ဖရဲဒရ့း ဘံးနၣ် (Frederick Buechner) တၢ်စံၣ်စိၤတဲစိၤ အလံာ်တၢ်တဲပူ “ဘရဲၣ်ဒဲၢ်” (Brendan) ဘူးထီၣ်အကတၢၢ်န့ၣ် တၢ်ဂ့ၢ်လၢ အလီၤသူၣ်ပိၢ်သးဝး အိၣ်ဝဲဒၣ်န့ၣ်လီၤ. ပှၤဂဲၤဒိတၢ်ဖိ က့ဒး(စ) (Gildas) ဒ်သိးကပာ်ဖျါထီၣ်အခီၣ်တခီလၢ အိၣ်တုၤဒၣ်ဖဲ ခီၣ်လ့ၢ်ခိၣ် (ဒီးဆူညါတအိၣ်လၢၤ) အဂီၢ်, ဆၢထၢၣ်ထီၣ်ဝဲဒၣ်န့ၣ်လီၤ. ဖဲအဝဲဟံးန့ၢ် အနီၣ်ထိးန့ၣ်ဒီး, ဂဲၤဆၢထၢၣ်ထိၣ်လိၤအသးတန့ၢ်လၢၤဘၣ်အဃိ, ဘရဲၣ်ဒဲၢ် ဘၣ်စံၣ်ဂဲၤဆၢထၢၣ် ဖီၣ်ဃာ် က့ဒး(စ) န့ၣ်လီၤ.

က့ဒး(စ) စံးဘၣ်အီၤ “ယဟူးတသ့ဂဲၤတသ့ ဒ်ဟီၣ်ခိၣ်လၢအခံးအပူၤ” န့ၣ်လီၤ. ဘရဲၣ်ဒဲၢ် တဲဝဲဒၣ်လၢ “တၢ်မ့ၢ်ကဲထီၣ်အသး ဒ်သိးအံၤန့ၣ်ဒီး, ပဝဲခံဂၤအကျါ, ပှၤလၢဟူးတသ့ဂဲၤတသ့န့ၣ် ကမ့ၢ်မတၤလဲၣ်” န့ၣ်လီၤ. “ဖဲပလီၤဃံၤအကတီၢ်, ဒ်သိးပကမၤစၢၤလိာ်သးအဂီၢ်န့ၣ်လီၤ. အကတၢၢ်, တၢ်အံၤ ကမ့ၢ်တၢ်မၤအကါဒိၣ်ထဲတမံၤဧိၤသ့ၣ်သ့ၣ်” န့ၣ်လီၤ.

၂ ရှမူၤအ့လး အဆၢဒိၣ် ၉ အပူၤန့ၣ်, ပကထံၣ်ဘၣ် စီၤပၤဒၤဝံး အသးအိၣ်ပာ်ဖျါတၢ်အဲၣ်တၢ်သးကညီၤဆူ စီၤပၤ စီၤစီလူး အပှၤဟံၣ်ဖိဃီဖိအကျါ ပှၤလၢအိၣ်မူတ့ၢ်ဒံးကိးဂၤဒဲး (:၁) န့ၣ်လီၤ. ဖဲန့ၣ် ပှၤအိၣ်ဝဲဒၣ် စီၤမဖံဘိၤရှ့း, လၢအမ့ၢ် “စီၤယိၤနၤသၣ်အဖိခွါ လၢအခီၣ်ဟးဂီၤ ခံခီလိာ်” (:၃) တဂၤန့ၣ်လီၤ. တၢ်ဆှၢနုာ်လီၤ စီၤမဖံဘိၤရှ့းန့ၣ်ဆူ စီၤပၤအမဲာ်ညါ, ဒီးနၢ်ဟူဝဲ တၢ်ကတိၤတဖၣ်အံၤ “ယကဟ့ၣ်က့ၤနၤလၢ နပၢ် စီၤစီလူး အဟီၣ်ခိၣ်ခဲလၢာ်, ဒီးနဘၣ်အီၣ်တၢ်အီတၢ်လၢ ယစီၢ်နီၤခိၣ် တထံၣ်ဃီ” (:၇) န့ၣ်လီၤ. ဒ်တၢ်စံးဘၣ်အီၤအသိး, မၤဘၣ်ဝဲဒၣ် ထီဘိန့ၣ်လီၤ.

ယွၤအကလုၢ်ကထါအပူၤ. အိၣ်ပှဲၤဒီးစီၤဒၤဝံး, ဒီးပှၤဖးဒိၣ်တဖၣ်, ဒီးသုးမုၢ်သံၣ်ဘိတဖၣ်, ဒီးစီၤပၤတဖၣ်, ဒီးဘီမုၢ်တဖၣ်, တၢ်ဂ့ၢ်တဖၣ် လၢအလီၤဂာ်ဒီးတၢ်ဂီၤမူအက့ၢ်အဂီၤ, တၢ်လၢပသးပ့ၤနီၣ်တသ့တဖၣ်န့ၣ်လီၤ. ဘၣ်ဆၣ်, လံာ်စီဆှံန့ၣ် သ့ၣ်နီၣ်ပၣ်ဖျါထီၣ်ဝဲ တၢ်အဲၣ်တၢ်သးကညီၤ, လၢအလီၤသူၣ်ပိၢ်သးဝးတမံၤအံၤ ဘၣ်တၢ်ဟ့ၣ်လီၤဝဲဆူ ပှၤလၢအလိၣ်ဘၣ်တၢ်တဂၤအအိၣ်- ပှၤတဂၤ မၤဂ့ၤမၤစၢၤဝဲဒၣ် ပှၤအဂၤတဂၤအဂ့ၢ်န့ၣ်လီၤ.

အကတၢၢ်န့ၣ်, တၢ်ဒုးနဲၣ်အဒိၣ်ဖျိဖျိဖျါဖျါတဖၣ်ခဲလၢာ် ဒံကွံာ်လီၤမၢ်ကွံာ်ကယီယီဝံၤ, တၢ်အဲၣ်သူၣ်ကညီၤသးကညီၤလၢ စီၤဒၤဝံး ယူာ်ဃီၤဝဲဆူ စီၤမဖံဘိးရှ့း အအိၣ်န့ၣ် မ့ၢ်ဝဲဒၣ်တၢ်မၤအမိၢ်ပှၢ်လၢ အကါဒိၣ်ကတၢၢ်တမံၤန့ၣ်လီၤ. တၢ်မၤဂ့ၤမၤစၢၤလိာ်သး မ့ၢ်တၢ်မၤတကလုၢ်လၢ ပဝဲနၤဒီးယၤ, ပကဘၣ်မၤဝဲဒၣ်ကိးမုၢ်နံၤဒဲးန့ၣ်လီၤ.