တၢ်လၢယဖံဖံ ညီနုၢ်မၤဝဲလၢ မုၢ်ဘူၣ်နံၤအနၤန့ၣ် အိၣ်ဝဲတမံၤန့ၣ်လီၤ. တချုးလဲၤနုာ်လီၤဆူ တၢ်မံလီၢ်ဒံးဘၣ်န့ၣ်, ရဲၣ်လီၤပာ် ဆ့ကူဆ့ကၤ,ဃုာ်ဒီးခီၣ်ဖံးရှူတဖၣ်, တိာ်ပာ်ဝဲ ဒ်သိးကလဲၤကူသိးဝဲဒၣ် ဖဲအလဲၤထီၣ်ဘါယွၤ လၢမုၢ်အိၣ်ဘှံးနံၤအဂီၢ်န့ၣ်လီၤ. ယဖံလဲၤထီၣ်ဂီၤတၢ်ဘါထီဘိအဃိ, အဝဲအဲၣ်ဒိးအိၣ်ကတဲာ်ကတီၤပာ်အသးလၢ ကဂဲၤဆၢထၢၣ်လဲၤဝဲဒၣ်, လၢခံတဂီၤန့ၣ် ဒ်သိးဒီးတၢ်မၤယံာ်မၤနီၢ် အသုတအိၣ်ဝဲ နီတမံၤအဂီၢ်န့ၣ်လီၤ. ဘၣ်ဖဲမုၢ်ဘူၣ်အမုၢ်နံၤတနၤန့ၣ်, ယဖံဘၣ်တၢ်ဆှၢအီၤဆူ တၢ်ဆါဟံၣ် သတူၢ်ကလာ်န့ၣ်လီၤ. လၢခံန့ၣ်, ကစၢ်ယ့ၣ်ရှူး ကိးက့ၤအီၤ, ဒီးလဲၤပူၤကွံာ်ဟီၣ်ခိၣ်န့ၣ်လီၤ. ဖဲယဖုဟဲက့ၤလၢတၢ်ဆါဟံၣ်, ဒီးတုၤဆူဟံၣ်န့ၣ်ဒီး, ထံၣ်ဝဲဒၣ် ယဖံအကူအသိးတဖၣ် အိၣ်ရဲၣ်လီၤဃာ်အသးန့ၣ်လီၤ. ဖံဖံအိၣ်ကတဲာ်ကတီၤတ့ၢ်လံအသးလၢ ကလဲၤဆူတၢ်ဘါယွၤသရိာ်အဂီၢ်, ဒီးတကတီၢ်ဃီန့ၣ်ကထံၣ်လိာ် အသးဒီးကစၢ်ယွၤအဂီၢ်န့ၣ်လီၤ.

ယဖံအလုၢ်အလၢ်အံၤ ဒုးသ့ၣ်နီၣ်ထီၣ်ယၤ တလးမူးပိာ်မုၣ်တဖၣ် အတၢ်ကူၣ်သ့, လၢပူဟ့ၣ်ဒိတယုၢ် ဖျါဖဲလံာ်မးသဲ ၂၅ အပူၤန့ၣ်လီၤ. ပူတယုၢ်အံၤအပူၤန့ၣ်, ကစၢ်ခရံာ်စံးဘၣ် အပျဲၢ်အဘီၣ်တဖၣ် ဒ်သိးကအိၣ်ကတဲာ်ကတီၤအသးလၢ အတၢ်ဟဲက့ၤကဒါက့ၤတၢ်အဂီၢ်န့ၣ်လီၤ. အဆၢဖိ ၁၃ ပာ်ဖျါဝဲလၢ “ဆိးသီတက့ၢ်. အဂ့ၢ်ဒ်အံၤ, အနံၤအသီမ့ၢ်ဂ့ၤ, အနၣ်ရံၣ်မ့ၢ်ဂ့ၤ, သုတသ့ၣ်ညါဘၣ်” န့ၣ်လီၤ. လၢတၢ်န့ၣ်အဃိ, ပကဘၣ်မ့ၢ် ပှၤကူၣ်သ့ကူၣ်ဘၣ် လၢအိၣ်ကတဲာ်ကတီၤပာ်ပသးန့ၣ်လီၤ. တၢ်ကတဲာ်ကတီၤပသးအဂီၢ်, ပမ့ၢ်အိၣ်ခိးတုၤတၢ်ဆၢကတီၢ်ဘူးတ့ၢ်လံန့ၣ်ဒီး, ပကလီၤဂာ် ဒ်ပှၤဟးဂီၤဖိတဖၣ် (:၃) န့ၣ်လီၤ. မ့ၢ်လၢပှၤဟးဂီၤဖိတဖၣ် တအိၣ်ကတဲာ်ကတီၤပာ်အသး ဂ့ၤဂ့ၤဘၣ်ဘၣ်အဃိ, အမ့ၣ်အူဒၢတဖၣ်န့ၣ် အသိတအိၣ်ဘၣ်. ဒီးဖဲအဝဲသ့ၣ်ဟးထီၣ် လဲၤမၤပှဲၤအမ့ၣ်အူဒၢတဖၣ်လၢသိအကတီၢ်န့ၣ်, တလးမူပိာ်ခွါဟဲဝဲဒၣ်န့ၣ်လီၤ.

တလိၣ်လၢ ပကဘၣ်ကတဲာ်ကတီၤ ရဲၣ်လီၤ ပကူပသိးတဖၣ်, ဒ်ယဖံအသိးဘၣ်ဆၣ်, ယဖံအလုၢ်အလၢ်အံၤ ဒုးနဲၣ်ဖျါထီၣ် အသးအိၣ်ကတဲာ်ကတီၤပာ်အသးလၢ တၢ်လဲၤထီၣ်ဘါယွၤလၢသရိာ်,ဃုာ်ဒီးအတၢ်အုၣ်က့ၤခီၣ်က့ၤကစၢ်အဂီၢ်စ့ၢ်ကီးန့ၣ်လီၤ. မ်ပကစူးကါ ယဖံအတၢ်ကူၣ်သ့လၢ ပတၢ်အိၣ်မူအပူၤ ပကအိၣ်ကတဲာ်ကတီၤပသး လၢတၢ်အကါဒိၣ်ကတၢၢ်တဖၣ်အဂီၢ်, ဒီးဒ်ကစၢ်ယ့ၣ်ရှူး နဲၣ်ဆှၢပှၤအသိး, ပကမၤအတၢ်မၤ, ဒီးအိၣ်ကတဲာ်ကတီၤပသးလၢ အတၢ်ဟဲက့ၤကဒါက့ၤတၢ်အဂီၢ်န့ၣ်တက့ၢ်.