ယတံၤသကိး ရၤဟ့ (Rahim) စံးဝဲဒၣ်, “ယမိၢ် မ့ၢ်တဃ့ထုကဖၣ်တၢ်လၢယဂီၢ်န့ၣ်, မုၢ်မဆါတနံၤအံၤ မ့ၢ်ယကအိၣ်ဖဲလဲၣ်န့ၣ် ယတသ့ၣ်ညါဘၣ်. ယဆိကမိၣ် တမ့ၢ်လၢယကအိၣ်မူအိၣ်ဂဲၤလၢၤဘၣ်.” လၢအပူၤကွံာ်န့ၣ်, အဝဲမ့ၢ် ပှၤစူးကါကသံၣ်မူဘှိးတဂၤ, ဒီးဘၣ်လီၤဃိာ် ခီဖျိလၢတၢ်ဆါတၢ်ပှ့ၤ ကသံၣ်မူၤဘှိးအဃိန့ၣ်လီၤ. ဘၣ်တနံၤ, ဖဲပအီသကိး ခီဖံၣ်အကတီၢ်, အဝဲတဲဘၣ်ယၤလၢ အမိၢ်အတၢ်ထုကဖၣ်တဖၣ် ဒုးအိၣ်ထီၣ် တၢ်လီၤဆီလၢ အတၢ်အိၣ်မူအပူၤအဂ့ၢ်န့ၣ်လီၤ. “ယမၤဟးဂီၤ ယမိၢ်အသးဒိၣ်ဒိၣ် မုၢ်မုၢ်ဒၣ်လဲာ်, ခီဖျိလၢအတၢ်ထုကဖၣ်တဖၣ်အပူၤန့ၣ် ယမိၢ်အဲၣ်ဘၣ်ယၤအဖၢမုၢ်န့ၣ်လီၤ. ယဘၣ်ကီဘၣ်ခဲအါမးဘၣ်ဆၣ်, ယမိၢ် မ့ၢ်တဃ့ထုကဖၣ်တၢ်လၢယဂီၢ်န့ၣ်ဒီး, ယတၢ်အိၣ်မူကနးဒိၣ်ဝဲဒၣ်န့ၣ် ယသ့ၣ်ညါယဲန့ၣ်လီၤ.”
လံာ်စီဆှံအလီၢ်လံၤတကကြူၢ် ပာ်ဖျါထီၣ်ဝဲ စီၤရှမူၤအ့လးအဂ့ၢ်အဂၤတမံၤ, ဒ်အမ့ၢ် ပှၤအိၣ်တီအိၣ်လိၤဒီးယွၤ,ဃုာ်ဒီးပှၤဂုၤပှၤဂၤတဖၣ် ခီဖျိလၢတၢ်ထုကဖၣ် န့ၣ်လီၤ. မုၢ်တနံၤဖဲ စီၤစီလူး ဘၣ်တၢ်ပာ်ထီၣ် ဒ်စီၤပၤ ဖဲကံးလကၤလးအကတီၢ်, ဝံရှမူၤအ့လးစ့ၢ်ကီး အသးဟးဂီၤဝဲဒၣ်န့ၣ်လီၤ. ခါဆူညါအဂီၢ်, ပှၤဂီၢ်မုၢ်တဖၣ် ပာ်ဝဲ အတၢ်နာ်, ဒီးအတၢ်မုၢ်လၢ်လၢ စီၤပၤအလိၤ, ဒီးတမ့ၢ်ဘၣ်လၢယွၤအပူၤဘၣ်န့ၣ်လီၤ.
၁ ရှမူၤ ၁၂:၁၆-၁၈ ပာ်ဖျါဝဲ, ဖဲပှၤဂီၢ်မုၢ်တဖၣ် ပာ်ဖှိၣ်ထီၣ်အသးအကတီၢ်, ကစၢ်ယွၤ တဘၣ်အသးန့ၣ် ဒုးနဲၣ်ဝဲဒၣ် ခီဖျိလၢကလံၤမုၢ်, လၢအဆၢအကတီၢ် တဘၣ်, ဒ်သိးကမၤပျံၤမၤဖုး ပှၤဂီၢ်မုၢ်, ဒီးပှၤဂီၢ်မုၢ် ကပီၢ်ယၢ်လီၤက့ၤအသးလၢ အတၢ်ဆၢတဲာ်အဂီၢ်န့ၣ်လီၤ. အဆၢဖိ ၂၃ န့ၣ် ပှၤဂီၢ်မုၢ် ဃ့ကညးဝဲ စီၤရှမူၤအ့လး ဒ်သိးကဃ့ထုကဖၣ်န့ၢ်တၢ်လၢ အဝဲသ့ၣ်အဂီၢ်န့ၣ်ဒီး, စံးဆၢဝဲဒၣ်လၢ, “ယဲဒၣ်အံၤလၢယဘါထုကဖၣ်န့ၣ်သုဂီၢ်န့ၣ် မ်ယသုတဆိတ့ၢ်ဒီးမၤကမၣ်ဘၣ်ယွၤတဂ့ၤ” န့ၣ်လီၤ.
စီၤရှမူၤအ့လး အတၢ်စံးဆၢက့ၤန့ၣ် ဒုးသ့ၣ်နီၣ်က့ၤပှၤလၢ တၢ်ဃ့ထုကဖၣ် န့ၢ်တၢ်လၢပှၤဂၤအဂီၢ်န့ၣ် မ့ၢ်ကျိၤကျဲတဘိလၢ ပပာ်ဆိ ကစၢ်ယွၤလၢပသးကံၢ်ပူၤ, ဒီးလၢပတၢ်အိၣ်မူအပူၤန့ၣ်လီၤ. ဖဲပအဲၣ်ပှၤဂၤ ခီဖျိလၢပထုကဖၣ်န့ၢ်တၢ်လၢပှၤဂၤအဂီၢ်န့ၣ်, မ့ၢ်ဒၣ်ပအိးထီၣ်တြဲၤ ဒ်သိးပကအုၣ်ပသးလၢ ထဲကစၢ်ယွၤတဂၤဧိၤ မၤသ့ဝဲဒၣ်န့ၣ်လီၤ. ပတအဲၣ်ဒိးလဲၤပူၤကွံာ် ခွဲးယာ်အံၤနီတဘျီဘၣ်န့ၣ်လီၤ.
