ကွဲၤဟူဖျါတၢ်သံကွၢ်စံးဆၢအကတီၢ်, ပိာ်မုၣ်သးစၢ်တဂၤ စံးဝဲဒၣ်လၢ “ဖဲနအိၣ်တၢ်လီၢ်တတီၤတီၤမ့ၢ်ဂ့ၤႇ နလဲၤခီဖျိဘၣ်တၢ်တမံၤမံၤဂ့ၤ, တၢ်လၢအိၣ်ဒီးနၤန့ၣ် စူးကါအီၤ, ဒီးမၤအဂ့ၤကတၢၢ်” န့ၣ်လီၤ. အတၢ်ကတိၤတဖၣ် ထိၣ်ဟူးထိၣ်ဂဲၤယသး ဒ်သိးယကခိးကွၢ်ဒိကနၣ် အဂ့ၢ်အလၢအၦဲၤလီၤတံၢ်လီၤဆဲးန့ၣ်လီၤ. ယသ့ၣ်ညါထွဲလၢ အဝဲမ့ၢ် ဒီပုၢ်ဝဲၢ်မုၣ်ဃုဂၤလၢ အမၤလိဒိးန့ၢ် သရၣ်မုၣ်ကွၢ်ၦၤဆါ အဒံၢ်ကရံၣ် အကျါတဂၤန့ၣ်လီၤ. အပူၤကွံာ်န့ၣ်, အဝဲသ့ၣ် အဟံၣ်တအိၣ်ဃီတအိၣ်, ဒီးဘၣ်ဂဲၤပျုၢ်ကျဲးစၢးသၦၢ်ၦၢ်ဘၣ်ဆၣ်, အဖီတၢၣ်လၢ အဝဲသ့ၣ် ပညိၣ်ပာ်ဝဲန့ၣ် ဒ်သိးကတုၤဃီၤဝဲ ဒ်သိးသိးအဂီၢ်, အဝဲသ့ၣ် မၤသကိးတၢ်န့ၣ်လီၤ. ဒီးဖဲတၢ်ထုးထီၣ်ရၤလီၤ အဝဲသ့ၣ်အဂ့ၢ်အကျိၤအကတီၢ်န့ၣ်ဒီး, အဒီပုၢ်ဝဲၢ်မုၣ် ဃုဂၤလိာ် မၤဝံၤဒိးန့ၢ်လံ သရၣ်မုၣ်ကွၢ်ၦၤဆါ အဒံၣ်ကရံၣ် လၢလီၢ်ကဝီၤအဖၠၣ်စိမိၤန့ၣ်လီၤ.

၄ မိၤရှ့ ၂၇ ပာ်ဖျါဝဲဒၣ် ဒီပုၢ်ဝဲၢ်မုၣ်အဂၤတဖု မၤသကိးတၢ်ဒီးမၤစၢၤဆီၣ်ထွဲလိာ်သးအဂ့ၢ်န့ၣ်လီၤ. စီၤစလၤဖဃး အဖိမုၣ် ယဲၢ်ဂၤန့ၣ် ပတံထီၣ် တၢ်သကွံာ်ကညး ဘၣ်ဃးဒီး တၢ်ဒိးန့ၢ်တၢ်န့ၢ်သါတၢ်သိၣ်တၢ်သီ တၢ်ဘျၢသနူအဂ့ၢ်န့ၣ်လီၤ. အဝဲသ့ၣ် ပာ်ဖှိၣ်ရိဖှိၣ်အသး, ဒီးဂဲၤဆၢထၢၣ်လၢ စီၤမိၤရှ့အမဲာ်ညါ ဒ်သိးကဃ့သကွံာ်ကညးအတၢ်ဂ့ၢ်အဂီၢ်, ဒီးစံးဝဲဒၣ်လၢ “ပပၢ်သံဝဲ…သံဝဲလၢအတၢ်ဒဲးဘးဒၣ်ဝဲအပူၤ, ဒီးအဖိခွါတအိၣ်ဘၣ်…… ဟ့ၣ်လီၤၦၤလၢတၢ်န့ၢ်သါလၢပဒီပုၢ်ဝဲၢ်အကျါန့ၣ်တက့ၢ်” (:၃-၄) န့ၣ်လီၤ. ယွၤ စံးဆၢဝဲဒၣ်, “စီၤစလၤဖဃးအဖိမုၣ်တဖၣ်န့ၣ် ကတိၤတၢ်န့ၣ်မ့ၢ်အတီလီၤ. နဘၣ်ဟ့ၣ်လီၤအီၤလၢတၢ်န့ၢ်သါလၢအပၢ်အဒီပုၢ်ဝဲၢ်အကျါန့ၣ်သၦၢ်တၢၢ်, ဒီးနဘၣ်ဒုးန့ၢ်ဘၣ်အီၤလၢ အပၢ်အတၢ်န့ၢ်သါ” (:၇), တၢ်ကတိၤလၢ အဆီတလဲ တၢ်သိၣ်တၢ်ဘျၢသနူန့ၣ်လီၤ.

ဒီပုၢ်ဝဲၢ်မုၣ် ယဲၢ်ဂၤ, ဟဲပာ်ဖှိၣ်ရိဖှိၣ်, ဆၢထၢၣ်လၢ စီၤမိၤရှ့အမဲာ်ညါ, ဒီးဃုထံၣ်န့ၢ် ကစၢ်ယွၤအတၢ်သးကညီၤန့ၣ်လီၤ. အဝဲသ့ၣ်ပာ်ဖှိၣ်ထီၣ်အသးလၢ ကစၢ်ယွၤအမဲာ်ညါအဃိ, တၢ်လၢအဝဲသ့ၣ်လိၣ်ဘၣ်ဝဲန့ၣ် ယွၤဟ့ၣ်လီၤဝဲဒၣ်န့ၣ်လီၤ.

ဒ်ပမ့ၢ် ၦၤစူၢ်က့ၤနာ်က့ၤ ကစၢ်ယ့ၣ်ၡူးတဖၣ်အသိး, တၢ်မၤသကိးတၢ်န့ၣ် တမ့ၢ်လၢတၢ်အဘီၣ်အညီထီဘိဘၣ်. ဘၣ်ဆၣ်, လၢတၢ်ဆီၣ်လီၤသးအပူၤ, ဖဲပဃုထံၣ်န့ၢ် ယွၤ အတၢ်ကူၣ်သ့, ဒီးအတၢ်နဲၣ်ကျဲန့ၣ်ဒီး, ဒ်သိးပကမၤသကိးတၢ်ဂ့ၤဂ့ၤဘၣ်ဘၣ်လၢ ကစၢ်ခရံာ်အပူၤအဂီၢ်, ပကထံၣ်လၢ ကစၢ်ယွၤ မၤစၢၤၦၤသ့ဝဲဒၣ်န့ၣ်လီၤ.