အၤဟရိၣ် (Aaron) အပၢ် သံလဲၤပူၤကွံာ်ဟီၣ်ခိၣ်ဝံၤတယံာ်ဘၣ်န့ၣ်, လၢတၢ်တဆိကမိၣ်အပူၤ, အဝဲဟ့ၣ် အမိၢ်လၢ “တၢ်ဂီၤအလဲၢ်အိၣ်ဝဲဒၣ်ထဲသိးဒီး ဖိၣ်စထၢၣ် (poster)
တဘ့ၣ်,” ဒီးအပူၤန့ၣ် တၢ်ဂ့ၢ်အါကလုာ်လၢ ပာ်ဖျါထီၣ်အပၢ်အသးသမူ အတၢ်ဂီၤဖိတဖၣ်လၢအမ့ၢ်, တၢ်ကြၢးပာ်ဖှိၣ်ဟံးဃာ်တဖၣ်, တၢ်ဂီၤ, လၢၢ်လ့, လံာ်လဲၢ်တဖၣ်, စုသ့အတၢ်မၤဃံမၤလၤပိးလီဖိတဖၣ်, ဒီးတၢ်အဂုၤအဂၤတဖၣ်အါမး- တၢ်တမံၤစုာ်စုာ်န့ၣ် အိၣ်ဒီးအခီပညီဒၣ်ဝဲန့ၣ်လီၤ. ဒ်သိးကပာ်ဖှိၣ်ရဲၣ်ကျဲၤ တၢ်သ့ၣ်တဖၣ်အံၤအဂီၢ်, အၤဟရိၣ် ဘၣ်ဟ့ၣ်ဝဲတၢ်ဆၢကတီၢ် အါနံၤအါသီ, မ့မ့ၢ် အဒ့မုၣ် ရ့ခၠၢၣ် (Rachel) န့ၣ် ဖီၣ်ဒိန့ၢ်ဝဲဒၣ် တၢ်လၢအဝဲၢ်ခွါမၤတ့ၢ်ဝဲတဖၣ် အဂီၤန့ၣ်လီၤ. တၢ်ဟ့ၣ်လီၤဆီအံၤ မ့ၢ်တၢ်လၢ
ပထံၣ်န့ၢ်အီၤသ့, တၢ်ဂီၤတဘ့ၣ်လၢ အဟ့ၣ်တၢ်ယူးယီၣ် မၤလၤကပီၤအပၢ်န့ၣ်လီၤ. နံၣ်လၢအဆံတဖၣ်အပူၤ, အပၢ်န့ၣ် ဘၣ်ဂဲၤလိာ်ဝဲဒၣ်လၢ တၢ်သးဆါလီၤက့ၤအနီၢ်ကစၢ်ဒၣ်ဝဲ, ဒီးတၢ်သးစဲထီလၢ ကသံၣ်မူၤဘှိးအပူၤဒၣ်လဲာ်, အပၢ် အဲၣ်ဝဲဒၣ် အဝဲသ့ၣ်န့ၣ် သမၢဝဲဒၣ်အလီၢ်တအိၣ်နီတဘျီဘၣ်န့ၣ်လီၤ. မ့ၢ်စ့ၢ်ကီး တၢ်အုၣ်သးတမံၤလၢ ကစၢ်ယွၤ အတၢ်အဲၣ်, ဒီးတၢ်ယါဘျါ အစိကမီၤလီၤလး, လၢပျဲအဝဲသ့ၣ်အပၢ်မၤနၢၤ တၢ်သးစဲထီကသံၣ်မူၤဘှိး, လၢသးသမူ ဆံဆဲၣ်နံၣ်အပူၤန့ၣ်လီၤ.
ကစၢ်ယွၤ အပှၤဂီၢ်မုၢ်တဖၣ် လဲၤဝဲဆူ ကီၢ်တၢ်စံးပာ်, တၢ်ဆၢကတီၢ်ယံာ်ဝဲဒၣ် အနံၣ် ၄၀ ဝံၤအလီၢ်ခံန့ၣ်, လၢ ပှၤအံၣ်စရ့လး တဆံခံဒူၣ်အကျါ, တဒူၣ်စုာ်စုာ်န့ၣ် စီၤယိၤရှူ ဃုထၢဝဲ ပှၤတဂၤစုာ်စုာ် ကဘၣ်ဟံးန့ၢ် လၢၢ်တဆံခံဖျၢၣ်, လၢထံကျိယၢ်ဒ့ၣ်အပူၤ ဒ်သိးကကဲထီၣ် “တၢ်သ့ၣ်နီၣ်လၢအဝဲသ့ၣ်အဂီၢ်” (ယိၤရှူ ၄:၁-၆) န့ၣ်လီၤ. စီၤယိၤရှူ စူးကါလၢၢ်သ့ၣ်တဖၣ်အံၤ လၢတၢ်တ့ထီၣ် တၢ်လုၢ်လီၢ်, ဒီးထီဘိတၢ်ဟ့ၣ်ယူးယီၣ်မၤလၤကပီၤ ကစၢ်ယွၤအစိအကမီၤ, ဒီးဆီၣ်ထွဲမၤစၢၤတၢ် (:၁၉-၂၄) အဂီၢ်န့ၣ်လီၤ. ပှၤအံၣ်စရ့လးဖိတဖၣ် အတၢ်လဲၤန့ၣ် တမ့ၢ်တၢ်အညီဘၣ်. ဘၣ်ဆၣ်, ကစၢ်ယွၤ လဲၤတၢ်ဒီးအပှၤဂီၢ်မုၢ်, ဟ့ၣ်ဝဲထံအိၣ်ဟဲဟးထီၣ်လၢလၢၢ်, ဟ့ၣ်ဝဲကိၣ်မၤနၤ အိၣ်ဟဲလီၤလၢမူခိၣ်, ဒီးနဲၣ်ဆှၢ
အပှၤဂီၢ်မုၢ်လၢ တၢ်အၢၣ်ထူၣ်လၢနံၤဒီးမ့ၣ်အူထူၣ်လၢနၤ- ဒီးအကူအသိး တလီၢ်လံၤဘၣ် (၅ မိၤ ၈:၄) န့ၣ်လီၤ. တၢ်မၤသ့ၣ်နီၣ်ထီၣ်က့ၤတၢ်န့ၣ် နဲၣ်ဝဲဒၣ် ကစၢ်ယွၤန့ၣ်လီၤ.
ကစၢ်ယွၤ မၤတၢ်လီၤကမၢကမၣ်တဖၣ်န့ၣ်လီၤ. ဒ်ကစၢ်ယွၤ ဟ့ၣ်မၤလၢမၤပှဲၤတၢ် အသိး, မ်ပကပာ်လီၤတဲာ်တ့ၢ် တၢ်ဟ့ၣ်ယူးယီၣ်မၤလၤကပီၤ ကစၢ်ယွၤ အတၢ်အဲၣ်, ဒီး အစိအကမီၤလီၤထူလီၤယိာ်န့ၣ်တက့ၢ်.
