ယတံၤသကိး တဲဘၣ်ယၤလၢ အမံဝဲတန့ၢ်ဂ့ၤဂ့ၤဘၣ်အဂ့ၢ်န့ၣ်လီၤ. မံဝဲတန့ၢ်န့ၣ် ဘၣ်ထွဲလိာ်အသးဒီးဟံၣ်ဖိဃီဖိအတၢ်ဂ့ၢ်ကီတမံၤ, ဒီးတၢ်လၢအဒုးပၢၢ်ထီၣ်အီၤလၢမုၢ်နၤခီန့ၣ်လီၤ. တၢ်ဂ့ၢ်အံၤ အိၣ်ကဲထီၣ်အသး ဖဲမုၢ်နံၤတနံၤဃီ, လၢယကတဲာ်ကတီၤဃာ် ထါစံးထီၣ်ပတြၢၤ အယုၢ် ၃, ဒ်သိးပကစံးကတိၤမၤလိသကိး လၢပှၤသးပှၢ် မုၢ်အိၣ်ဘှံးနံၤတၢ်မၤလိအဂီၢ်န့ၣ်လီၤ.
ဖဲထါစံးထီၣ်ပတြၢၤ အယုၢ် ၃ အပူၤန့ၣ်, စီၤပၤစီၤဒၤဝံးစ့ၢ်ကီး, ဘၣ်ကွၢ်ဆၢၣ်မဲာ်ဟံၣ်ဖိဃီဖိအတၢ်ဂ့ၢ်ကီတမံၤ, လၢပဝဲအါဂၤအဂီၢ်, တၢ်ဂ့ၢ်တမံၤအံၤ ဒုးကဲထီၣ် တၢ်မံ တန့ၢ်သ့ဝဲဒၣ်န့ၣ်လီၤ. အဖိခွါ စီၤအးဘရှါလိၣ် ကူၣ်မၤဟးဂီၤ စီၤဒၤဝံး အတၢ်ပၢဆှၢ ပှၤအံၤစရ့လးဖိ, ဒ်သိးကပာ်လီၤအီၤလၢစီၤပၤအလီၢ်, ဒီးကဟံးန့ၢ်အပၢ်အလီၢ်န့ၣ်လီၤ.
စီၤဒၤဝံး အသးဟးဂီၤဝဲဒၣ်န့ၣ်လီၤ. ၂ ရှမူၤ ၁၅:၁၃ န့ၣ် ပှၤစိာ်ဆှၢတၢ်ကစီၣ်တဂၤ စံးဘၣ်အီၤလၢ, “ပှၤအံၣ်စရ့လးဖိတဖၣ် မၤလံတၢ်သူၣ်တီသးရၤအတၢ်အၢၣ်လီၤအီလီၤဒီးစီၤအးဘၡါလိၣ်လံ” န့ၣ်ဒီး, ဘၣ်ဃ့ၢ်ပူၤဖျဲးအသးလၢ ဝ့ၢ်ယရူၤရှလ့ၣ်န့ၣ်လီၤ. ဖဲထါစံးထီၣ်ပတြၢၤ ၃:၁ အပူၤန့ၣ်, စီၤပၤဒၤဝံး ပာ်ဖျါထီၣ် အတၢ်အိၣ်သး- ဒီးစံးဝဲဒၣ်လၢ “ယွၤဧၢ, ယအိၣ်ဒီးယဒုၣ်ယဒါအါမး” န့ၣ်လီၤ.
ဘၣ်ဆၣ်, စီၤပၤစီၤဒၤဝံး ဃုထံၣ်န့ၢ် သးအတၢ်မုာ်တၢ်ပၢၤဒ်လဲၣ်န့ၣ် ပာ်သူၣ်ပာ်သးနဲတက့ၢ်. စီၤဒၤဝံး ယၢၤထီၣ်ကဒါက့ၤဝဲလၢ ကစၢ်ယွၤ မ့ၢ်ကတီၤတဘ့ၣ်လၢ အဒီတဒၢအီၤ, ဒီးပှၤလၢ “ဒုးမိာ်ထီၣ်အခိၣ်” တဂၤ (:၃) န့ၣ်လီၤ. ပတၢ်အိၣ်အသးတဖၣ်အဃိ, ပသူၣ်ကိၢ်သးဂီၤတၢ်အကတီၢ်, ကယဲၢ်တၢ်မၤစၢၤလၢပလိၣ်ဘၣ်တဖၣ်ဟဲတုၤဝဲတကီၢ်ခါအဃိ, စီၤပၤစီၤဒၤဝံး “မံလီၤဒီးမံသပ့ၤ” ဝဲဒၣ်န့ၣ်လီၤ. ဒီးဃုထံၣ်န့ၢ်ဝဲဒၣ်, “ယဖုသံနီၣ်ထီၣ်လီၤ. အဂ့ၢ်ဒ်အံၤ, ယွၤမၤစၢၤယၤ” (:၅) န့ၣ်လီၤ.
ယတံၤသကိး ဘၣ်ကွၢ်ဆၢၣ်မဲာ် တၢ်ဆၢကတီၢ်အကီအခဲအံၤန့ၣ်, မ့ၢ်တၢ်ကစီၣ်လၢအဂ့ၤန့ၣ်လီၤ. ဒီးပဝဲကိးဂၤဒဲး လၢအဘၣ်ကွၢ်ဆၢၣ်မဲာ် တၢ်အိၣ်အသးကီခဲ တဖၣ်, ဒီးမုၢ်နၤလၢပမံတန့ၢ်တဖၣ်အဂီၢ်, ပကစၢ်ယွၤ ဒီတဒၢကဟုကယာ်ပှၤ, ဒီးကဟ့ၣ်ပှၤ တၢ်အိၣ်ဘှံးန့ၣ်လီၤ. ဖဲပနာ်သန့ၤ ကစၢ်ယွၤ လၢာ်လၢာ်ဆ့ဆ့န့ၣ်ဒီး, ယွၤကမၤစၢၤပှၤ ဒ်သိး “ပကမံလီၤဒီးမံသပ့ၤ” ဝဲအဂီၢ် (:၅) န့ၣ်လီၤ.
