စးထီၣ်ဖဲ လံာ်မၤတၢ် ၇:၅၉ ဒီးဆူညါ အဆၢဖိ တဆံ အပူၤန့ၣ် ပကထံၣ်ဘၣ် တၢ်လၢအတညီနုၢ်မၤအသးန့ၣ်လီၤ. စီၤစတ့းဖၣ်အတၢ်သံလၢအလီၤပျံၤလီၤဖုး ခီဖျိတၢ်ကွံာ်သံအီၤလၢလၢၢ်အဂ့ၢ်န့ၣ် ဆီတလဲအသးချ့သဒံးဆူ ၦၤစူၢ်က့ၤနာ်က့ၤ ကစၢ်ခရံာ် အဂုၤ အဂၤတဖၣ် လီၤပြံလီၤပြါ, ဒီး “စံၣ်တဲၤတဲလီၤယွၤအကလုၢ်ကထါ” န့ၣ် ဒုးကဲထီၣ်တၢ်ကတိၤလၢ အလီၤကမၢကမၣ်, “ဒီးတၢ်သးခုဖးဒိၣ်အိၣ်ဝဲလၢဝ့ၢ်တဖျၢၣ်န့ၣ်အပူၤ” (၈:၈) န့ၣ်လီၤ.

တၢ်အံၤမ့ၢ် တၢ်မၤအၢမၤနး အတၢ်လီၤတိၢ်လီၤဆီတမံၤန့ၣ်လီၤ.

ပှၤယူရပၤဖိ တၢ်အိၣ်ဖှိၣ်သရၣ် ရ့းတိၤ ကူလံးခၠီး (Hristo Kulichev) တဂၤ လဲၤခီဖျိဘၣ် တၢ်လီၤလိၢ်လီၤလး, လၢအမ့ၢ် တၢ်ဂ့ၤတၢ်ဝါ အိၣ်ဟဲကဲထီၣ်အသးလၢ တၢ်အၢတၢ်သီအပူၤန့ၣ်လီၤ. ဖဲ ၁၉၈ဝ နံၣ်တဖၣ်အပူၤန့ၣ်, ခီဖျိလၢစံၣ်တဲၤတဲလီၤတၢ်အဃိ, ဘၣ်တၢ်ဖီၣ်ဒုးဃာ်အီၤလၢဃိာ်ပူၤန့ၣ်လီၤ. ဖဲအိၣ်ဝဲဒၣ်လၢဃိာ်ပူၤအကတီၢ်, စံးကတိၤ ပာ်ဖျါ ကစၢ်ယ့ၣ်ရှူးအတၢ်သးခုကစီၣ် ဖျိဖျိဖျါဖျါန့ၣ်လီၤ. ဃိးလါလဲၤပူၤကွံာ်ဝံၤ, ဖဲလၢပှၤပျၢ်ကွံာ်အီၤလၢဃိာ်ပူၤန့ၣ်ဒီး, စံးကတိၤပာ်ဖျါထီၣ်ဝဲ “လၢဃိာ်ပူၤ, ပဒိးန့ၢ် တၢ်သးခု ကစီၣ်အတၤသၣ်တဖၣ် အါန့ၢ်ဒံး ပမုၢ်လၢ်ပာ်ဝဲလၢတၢ်အိၣ်ဖှိၣ်အပူၤန့ၣ်လီၤ. ပလဲၤအိၣ်လၢဃိာ်ပူၤန့ၣ် ပမၤဘၣ်ကစၢ်ယွၤ အတၢ်မၤ ဂ့ၤဒိၣ်န့ၢ်ဒံး ပအိၣ်ဘၣ်လၢတၢ်ချၢ” န့ၣ်လီၤ.

လၢသီတၢ်အိၣ်ဖှိၣ်တဖၣ်အသိး, တၢ်ဘၣ်မၤအၢမၤနးန့ၣ် ဒုးအိၣ်ထီၣ်တၢ်သးခုဖးဒိၣ်န့ၣ်လီၤ. “တၢ်မၤအၢမၤနးတၢ်အိၣ်ဖှိၣ်လၢ ယရူၤရှလ့ၣ်နးမး” (မၤတၢ် ၈:၁) အဃိ, “ၦၤလၢအလီၤပြံလီၤပြါတဖၣ်, လဲၤစံၣ်တဲၤတဲလီၤ တၢ်ကလုၢ်ကထါသကုၤဆးဒး” (:၄) န့ၣ်လီၤ. တၢ်အစၢန့ၣ် မ့ၢ်ဝဲဒၣ် “တၢ်သးခုဖးဒိၣ်” အိၣ်ဝဲလၢ ၡၤမရံ အဝ့ၢ် (:၈) န့ၣ်လီၤ.

ဟီၣ်ခိၣ်အတၢ်စိတၢ်ကမီၤတဖၣ် ထီဒါ တၢ်မ့ၢ်တၢ်တီ, ဒီးလံာ်စီဆှံအတၢ်သိၣ်လိသီလိတၢ်တဖၣ်, လီၤဆီဒၣ်တၢ် လၢကစၢ်ခရံၣ်အတၢ်သးခုကစီၣ်န့ၣ်, တမ့ၢ်လၢပကဘၣ် ပျၢ်စုပျၢ်ခီၣ်အကတီၢ်ဘၣ်. ဖဲခရံာ်အတၢ်အိၣ်ဖှိၣ် ဘၣ်ကွၢ်ဆၢၣ်မဲာ်ဒီးတၢ်ကီတၢ်ခဲတဖၣ်အကတီၢ်, ကစၢ်ယွၤ နုာ်လီၤမၤတၢ် ခီဖျိကျိၤကျဲလၢအဂံၢ်သဟီၣ်ဆူၣ်အပူၤန့ၣ်လီၤ.

စီၤပ့းတရူး စံးဝဲဒၣ်လၢ “တၢ်လ့ပစီမ့ၣ်အူအိၣ်လၢသုကျါလၢအဟဲဝဲဒ်သိး အကမၤကွၢ်သုန့ၣ်, သုတကမၢကမၣ်လၢအဃိႇ ဒ်တၢ်လီၤဆီဘၣ်သုအသိးန့ၣ်တဂ့ၤ” (၁ ပ့း ၄:၁၂). “သုမ့ၢ်ဘၣ်တၢ်ဒုၣ်ဒွၣ်လၢခရံာ်အမံၤအဃိဒီး, သုဘၣ်တၢ်ဆိၣ်ဂ့ၤလီၤ. အဂ့ၢ်ဒ်အံၤ, တၢ်လၤကပီၤအသးဒီး ယွၤအသးအိၣ်ဝဲဆိးဝဲလၢသုလိၤ” (:၁၄) န့ၣ်လီၤ. ကစၢ်ယွၤ အိၣ်ဒီးအစိကမီၤလၢ ကဆီတလဲကွံာ်တၢ်မၤအၢမၤနးဆူ တၢ်လၢအလုၢ်ဒိၣ်
ၦ့ၤဒိၣ်တမံၤမံၤန့ၣ်လီၤ.