤန့ၣ် ၦၤသးစၢ်တဂၤ ဖဲအတြူာ်ထွါစီ တၢ်သူၣ်ထီၣ်အမဲာ်ဖံးခိၣ်, ဒီးသးဝံၣ်ဝဲဒၣ် ထါသးဝံၣ်စံးထီၣ်ပတြၢၤယွၤ လၢအညီနုၢ်ဒီးၦၤတယုၢ်န့ၣ်လီၤ. ဒီးစးထီၣ်သးဝံၣ်ဝဲဒၣ် ထါသးဝံၣ်, “မ့ၢ်တၢ်ဂ့ၤလၢယဂီၢ်” န့ၣ်လီၤ. ယပၢၤယသးတန့ၢ်လၢၤဘၣ်. ဖဲအဝဲသးဝံၣ်ဝဲဒၣ်ထါအဖျၢၣ် “မ့ၢ်တၢ်ဂ့ၤ” န့ၣ်ဒီး, ယသးဝံၣ်ပိာ်ထွဲဃုာ်ဒီးအီၤန့ၣ်လီၤ. ဖဲသးဝံၣ်ဝဲဒၣ်, “လၢယဂီၢ်,” ဒီးယသးဝံၣ်ပိာ်ထွဲအခံန့ၣ်လီၤ. တၢ်သးဝံၣ်အကတၢၢ်တကျိၤႇ “မ့ၢ်တၢ်ဂ့ၤႇ မ့ၢ်တၢ်ဂ့ၤ…လၢယဂီၢ်” န့ၣ် ပသးဝံၣ်သကိး တပူၤဃီန့ၣ်လီၤ. အဝဲနံၤကမှံထီၣ်, ဒီးထိးဘၣ်ယစုခိၣ် ဒီးစံးဝဲဒၣ်ယၤလၢ “စံးထီၣ်ပတြၢၤယွၤ” န့ၣ်လီၤ. ယက့ၤဆူသိလ့ၣ်လၢယဝၤအိၣ်ခိးယၤအလီၢ်န့ၣ်ဒီး, အဝဲသံကွၢ်ယၤ “နတၢ်နံၤကမှံဖးဒိၣ်န့ၣ် မ့ၢ်တၢ်မနုၤလဲၣ်” န့ၣ်လီၤ.

ဆိကမိၣ်ထီၣ်နဲ တၢ်ဂ့ၢ်တဖၣ်လၢ ပစံးထီၣ်ပတြၢၤယွၤသ့တဖၣ် ဒ်အမ့ၢ်- ကစၢ်ယွၤအတၢ်မၤဂ့ၤတၢ်, အတၢ်တီတၢ်လိၤႇ အတၢ်အဲၣ်တၢ်သးကညီၤႇ အတၢ်အၢၣ်လီၤတဖၣ်, အတၢ်ကတဲာ်ကတီၤအံးထွဲကွၢ်ထွဲၦၤ, ဒီးအတၢ်ကဟုကယာ်ဒီတဒၢပှၤ အဂ့ၢ်တဖၣ်န့ၣ်တက့ၢ်. ဒီးစံးထီၣ်ပတြၢၤအယုၢ် ၁၄၅ မ့ၢ် ထါစံးထီၣ်ပတြၢၤတဖၣ်အါမးအကျါတယုၢ်, လၢအဟ့ၣ်သဆၣ်ထီၣ်ၦၤ ဒ်သိးပကစံးထီၣ်ပတြၢၤ ကစၢ်ယွၤဆူညါထီဘိအဂီၢ်န့ၣ်လီၤ. စီၤဒၤဝံး ကွဲးဝဲႇ “ယကစံးထီၣ်ပတြၢၤနၤလီၤစိၤလီၤထီ” (:၂) န့ၣ်လီၤ. ၦၤအါဒံအါဂၤ စံးထီၣ်ပတြၢၤယွၤ ခီဖျိလၢတၢ်ဒ့တၢ်အူအပီးလီတမံၤမံၤ, မ့မ့ၢ်ၦၤအဂၤတဖၣ်န့ၣ် ဖးဝဲ, (မ့) ရူးဝဲ ကစၢ်ယွၤ အကလုၢ်ကထါတဖၣ်, (မ့) သးဝံၣ်ဝဲဒၣ် ထါစံးထီၣ်ပတြၢၤယုၢ်တဖၣ်, ထါတၢ်သးဝံၣ်တဖၣ်, ဒီးတၢ်သးဝံၣ်အုၣ်အသးတဖၣ် (ကလီးစဲ ၃:၁၆) န့ၣ်လီၤ. ပှၤတနီၤန့ၣ် ပာ်ဖျါထီၣ် အတၢ်စံးထီၣ်ပတြၢၤယွၤ ခီဖျိလၢတၢ်ဂဲၤကလံၣ်န့ၣ်လီၤ. ဘၣ်ဆၣ်, တၢ်စံးထီၣ်ပတြၢၤအမ့ၢ်အတီခဲလၢာ်န့ၣ် အိၣ်ဟဲထီၣ်ဝဲလၢပသူၣ်ပသး, အိၣ်ၦဲၤဝဲဒီးတၢ်စံးဘျုးစံးဖှိၣ်ကစၢ်ယွၤန့ၣ်လီၤ.

လၢတၢ်စံးထီၣ်ပတြၢၤယွၤအဂီၢ်, ကစၢ်ယွၤ တ့ဒုးအိၣ်ထီၣ်ပနီၢ်သူၣ်နီၢ်သးတဖၣ် န့ၣ်လီၤ. ကစၢ်ယွၤ အတၢ်အဲၣ် လၢအဟ့ၣ်လီၤသးလၢပဂီၢ်အဃိ, လၢတၢ်နာ်န့ၢ်လီၤသးအပူၤန့ၣ်, ပစံးသ့ဝဲဒၣ်, “မ့ၢ်တၢ်ဂ့ၤလၢယဂီၢ်”န့ၣ်လီၤ.