“မဲးခၢၣ် စပး” (Michael Sparks) လဲၤနုာ်လီၤဆူ ကျးတဖျၢၣ်လၢ ပှၤဆါတၢ်ဖိတၢ်လံၤ အလီၢ်လံၤတဖၣ် (a thrift store), ဒီးပှ့ၤန့ၢ်ဝဲဒၣ် တၢ်သ့ၣ်နီၣ်အပနီၣ် ကီၢ်အမဲရကၤအလံာ်ဘိးဘၣ်သ့ၣ်ညါတၢ်သဘျ့ (The US Declaration of Independence) အလံာ်ကွဲးဒိတဘ့ၣ် လၢစ့ ၂.၄၈ ဒီလၣ်န့ၣ်လီၤ. လၢခံန့ၣ်, ဖဲအဝဲကွၢ်အလံာ်ကွဲးဒိအံၤ လီၤတံၢ်လီၤဆဲးန့ၣ်ဒီး, အသးကလၢၢ်ဘၣ်ဝဲလၢ တၢ်လီၤဆီတမံၤမံၤ ကအိၣ်ဝဲဒၣ်န့ၣ်လီၤ. လၢတၢ်န့ၣ်အဃိ, မၢဝဲဒၣ် ပှၤစဲၣ်နီၤတဖၣ် ကွၢ်ထံကွၢ်ဆးဆၢတဲာ်အကံၢ်အစီ, ဒီးပှၤစံးဘၣ်အီၤလၢ လံာ်ကွဲးဒိအဘ့ၣ်ခံကယၤလၢ အဘၣ်တၢ်ထုးထီၣ်ရၤလီၤအီၤတဖၣ်, ခီဖျိလၢ “ကၠီ ကွ့ၤစံၣ် အဒါ(န)” (John Quincy Adams) အတၢ်ပျဲ, ဖဲ ၁၈၂၀ နံၣ်, ဒီးခ့ခါအကတီၢ်န့ၣ် အိၣ်တ့ၢ်ဒၣ်ထဲ ၃၆ ဘ့ၣ်, ဒီးလံာ်ကွဲးဒိလၢ အပှ့ၤဝဲန့ၣ် မ့ၢ် လံာ် ၃၆ ဘ့ၣ်အကျါတဘ့ၣ်န့ၣ်လီၤ. ဖဲန့ၣ် စပး ဆါက့ၤ အလံာ်ဘိးဘၣ်သ့ၣ်ညါလၢ အအိၣ်တ့ၢ်စှၤမးတဘ့ၣ်အံၤ လၢစ့ ၄၇၇,၆၅၀ ဒီလၣ်န့ၣ်လီၤ.

တၢ်ပှ့ၤန့ၢ် တၢ်လုၢ်ဒိၣ်ပှ့ၤဒိၣ်အံၤ လၢအပှ့ၤစှၤစှၤဖိန့ၣ် မ့ၢ်တၢ်လီၤကမၢကမၣ်တမံၤ ဘၣ်ဆၣ်, တၢ်လုၢ်ဒိၣ်ပှ့ၤဒိၣ်တမံၤလၢ ဂ့ၤဒိၣ်န့ၢ်ဝဲ, ဒီးတၢ်ထိၣ်အပှ့ၤ တန့ၢ်တသ့ဘၣ်န့ၣ် အိၣ်ဝဲဒၣ်န့ၣ်လီၤ. တၢ်လုၢ်ဒိၣ်ပှ့ၤဒိၣ်တမံၤလၢ အလုၢ်အပှ့ၤဒိၣ်မး, လၢတၢ်ထိၣ်သတြီၤအီၤတသ့, အိၣ်ဂၢၢ်ဆိးကျၢၤအထူအယိာ်, လၢယတဟ့ၣ်ဘၣ်စ့နီတဘ့ၣ်န့ၣ် ယဃုထံၣ်န့ၢ်ယဲ ဖဲယနီၢ်ဆံးဒံးအကတီၢ်န့ၣ်လီၤ. ဘၣ်ဆၣ်, တမ့ၢ်ယထံၣ်န့ၢ်အီၤ ဖဲတၢ်ဆါတၢ်ပှ့ၤတၢ်အလီၢ်လံၤတဖၣ်အကျးန့ၣ်ဘၣ်.

ယမိၢ်ယပၢ် ဒုးနဲၣ်ယၤပှၤတဂၤ, ပှၤကိးအီၤလၢ ကစၢ်ယ့ၣ်ရှူး, ပှ့ၤန့ၢ်တၢ်ဟ့ၣ်အံၤ ခီဖျိဟ့ၣ်လီၤကွံာ်အသးသမူ လၢထူၣ်စုညါအလိၤ ဒ်တၢ်လုၢ်တၢ်ပာ်လၢ ယတၢ်ဒဲးဘးအဂီၢ်န့ၣ်လီၤ. ယမိၢ်ယပၢ် တဲဘၣ်ယၤလၢ တၢ်ဟ့ၣ်အံၤမ့ၢ် တၢ်အုၣ်က့ၤခီၣ်က့ၤန့ၣ်လီၤ. တၢ်ဟ့ၣ်အံၤ အၢၣ်လီၤပှၤ တၢ်ထူးတၢ်တီၤလၢ “တၢ်မူဒီး,……န့ၢ်ဘၣ်အါအါကလဲာ်” (ယိၤ ၁၀:၁၀) ပကဒိးန့ၢ်ဘၣ် လၢဟီၣ်ခိၣ်အံၤ, ဒီး “တၢ်မူအထူအယိာ်… လၢအဖိခွါ” လၢကစၢ်ယ့ၣ်ရှူးအပူၤ (၁ ယိၤ ၅:၁၁) န့ၣ်လီၤ. ခီဖျိယစူၢ်က့ၤနာ်က့ၤအီၤ, ဒီးယတူၢ်လိာ်တၢ်ဟ့ၣ်အံၤန့ၣ်လီၤ.

တၢ်ထံၣ်န့ၢ် ဟီၣ်ခိၣ်အတၢ်လုၢ်ဒိၣ်ပှ့ၤဒိၣ်တမံၤ လၢအပှ့ၤစှၤစှၤဖိန့ၣ် မ့ၢ်တၢ်လီၤကမၢကမၣ်ဘၣ်ဆၣ်, ပထိၣ်သတြီၤအီၤလၢ တၢ်လုၢ်ဒိၣ်ပှ့ၤဒိၣ်လီၤထူလီၤယိာ်, လၢကစၢ်ခရံာ် ဟ့ၣ်ကလီၤပှၤန့ၣ် တသ့ဘၣ်. တၢ်လုၢ်ဒိၣ်ပှ့ၤဒိၣ်အံၤ ဘၣ်တၢ်ဟ့ၣ်လီၤဝဲဆူ ပှၤတဂၤလၢ်လၢ်အအိၣ်, ကဒိးန့ၢ်ဝဲဒၣ် ခီဖျိလၢ “စူၢ်က့ၤနာ်က့ၤယွၤအဖိခွါအမံၤ” (:၁၃), လၢအမ့ၢ်ကစၢ်ယ့ၣ်ရှူးန့ၣ်လီၤ.