ပှၤလိာ်ကွဲအမဲရကၤ ဖျၢၣ်ထူအခိၣ် စံၣ် ကၠ့ၢ် စထရီး (C. J. Stroud) မ့ၢ် ပှၤသးစၢ်, အိၣ်ဒီးတၤလၣ်, ဒီးစူၢ်က့ၤနာ်က့ၤ ကစၢ်ယ့ၣ်ရှူး, လၢအတအိၣ်ဒီးတၢ်မဲာ်ဆှးန့ၣ်လီၤ. တၢ်လိာ်ကွဲဖျၢၣ်ထူ အတၢ်ဖံးတၢ်မၤ, လၢအပတီၢ်ထီလီးဆီတမံၤအံၤ ပှၤမၤညီနုၢ်သ့ဝဲဒၣ်ထဲ ၃.၃ နံၣ် အတီၢ်ပူၤ, ဒ်အမ့ၢ်ဝဲတီဝဲအသိး, စထရီး တဲဖျါထီၣ် အတၢ်နာ်အိၣ်သူၣ်လီၤသးဖဲလဲၣ်အဂ့ၢ်, ဒီးစံးဝဲဒၣ် “တၢ်လိာ်ကွဲဖျၢၣ်ထူန့ၣ် အိၣ်ဒီးတၢ်ဆီတလဲအါမးန့ၣ်လီၤ. ဘၣ်ဆၣ်, တုၤမုၢ်နံၤတနံၤ လဲၤပူၤကွံာ်ဝံၤန့ၣ်ဒီး, တၢ်ခဲလၢာ်မ့ၢ်ဒၣ် တၢ်အခီၣ်ထံးခီၣ်ဘိလၢနဟံးဃာ်န့ၣ်လီၤ. ဒီးတၢ်အခီၣ်ထံးခီၣ်ဘိလၢ ယဟံးဃာ်ဂၢၢ်ဂၢၢ်ကျၢၤကျၢၤ မ့ၢ်ဝဲဒၣ်ယတၢ်စူၢ်တၢ်နာ်” န့ၣ်လီၤ.
တၢ်လိာ်ကွဲဖျၢၣ်ထူ, (မ့) တၢ်လုၢ်အီၣ်သးသမူ အတၢ်ဖံးတၢ်မၤတမံၤဂ့ၤတမံၤဂ့ၤန့ၣ်, တမ့ၢ်တၢ်အိၣ်မူအလီၢ်ကဝီၤ ထဲတတီၤဧိၤ, လၢအအိၣ်ဒီးတၢ်အထီၣ်အလီၤ, တၢ်ဆီတလဲတဖၣ်ဘၣ်. လံာ်မးသဲ ၇:၁၄-၂၇ အပူၤန့ၣ် ကစၢ်ယ့ၣ်ရှူး ဟ့ၣ်ဒိပာ်ဖျါထီၣ် ဟံၣ်ခံဖျၢၣ်တူၢ်ဘၣ်ခီၣ်ဘၣ် တၢ်ဟဲစူၤလီၤ, ထံလုာ်ဘၢ, ဒီးကလံၤအူဆူၣ်အဂ့ၢ်န့ၣ်လီၤ. ဘၣ်ဆၣ်, ထဲဒၣ်ဟံၣ်တဖျၢၣ်န့ၣ် တူၢ်ဆၢခီၣ်ဆၢန့ၢ်ဝဲဒၣ် ကလံၤမုၢ်တွၤ, “အဂ့ၢ်ဒ်အံၤ, အခီၣ်ထံးသူၣ် အသးလၢလၢၢ်ခိၣ်” (:၂၅), လၢတၢ်သိၣ်လိနဲၣ်လိ အပျဲၢ်အဘီၣ်တဖၣ်အဂီၢ်န့ၣ်, မ့ၢ်ဝဲဒၣ် ကစၢ်ခရံာ် အတၢ်ကတိၤဟ့ၣ်ဒိ (:၂၄, ၂၆) န့ၣ်လီၤ.
မ့ၢ်ဝဲလီၤ. တၢ်အိၣ်မူလၢဟီၣ်ခိၣ်အံၤ ကလံၤမုၢ်တွၤတဖၣ် အိၣ်ဝဲဒၣ်န့ၣ်လီၤ. တၢ်ဆူးတၢ်ဆါ, ဒီးတၢ်ကီတၢ်ခဲအဂုၤအဂၤလၢ ပဂံၢ်ဒွးတန့ၢ်တသ့တဖၣ် ကဝံၣ်တရံးဝံၣ်တရး, ဒီးကမၤဟးဂီၤပတၢ်အိၣ်မူအိၣ်ဂဲၤသ့ဝဲဒၣ်န့ၣ်လီၤ. တၢ်အိၣ်မူအိၣ်ဂဲၤ စံးတၢ်န့ၣ် တမ့ၢ်လၢ “အတူၢ်ဆၢခီၣ်ဆၢကလံၤမုၢ်န့ၢ်” ဝဲဘၣ်. မ့မ့ၢ် တၢ်တ့သူၣ်ထီၣ် ပတၢ်အိၣ်မူလၢ ကစၢ်ယ့ၣ်ရှူး, ဒီးအတၢ်သိၣ်လိသီလိ- ပ “တၢ်အခီၣ်ထံး” နီၢ်နီၢ် (ကွၢ် ၁ ကရံၣ် ၃:၁၁) အလိၤ, ဒီးကဒုးအိၣ်ထီၣ်တၢ်လီၤဆီ လၢပတၢ်အိၣ်မူန့ၣ်လီၤ. ဖဲလၢသးသမူကလံၤမုၢ်တွၤ ဟဲဝဲဒၣ်န့ၣ်ဒီး, ပှၤလၢ တတူၢ်လိာ် တၢ်ဟံးဃာ်ဂၢၢ်ကျၢၤ ကစၢ်ခရံာ်တဖၣ်အဂီၢ်, တၢ်ဘၣ်ဒိဘၣ်ထံးကအါဝဲဒၣ်န့ၣ်လီၤ. ဘၣ်ဆၣ်, ပှၤလၢအဒိကနၣ် ကစၢ်ယ့ၣ်ရှူး အကလုၢ်တဖၣ် ကအိၣ်ဂၢၢ်ဆိးကျၢၤဝဲဒၣ် “ဒီးတၢ်ဟဲစူၤဒီးထံလုၢ်ဘၢတၢ်, ဒီးကလံၤအူဘၣ်တၢ်ဒီးဘၣ်ဝဲလၢ ဟံၣ်တဖျၢၣ်န့ၣ်လီၤ. ဒီးတလီၤပှီၢ်ဘၣ်ဝဲဘၣ်. အဂ့ၢ်ဒ်အံၤ, အခီၣ်ထံးသူၣ်အသးလၢ လၢၢ်ခိၣ်” (မး ၇:၂၅) အဃိ န့ၣ်လီၤ. တၢ်သ့ၣ်တဖၣ်အံၤ မ့ၢ်ဝဲဒၣ် ပတၢ်အခီၣ်ထံးနီၢ်နီၢ်န့ၣ်လီၤ.
