ဖဲ ၂၀၂၁ နံၣ်, စတါထရဲး (Star trek) စဲအ့ၣ်တၢ်ဂီၤမူ အခွါဂဲၤဒိ ဝ့လယၢၣ် ရှဲးထနၢၣ် (William Shatner) တဂၤ, ဒိးန့ၢ်ခွဲးယာ် လၢကဘၣ်လဲၤဝဲဒၣ်ဆူ မူပျီ, လၢပူပျီကဟၣ်အဒၢးတဒၢးအဃိ, မုာ်လၤသးခုဝဲဒၣ်န့ၣ်လီၤ. လၢခံန့ၣ်, ဖဲအဝဲကွၢ်ဆိကမိၣ်ထံက့ၤ အတၢ်လဲၤအဂ့ၢ်, ဒီးစံးဝဲဒၣ် တၢ်လဲၤခီဖျိလၢ အမုၢ်လၢ်ဆိပာ်ဝဲတဖၣ်န့ၣ် ကမူၤကမၣ်ဝဲဒၣ်ကိးမံၤဒဲးန့ၣ်လီၤ. အဝဲဆိကမိၣ်ထံၣ်ဆိပာ်ဝဲလၢ မူပျီဖးလဲၣ်အတၢ်ဒိၣ် တၢ်မုၢ်န့ၣ် ကဟ့ၣ်အီၤ သးအတၢ်သ့ၣ်ညါဒိၣ်ဒိၣ်ယိာ်ယိာ်တမံၤ, လၢအဘၣ်ထွဲလိာ်သးဒီးတၢ်သးသမူတဖၣ်ခဲလၢာ်န့ၣ်လီၤ. ဘၣ်ဆၣ်, လၢတၢ်သ့ၣ်တဖၣ်အလီၢ်န့ၣ်, အသးကလၢၢ်ဘၣ် တၢ်သူၣ်အုးသးအုးဒိၣ်ဒိၣ်ကလဲာ်, ဖဲအထံၣ်ဝဲဒၣ်မူပျီအတၢ်ခံးသူန့ၣ် တၢ်ခုၣ်, ဒီးတၢ်တအိၣ်ဝဲဒၣ်နီတမံၤ, လၢအဟ့ၣ်အီၤတၢ်သ့ၣ်ညါအသီ ဒ်အမ့ၢ်ဝဲဒၣ် ဟီၣ်ခိၣ်ဖျၢၣ် အတၢ်ဃံတၢ်လၤ, ဒီးအတၢ်ဘၣ်ဒိဘၣ်ထံးညီဝဲဒၣ်အဂ့ၢ်န့ၣ်လီၤ.

လၢမူပျီအပူၤန့ၣ်, ပှၤဒိးန့ၢ်ဝဲခွဲးယာ်လၢ တၢ်လဲၤဟးကွၢ်ကီသူၣ်ပိၢ်သးဝးဘၣ်ဝဲလၢအနီၢ်ကစၢ်ဒၣ်ဝဲန့ၣ် အိၣ်ဝဲဒၣ်ထဲပှၤစှၤဂၤဧိၤန့ၣ်လီၤ. လံာ်စီဆှံအပူၤ, ကစၢ်ယွၤ စုအတၢ်ဘၣ်တ့ အတၢ်မၤလၢ စးကဝာ်အပူၤအဂ့ၢ်န့ၣ် ကွဲမုာ်ပှၤ ဒ်သိးပကထံၣ် ယွၤအတၢ်ဘၣ်တ့တဖၣ် ခီဖျိလၢ ယွၤအတၢ်ထံၣ်န့ၣ်လီၤ. တၢ်ကွဲးနီၣ်ပာ်ဖျါ ကစၢ်ယွၤ အတၢ်မၤအဆိကတၢၢ်အဂ့ၢ်န့ၣ် ယွၤတ့လီၤ “မူခိၣ်ဒီးဟီၣ်ခိၣ်,” ခီဖျိလၢရဲၣ်ကျဲၤမၤဘၣ်လိာ်က့ၤ, တၢ်လၢ “အိၣ်သယုၢ်ဒီးအိၣ်ကလီ,” “ဒီးနီၤဖးတၢ်ကပီၤဒီးတၢ်ခံးအဆၢ” (၁ မိၤ ၁:၁-၂,၄) န့ၣ်လီၤ. တၢ်ဘၣ်တ့အဂၤ, လၢအိၣ်လီၤတဲာ်တ့ၢ်တဖၣ်အဂ့ၢ်အကျိၤန့ၣ် ကစၢ်ယွၤ တ့လီၤ သ့ၣ်မုၢ်ဝၣ်ဘိတဖၣ်, ဆၣ်ဖိကီၢ်ဖိတဖၣ်, ဒီးလၢတၢ်ဘၣ်တ့အကျါ, အဒိၣ်အထီကတၢၢ်န့ၣ် တ့လီၤဝဲ ပှၤကညီတဖၣ်လၢ အိၣ်ဒီးယွၤအက့ၢ်အဂီၤ- လၢအပာ်ဖျါထီၣ် ကယဲၢ်တၢ်အဂ့ၤအဝါခဲလၢာ်န့ၣ်လီၤ.

ဖဲလၢကစၢ်ယွၤ အတၢ်ဘၣ်တ့ခဲလၢာ်- တုၤဒၣ်လဲာ် တၢ်ခံးသူအယိာ်ကတၢၢ်, တၢ်လဲၤတုၤမူပျီ အယံၤကတၢၢ်န့ၣ်, လီၣ်ဖျါထီၣ် ကစၢ်ယွၤ အစိကမီၤ, ဒီးအဂံၢ်ဘါသ့တၢ်လၢာ်, ဒီးတကတီၢ်ဃီန့ၣ်, ဟ့ၣ်ပှၤတၢ်ထံၣ်ဆိကမိၣ်လီၤဆီဆူ ကစၢ်ယွၤ အတၢ်မၤ, လၢဟီၣ်ခိၣ်အံၤန့ၣ်လီၤ. ဒ်သိးပကဘူၣ်ထီၣ်ဘါထီၣ် ပှၤလၢအတ့လီၤတၢ်ခဲလၢာ်တဂၤအံၤအဂီၢ်, တၢ်ဃံတၢ်လၤလၢ ပခိၣ်ပဃၢၤဝးဝးတဖၣ်န့ၣ် ထုးန့ၢ် ဝဲဒၣ်ပသူၣ်ပသးဒိၣ်မးန့ၣ်လီၤ.