အဲဒံၣ် ကိဝီးသံၣ် (Andy Goldsworthy) အတၢ်မၤ ကရဲ ရဲးပ့း တၢ်ဒုးခိၣ်က့ၣ်ကျီၤ (Grand Rapids Arch) န့ၣ် အိၣ်ဆၢထၢၣ်ဝဲလၢ ကျဲအကပၤ, ဖျါဝဲဒ်အလဲၤသဃဲၤတၢ်ဒီးၦၤလဲၤတၢ်က့ၤတၢ်ဖိတဖၣ်အသိးန့ၣ်လီၤ. ၦၤတ့ဒွဲလၤက့ၢ်ဂီၤတဂၤအံၤ တ့ဒုးအိၣ်ထီၣ်တၢ်အခိၣ်ဒုးက့ၣ်ကျီၤလၢ စကီးတ့း(ရှ) အမဲး လၢၢ်ကိၢ်လိၣ် (Scottish sandstone) ဖးဒိၣ် သၢဆံဃုဖျၢၣ်, လၢအိၣ်ဆၢထၢၣ် အကစၢ်ဒၣ်ဝဲန့ၣ် အထီကအိၣ် တဆံဃိး ခီၣ်ယီၢ်, ဒီးတစူးကါဝဲ ခီၣ်ခြံးအသံးအကာ်, (မ့) ထးနီၣ်ဘျးတဖၣ်န့ၣ်ဘၣ်. တၢ်တ့ဒုးအိၣ်ထီၣ် တၢ်ဒုးခိၣ်က့ၣ်ကျီၤန့ၣ် သန့ၤထီၣ်အသးဒီးအဖီခိၣ်လၢၢ်အတယၢၢ် အဃၢတဖၣ်အဃိ, ဖဲတၢ်လီၤဆီ လၢၢ်အနၢၣ်ဖးလဲၢ် လၢတဒ်သိးလိာ်အသးတဖၣ်တဖျၢၣ်စုာ်စုာ်အကတီၢ်, ဒ်သိးလၢၢ်အိၣ်လၢအဖီခိၣ်ကတၢၢ်အခၢၣ်သးန့ၣ် ကဘၣ်လိာ်ဘၣ်စးလီၢ်တံၢ်လီၤဆဲးအဂီၢ်, လၢၢ်တဖၣ်န့ၣ် တၢ်ဒီၣ်တဲာ်အီၤ ဒ်ကျဲး (wedge) အသိးန့ၣ်လီၤ.ဒ်သိးဒီးတၢ်သူၣ်ထီၣ်ကအိၣ်ဂၢၢ်ဆိးကျၢၤအဂီၢ်, လၢအဖီခိၣ်ကတၢၢ်အခၢၣ်သး လၢၢ်တဖျၢၣ်န့ၣ် မ့ၢ်တၢ်အကါဒိၣ်ကတၢၢ်, လီၤဂာ်ဒီးဟံၣ်သနၢၣ်အခီၣ်ထံးန့ၣ်လီၤ.

တၢ်အက့ၢ်ဂီၢ်စိးပျၤတမံၤအံၤ ဒုးသ့ၣ်နီၣ်ထီၣ်ယၤလၢ ကစၢ်ယ့ၣ်ၡူး အတၢ်မၤဒ် “ဟံၣ်အသနၢၣ်အခီၣ်ထံး” အသိး, တၢ်အိၣ်ဖှိၣ်တဖၣ် လၢအလၢလီၤဆီဒီးတဒ်သိးလိာ်အသးတဖၣ်အဂီၢ် (အ့း ၂:၂ဝ) န့ၣ်လီၤ. ၦၤတခီဘီမုၢ်ဖိ, လၢအတမ့ၢ်ၦၤယူဒၤဖိကိးဂၤဒဲးန့ၣ် တဘျီမ့ၢ်တ့ၢ်ဝဲ, “ၦၤလၢတဘၣ်ဃးဒီးအံၣ်စရ့လးဘၣ်, ဒီးၦၤတမှံၤတပျီၤလၢအတဘၣ်ဃးဘၣ်ဒီးတၢ်စံးပာ်အတၢ်အၢၣ်လီၤအီလီၤဘၣ်, ၦၤတအိၣ်ဘၣ်ဒီးတၢ်မုၢ်လၢ်ဘၣ်, ဒီးတအိၣ်ဘၣ်ဒီးယွၤလၢဟီၣ်ခိၣ်ချၢ” (:၁၂) န့ၣ်လီၤ. ကစၢ်ယ့ၣ်ၡူး မ့ၢ်ၦၤလၢအမၤက့ၤ “ၦၤခံဖုတဖုဃီ” ဒီး “မၤလီၤပှီၢ်ကွံာ် တၢ်ခိၣ်ဒူအိၣ်လၢပဘၢၣ်စၢၤ” (:၁၄) န့ၣ်လီၤ. အဝဲ ဒုးအိၣ်ထီၣ် “ၦၤအသီတဂၤဃီ,” ဒီး “မၤဖိးလိာ်တၢ်ခံခီဒီးယွၤလၢ အနီၢ်တဂၤဃီ လၢထူၣ်စုညါ,” ဒီးကယဲၢ်ပှၤခဲလၢာ်န့ၣ် ဟ့ၣ်လီၤဝဲဒၣ် “တၢ်တုၤဆူပၢ်အအိၣ်လၢသးတဖျၢၣ်ဃီ” (:၁၅-၁၆,၁၈) န့ၣ်လီၤ.

ကစၢ်ခရံာ် သူၣ်ထီၣ်န့ၢ်ၦၤ ဒ်တၢ်အိၣ်ဖှိၣ်တဖှိၣ်လၢ “ယွၤအိၣ်ဝဲဆိးဝဲအလီၢ်လၢသးအပူၤ” အသိး (:၂၂) န့ၣ်လီၤ. အဝဲ စိးပျၤၦၤ, အိၣ်ဒီးအတၢ်လီၤဆီ တဂၤစုာ်စုာ်, ဒီးခီဖျိလၢအီၤန့ၣ် ဒုးဘျးစဲလိာ်ပသးကဒဲကဒဲ,ဃုာ်ဒီးအီၤ, ဒီးလဲၤတၢ်ဒီးၦၤန့ၣ်လီၤ. တၢ်အိၣ်ဖှိၣ် ဘၣ်တၢ်ပာ်ဖှိၣ်ဒုးအိၣ်ထီၣ်ဝဲဒၣ်လၢ ကစၢ်ယ့ၣ်ၡူးခရံာ်န့ၣ်လီၤ.