ဘၢၣ်လၣ်ရံ (Valerie) အိၣ်ဆိးဝဲဒၣ်လၢ ပီၣ်လဲၣ်ကၢၢ်နံၤ အဝ့ၢ်ဖိတဝ့ၢ်, ဒီးအဝဲဘၣ်သူၣ်ဘၣ်သးလၢ မူခိၣ်ကလံၤသီၣ်ဂီၤကိၢ်လၢၤ, ဒီးအဝဲအဲၣ်စ့ၢ်ကီးတၢ်ဒိန့ၢ်တၢ်မံၤလာ် ဆၣ်ဖိ ကီၢ်ဖိတဖၣ်အဂီၤ, ဒီးလဲၤစုၣ်လီၤအသးလၢ ထံကျါန့ၣ်လီၤ. လၢတၢ်ခဲလၢာ်အဖီခိၣ်န့ၣ်, အဝဲအဲၣ်ကွၢ်ကီ မုၢ်ဟဲထီၣ်လၢပီၣ်လဲၣ်မိၢ်ပှၢ်အဖီခိၣ်န့ၣ်လီၤ. တချုးလၢမုၢ်ဆ့ၣ်ဝါထီၣ် ကိးဂီၤဒဲးန့ၣ်, အဝဲပၢၢ်ထီၣ် အိၣ်ခိးကွၢ်ကီ ထံအတၢ်ဃံတၢ်လၤန့ၣ်လီၤ. ဘၢၣ် ဆိကမိၣ်တိာ်ပာ်ဝဲလၢ, တၢ်အၢၣ်မ့ၢ်ဘၢ (မ့) တၢ်လဲၤတၢ်က့ၤ မ့ၢ်အိၣ်ဒၣ်လဲာ်, ရဲၣ်ကျဲၤအသး ဒ်သိးကထံၣ်ဘၣ်မုၢ်ဟဲထီၣ်လၢ ထံဖီခိၣ် အါန့ၢ် အဘျီသၢကယၤ လၢတနံၣ်အတီၢ်ပူၤန့ၣ်လီၤ. တၢ်အိၣ်ခိးကွၢ်မုၢ်ဟဲထီၣ်န့ၣ် ဘၢၣ် တလီၤဘှံးဝဲဒၣ်နီတဘျီဘၣ်. လၢအဂီၢ် အဝဲထံၣ်ဝဲဒၣ် မုၢ်ဟဲထီၣ်န့ၣ် အိၣ်ပှဲၤဒီးအလၤကပီၤ, ဒီးမ့ၢ်တၢ်လၢအတအဲၣ်ဒိးပျဲလဲၤပူၤကွံာ်ဘၣ်န့ၣ်လီၤ.

လံာ် ၂ မိၤ ၃၄:၂၉-၃၅ အပူၤန့ၣ်, ပကဖးဘၣ် စီၤမိၤရှ့ အမဲာ်ဖံးကပီၤကပြုၢ်ကပြီၤ, တၢ်လၢအဆဲးကပီၤဖျါထီၣ်က့ၤ အတၢ်ထံၣ်လိာ်သးဒီး “ကစၢ်ယွၤ” အဂ့ၢ်န့ၣ်လီၤ. ၂ ကရံၣ်သူး ၃:၇-၈ န့ၣ်, စီၤပီလူး စံးဝဲဒၣ် စးထီၣ်လၢ ကစၢ်ယ့ၣ်ရှူး ဟဲဝဲန့ၣ်, ကစၢ်ယွၤ အတၢ်မၤလၢ အအိၣ်ပှဲၤဒီးအလၤကပီၤန့ၣ် ဒိၣ်န့ၢ် တၢ်လၢ စီၤမိၤရှ့ လဲၤခီဖျိဘၣ်ဝဲန့ၣ်လီၤ. တၢ်မၤအံၤ, မ့ၢ်သးစီဆှံအတၢ်မၤ, လၢအဟဲစိာ်န့ၢ်တၢ်တီတၢ်လိၤ (:၈-၉) န့ၣ်လီၤ. တၢ်အုၣ်က့ၤခီၣ်က့ၤအဂီၢ် ယွၤအတၢ်တိာ်ကျဲၤန့ၣ်, အိၣ်ပှဲၤဒီးတၢ်လၤတၢ်ကပီၤ အဂၢၢ်အကျၢၤ, ဒီးဒိၣ်န့ၢ်အါန့ၢ် ကယဲၢ်တၢ်ခဲလၢာ် အိၣ်ဟဲဝဲဒၣ်လၢ အမဲာ်ညါတဖၣ် (:၁၀), ဒီးပပာ်ဃုာ်ဝဲဒၣ်လၢ ယွၤအတၢ်တိာ်ကျဲၤအပူၤန့ၣ်လီၤ. အဆၢဖိ ၁၈ အပူၤန့ၣ်, ပှၤတၢ်မၢဖိစံးဝဲဒၣ်, “ပဝဲဒၣ်ခဲလၢာ်အံၤ, ပမဲာ်တကျၢၢ်ဘၢဘၣ်ဒီး, ပကွၢ်ကစၢ်အလၤကပီၤ ဒ်လၢမဲာ်ထံကလၤအပူၤအသိးသတးဒီး, ပဘၣ် တၢ်လဲလိာ်ပသးဆူတၢ်အက့ၢ်အဂီၤတမံၤဃီၤအံၤ, လၢတၢ်လၤကပီၤဆူတၢ်လၤကပီၤ, ဒ်လၢကစၢ်အသးအသိး” န့ၣ်လီၤ. တၢ်လၤကပီၤ လၢအဒိၣ်ထီၣ်အါထီၣ်ဝဲဒၣ် တမံၤအံၤန့ၣ်, တသန့ၤထီၣ်အသးလၢ ပမၤတၢ်ဂ့ၤတၢ်ဝါဆံးအါဆံးအါလဲၣ်န့ၣ်ဘၣ်. မ့မ့ၢ်သန့ၤထီၣ်အသး လၢသးစီဆှံအလိၤန့ၣ်လီၤ. ဖဲမုၢ်ဟဲထီၣ်အကတီၢ် ဒ်တၢ်အၢၣ်တဖၣ်ဖျါဝဲအသိး, ကိးနံၤဒဲးန့ၣ်, ပဆဲးကပီၤ ပာ်ဖျါအါထီၣ်, ကစၢ်ယွၤအတၢ်မၤ လၢအိၣ်ပှဲၤဒီးတၢ်လၤတၢ်ကပီၤ, ဒီးပကပာ်ဖျါဂ့ၤထီၣ်တပတီၢ်ဘၣ်တပတီၢ်န့ၣ်တက့ၢ်.