ဖဲလါယနူၤအါရံၣ် ၁၄သီႇ ၁၉၇၃ နံၣ်န့ၣ်, ဖဲတၢ်လိာ်ကွဲသတြီၤ အမဲရကၤဖျၢၣ်ထူ နွံဝီၤ တဝီၤ (Super Bowl VII) အကတီၢ်, မဲယၤမံၤ ဒီ(လ)ဖ့ (Miami Dolphins) ဖျၢၣ်ထူကရၢ ကမၤနၢၤတၢ်န့ၣ် လီၤတံၢ်လံန့ၣ်လီၤ. တုၤလၢခဲကနံၣ်အံၤန့ၣ် တၢ်လိာ်ကွဲ အမဲရကၤ ဖျၢၣ်ထူ ဒီတကတီၢ်ညါန့ၣ်, မဲယၤမံၤ ဒီ(လ)ဖ့ မၤန့ၢ်မၤနၢၤ တၢ်အစၢလၢအဂ့ၤ, ဒီးလိာ်ကွဲဝဲဒၣ် ၁၆ ဘျီန့ၣ် လိာ်ကွဲမၤနၢၤဝဲကိးဘျီဒဲးန့ၣ်လီၤ. ဒီးတၢ်လိာ်ကွဲသတြီၤ အမဲရကၤဖျၢၣ်ထူ အဆၢကတီၢ်ကတၢၢ်ဝဲန့ၣ်ဒီး, ၦၤမၤနၢၤတၢ် ဒီ(လ)ဖ့ ပှၤလိာ်ကွဲတၢ်အကရၢဖိတဖၣ် ကဲထီၣ်ဝဲ ဒ်ပှၤလိာ်ကွဲဖျၢၣ်ထူထဲတဖုဧိၤ, လၢအဒိးန့ၢ် တၢ်မၤနၢၤအစၢအဂ့ၤ,
အလၢအၦဲၤ လၢတၢ်လိာ်ကွဲအမဲရကၤဖျၢၣ်ထူ အတၢ်စံၣ်စိၤတဲစိၤအပူၤန့ၣ်လီၤ.
ၦၤလၢအမၤနၢၤတၢ်, အတၢ်ပာ်ဖျါတမံၤအံၤ ကြၢးဝဲဘၣ်ဝဲဒီးကစၢ်ယ့ၣ်ၡူးန့ၣ်လီၤ. ပမ့ၢ်ကွၢ် ကစၢ်ယ့ၣ်ၡူး မၤဝဲကစၢ်ယွၤအတၢ်မၤလီၤတံၢ်လီၤဆဲးန့ၣ်ဒီး, ဖျါလၢ အမၤနၢၤဝဲဒၣ်တမံၤဘၣ်တမံၤန့ၣ်လီၤ. စီၤမးသဲ ကွဲးနီၣ်ဝဲ ကစၢ်ခရံာ် မၤဝဲတၢ်သးခုကစီၣ်အတၢ်မၤလၢကၤလံၤလါ (မးသဲ ၄:၂၃-၉:၃၈) အဂ့ၢ်အပူၤ, လၢအခီၣ်ထံးဒီးအကတၢၢ်န့ၣ် ကွဲးပာ်ဖျါဃုာ်ဝဲ “ဒီးယ့ၣ်ၡူးဟးဝ့ၤဝီၤတၢ်လၢ ကၤလံၤလါဒီကီၢ်ညါႇ ဒီးသိၣ်က့ၤသီက့ၤတၢ်လၢ ဘူၣ်ဘျီၣ်တဖၣ်အပူၤႇ ဒီးစံၣ်တဲၤတဲလီၤဘီဧိၤမုၢ်ဧိၤႇ အတၢ်သးခုကစီၣ်, ဒီးမၤဘျါက့ၤ ကယဲၢ်တၢ်ဆူးတၢ်ဆါဒီး ကယဲၢ်တၢ်အက့အကွဲၣ်လၢ ၦၤဂီၢ်မုၢ်အကျါကိးမံၤဒဲး” (၄:၂၃, ကွၢ်စ့ၢ်ကီး ၉:၃၅) အတၢ်ဂ့ၢ်ဖုၣ်ကိာ်တဖၣ်န့ၣ်လီၤ. ကစၢ်ခရံာ် မၤနၢၤတ့ၢ်လံ တၢ်ဝံတၢ်နါ, တၢ်ဆူးတၢ်ဆါႇ ဒီးတၢ်သံ (ကွၢ် မၢ်ကူး ၅:၁-၄၃) တဖၣ်န့ၣ်လီၤ. ဒီးအတၢ်သံလၢ ထူၣ်စုညါအလိၤန့ၣ် ဖျါလၢ အဘၣ်တၢ်ဆီၣ်တံၢ်မၤနၢၤအီၤဘၣ်ဆၣ်, အကတၢၢ်န့ၣ် ဆီတလဲကွံာ် အသးဆူ တၢ်မၤနၢၤန့ၣ်လီၤ. ကစၢ်ယ့ၣ်ရှူး မၤနၢၤတ့ၢ်လံ တၢ်သံ, ဒုၣ်ဒါအဒိၣ်အထီကတၢၢ်, ခီဖျိလၢအနီၢ်ကစၢ် အတၢ်ဂဲၤဆၢထၢၣ်သမူထီၣ်က့ၤ (ကွၢ် မၤတၢ် ၂:၂၄) အပူၤန့ၣ်လီၤ.
ၦၤမၤနၢၤတၢ်တဖၣ်, လၢတၢ်လိာ်ခိၣ်လိာ်ကွဲဂ့ၤ, လၢတၢ်ဖံးတၢ်မၤအဂုၤအဂၤမ့ၢ်ဂ့ၤန့ၣ် ဘၣ်တၢ်ဟ့ၣ်မၤလၤကပီၤအဝဲသ့ၣ်လၢ ခိၣ်ဖး, ဒီးတၢ်ဟ့ၣ်တဖၣ်န့ၣ်လီၤ. ခီဖျိလၢကစၢ်ယ့ၣ်ၡူး အသးသမူ, အတၢ်သံ, ဒီးအတၢ်ဂဲၤဆၢထၢၣ်သမူထီၣ်က့ၤတၢ်န့ၣ် ပှ့ၤက့ၤဝဲဒၣ် တၢ်ပျၢ်တၢ်ကမၣ်, ဒီးတၢ်ရ့လိာ်ဘၣ်ထွဲလိာ်သးအဂ့ၤအဘၣ်ဒီးကစၢ်ယွၤ လၢကယဲၢ်ၦၤစူၢ်က့ၤနာ်က့ၤအီၤတဖၣ်အဂီၢ်, ပတၢ်စံးဆၢမၤဆၢတၢ် အကြၢးအဘၣ်န့ၣ် ကမ့ၢ်တၢ်မနုၤတမံၤလဲၣ်. ကမ့ၢ်ဝဲဒၣ် တၢ်ဘူၣ်ထီၣ်ဘါထီၣ်အီၤလၢတၢ်သးတီန့ၣ်လီၤ.
