ယတံၤသကိး ခရံးစတံဒီးအဝၤ, လဲၤအီၣ်သကိးဟါတၢ်အီၣ် လၢအမုၢ်ဂၢ်ဒီးအဖါတံၢ်အဟံၣ်န့ၣ်လီၤ. တယံာ်ဒံးဘၣ်န့ၣ် အမုၢ်ဂၢ် သ့ၣ်ညါထွဲဝဲဒၣ်လၢ တူၢ်ဘၣ်ခီၣ်ဘၣ် ခဲစၢၣ်တၢ်ဆါအၢအၢသီသီန့ၣ်လီၤ. တချုးလၢပှၤစးထီၣ်အီၣ်အီဒံးဘၣ်တၢ်န့ၣ်,
အဖါတံၢ် သံကွၢ်ဝဲဒၣ်လၢ, “မ့ၢ်ၦၤတဂၤဂၤအသးအိၣ်တဲတၢ်တမံၤမံၤဧါ” န့ၣ်လီၤ. မ့ၢ်လၢအဖါတံၢ်အဲၣ်ဒိးတဲဝဲဒၣ် “မ့ၢ်ၦၤတဂၤဂၤအဲၣ်ဒိးဃ့ဘါထုကဖၣ်တၢ်ဒံးဧါ” န့ၣ်ခရံးစတံ သ့ၣ်ညါဝဲအဃိ, နံၤကမှံထီၣ်ဝဲဒၣ်န့ၣ်လီၤ. အဖါတံၢ်န့ၣ် တမ့ၢ်လၢအစူၢ်က့ၤနာ်က့ၤကစၢ်ယ့ၣ်ရှူးဘၣ်ဆၣ်, သ့ၣ်ညါဝဲလၢ ခရံးစတံ မ့ၢ်ၦၤခရံာ်ဖိတဂၤအဃိ, ဒ်သိးကဃ့ဘါထုကဖၣ်ဝဲအဂီၢ်, အိးထီၣ်န့ၢ်ကျဲ, ဒီးကွဲမုာ်အီၤန့ၣ်လီၤ. ကစၢ်ယွၤ အတၢ်ကဟုကယာ်အဂီၢ်, လၢအသးပူၤန့ၣ် စံးဘျုးစံးဖှိၣ်ယွၤ, ဒီးဒ်သိးကစၢ်ယွၤ ကမၤတၢ်လီၤလးလၢ အမုၢ်ဂၢ်တဂၤအံၤအဂီၢ်, ဃ့သကွံၢ်ကညးဝဲဒၣ်န့ၣ်လီၤ.
စီၤပၤ ဃံးစကံယၤ ဆါဝဲတုၤအကသံတ့ၢ်ဝဲ, ဒီးဖဲ ဝံယၡါယၤ ဟဲတဲဘၣ်အီၤလၢ ကသံဝဲဒၣ် (ယၡါ ၃၈:၁) ဝံၤန့ၣ်ဒီး, လၢအသးပူၤန့ၣ် အဲၣ်ဒိးတဲဝဲတၢ်တမံၤလၢ ကစၢ်ယွၤန့ၣ်လီၤ. အဝဲ “ဟီၣ်ဝဲနးမး,” ဒီးဃ့ကညးယွၤလၢ “ယွၤဧၢ, ယလဲၤတၢ်လၢနမဲာ်ညါလၢတၢ်မ့ၢ်တၢ်တီအပူၤ, အိၣ်ဒီးယသးဒီဖျၢၣ်, ဒီးယမၤတ့ၢ်တၢ်အဂ့ၤလၢနမဲာ်ညါန့ၣ် သ့ၣ်နီၣ်ထီၣ်က့ၤလၢ်ယၤတက့ၢ်” (:၃) န့ၣ်လီၤ. ဒ်သိးကပူၤဖျဲးဝဲလၢ တၢ်ဆူးတၢ်ဆါအဂီၢ်, အဝဲ ဃ့ကညးယွၤသၦၢ်ၦၢ် လၢသူၣ်တီသးလိၤအပူၤန့ၣ်လီၤ. တၢ်မၤဘျါက့ၤတၢ်န့ၣ် တသန့ၤထီၣ်အသးလၢ ပတၢ်အိၣ်မူ “အတၢ်ဂ့ၤတၢ်ဝါ,” ဒီးကစၢ်ယွၤ စ့ၢ်ကီး တမၤဘျါက့ၤတၢ်ထီဘိဘၣ်ဆၣ်, ယွၤဃုထၢဝဲလၢ ကဒုးအိၣ်မူအါထီၣ် စီၤပၤအသးသမူ တဆံယဲၢ်နံၣ် (:၅) န့ၣ်လီၤ. စီၤပၤဃံးစကံယၤ ဘျါက့ၤဝဲလၢအတၢ်ဆူးတၢ်ဆါဝံၤ, စံးဘျုးစံးဖှိၣ်, ဒီးစံးထီၣ်ပတြၢၤကစၢ်ယွၤ (:၁၆) န့ၣ်လီၤ.
လၢတၢ်လိၣ်ဘၣ်နီၢ်နီၢ်အဃိမ့ၢ်ဂ့ၤ, ဒ်သိးပကစံးဘျုးစံးဖှိၣ်ကစၢ်ယွၤလၢ တၢ်ဂ့ၢ်ဆံးဆံးဖိ, (မ့) တၢ်ဂ့ၢ်ဒိၣ်ဒိၣ်မုၢ်မုၢ် တမံၤမံၤအဂီၢ်မ့ၢ်ဂ့ၤန့ၣ် ကစၢ်ယွၤ ကွဲမုာ်ၦၤ ဒ်သိးပကဃ့ဘါထုကဖၣ်တၢ်န့ၣ်လီၤ. ကစၢ်ယွၤ ဒိကနၣ်ပတၢ်ထုကဖၣ်တဖၣ်, ထံၣ်ဝဲပမဲာ်ထံမဲာ်နိတဖၣ်, ဒီးကစံးဆၢပှၤ ဒ်အတၢ်တိာ်အိၣ်ဝဲအသိးန့ၣ်လီၤ. မ့မ့ၢ်တၢ်လၢ ပကဘၣ်မၤဝဲန့ၣ် “လဲၤတၢ်ကဘဲးကဘဲးတစိၤသး” ဒီး ကစၢ်ယွၤ (:၁၅) န့ၣ်လီၤ.
