ဖဲနံၣ်ကယၤတဆံဃိး ဘူးထီၣ်ကလၢၢ်အဆၢ, ကီၢ်ဖြၣ်စ့ၣ် အတၢ်ပၢၢ်ဆၢ (French Revolution) အကတီၢ်, သီမၢး(စ) ဒံၣ် မဟံ (Thomas de Mahy) မ့ၢ် ၦၤတူၢ်ဒိၣ်ကီၤဒိၣ်အကျါတဂၤ လၢအဘၣ်တၢ်မၤသံအီၤ, ဖဲကမျၢၢ်အတၢ်တၢထီၣ်တၢလီၤအပူၤန့ၣ်လီၤ. လၢပျၢၤတၢ်စံၣ်ဃဲၤတဲဃဲၤတထံၣ်အပူၤန့ၣ် ဖဲတၢ်ဖးပာ်ဖျါထီၣ် လံာ်တၢ်ပျဲလၢပှၤကမၤသံအီၤန့ၣ်ဒီး, အဝဲ စံးဝဲဒၣ်လၢ, “ယထံၣ် နမၤကမၣ် လံာ်ဖျၢၣ်အတၢ်ကတိၤသၢဖျၢၣ်” န့ၣ်လီၤ. တၢ်ဂ့ၢ်အံၤမ့ၢ်ဘၣ်ဝဲဒၣ်န့ၣ်ဒီး, တၢ်ဂ့ၢ်လၢအကါဒိၣ်တမံၤ, လၢအမ့ၢ်တၢ်ကမၤသံအီၤအဂ့ၢ်န့ၣ် ဒံၣ် မဟံ တပာ်သူၣ်ပာ်သးဝဲဒၣ်နီတစဲးဘၣ်န့ၣ်လီၤ.
မုၢ်တနံၤအံၤ, လၢတၢ်တပာ်သူၣ်ပာ်သးအပူၤန့ၣ် ပဘၣ်ကွၢ်ဆၢၣ်မဲာ်ဒီးတၢ်ဂ့ၢ်ကီလၢအကါဒိၣ်တမံၤ, ဘၣ်ဃးဒီး ကစၢ်ခရံာ် အနီၢ်ခိ (တၢ်အိၣ်ဖှိၣ်) အဂ့ၢ်န့ၣ်လီၤ. လၢခရံာ်အတၢ်အိၣ်ဖှိၣ်အပူၤန့ၣ် ပှၤအိၣ်ဝဲဒၣ်တနီၤ, လၢအကမၤဟးဂီၤ ကစၢ်ခရံာ်အတၢ်ပညိၣ်န့ၣ်လီၤ. ဘၣ်သ့ၣ်သ့ၣ်, ပကထံၣ် ခရံာ်အတၢ်အိၣ်ဖှိၣ် ဒ်ထံရူၢ်ကီၢ်သဲးကမံးတံာ် အတၢ်ဖံးတၢ်မၤ (မ့) ဒ်တၢ်လီၢ်တၢ်ကျဲလၢ ပှၤကဘၣ်မၤဂ့ၤမၤဘျုးၦၤန့ၣ်လီၤ. ပကထံၣ် ခရံာ်အတၢ်အိၣ်ဖှိၣ် ဒ်တၢ်ဘူၣ်တၢ်ဘါ အတၢ်ကရၢကရိတဖုသ့ၣ်သ့ၣ်န့ၣ်လီၤ. ဘၣ်ဆၣ်, ထီဘိန့ၣ် တၢ်အိၣ်ဖှိၣ် အတၢ်ဖံးတၢ်မၤအဆိကတၢၢ် ကဘၣ်မ့ၢ်ဝဲ ကစၢ်ယ့ၣ်ၡူးအတၢ်သးခုကစီၣ်န့ၣ်လီၤ.
စီၤပီလူး စံးဘၣ်တဲဘၣ် ပှၤကရံၣ်သူးဖိလၢ အစူၢ်က့ၤနာ်က့ၤတၢ်တဖၣ်အဂီၢ်န့ၣ်, “ယဟ့ၣ်လီၤသုလၢတၢ်အဆိတဖၣ်အကျါ, တၢ်လၢယဒိးန့ၢ်စ့ၢ်ကီးယဲ, လၢခရံာ်ဒိးသံ အသးလၢပတၢ်ဒဲးဘးအဃိႇ ဒ်တၢ်ကွဲးအသးအသိးလီၤ. ဒီးလၢအဘၣ်တၢ်ခူၣ်လီၤကွံာ်အီၤ, ဒီးလၢသၢနံၤတနံၤန့ၣ် ဂဲၤဆၢထၢၣ်က့ၤ, ဒ်တၢ်ကွဲးဝဲအသိး” (၁ ကရံၣ် ၁၅:၃-၄) န့ၣ်လီၤ. တၢ်ဂ့ၢ်အဂုၤအဂၤတဖၣ်အဂီၢ်, တၢ်ဆၢကတီၢ်ဒီးတၢ်လီၢ်လၢ အကြၢးအဘၣ် တဖၣ် ကအိၣ်ဝဲဘၣ်ဆၣ်, တၢ်သးခုကစီၣ်မ့ၢ် တၢ်အကါဒိၣ်အဆိကတၢၢ်တမံၤန့ၣ်လီၤ.
ဟီၣ်ခိၣ်လၢအၦဲၤဒီးတၢ်ကစီၣ်အၢသီတဖၣ်အပူၤန့ၣ် ပကမ့ၢ် ပှၤလၢအစိာ် ကစၢ်ယွၤအတၢ်သးခုကစီၣ် ကသ့ဝဲဒၣ်ဒ်လဲၣ်. ဖဲပဒိးန့ၢ်ခွဲးယာ်တဘျီလၢ်လၢ်, လၢတၢ်ဟ့ၣ်ခီရၤလီၤတၢ်သးခုကစီၣ်အဂီၢ်, ပမ့ၢ်ဃ့ကစၢ်ယွၤလၢကဟ့ၣ်စိဟ့ၣ်ကမီၤၦၤန့ၣ်ဒီး, ပမၤကသ့ဝဲဒၣ်န့ၣ်လီၤ.
