ယတံၤသကိး ဘ့(လ) (Bill) သံကွၢ်ယၤ “မ့ၢ်နအဲၣ်ဒိးထံၣ် ယတၢ်ပူၤလီၢ်တဖၣ်န့ၣ်ဧါ.” အပူၤကွံာ်နံၣ်တဖၣ်န့ၣ် အဝဲလီၤတဲာ်လၢဃီလိၤ, ဒီးအနီၢ်ကစၢ်အဖီလာ်တကပၤန့ၣ် သံတခီပၤန့ၣ်လီၤ. ခဲကနံၣ်အံၤ, ဖဲတၢ်ကွဲးကါအီၤအခါ, တၢ်ဖိဃၣ်နုာ်လီၤမၤဟးဂီၤတၢ် နးနးကျံၤကျံၤအဃိ, ဘၣ်ကူဆါယါဘျါအသးလၢ တၢ်ဆါဟံၣ်န့ၣ်လီၤ. ပစံးကတိၤ သကိး အတၢ်ကီတၢ်ခဲအသီတမံၤအံၤအဂ့ၢ်န့ၣ်ဒီး, အဝဲအိးထီၣ် အယၣ်လုး, ဒီးဒုးနဲၣ်ဝဲ အပူၤလီၢ်လၢအဘၣ်တၢ်ကွဲးကါကူဆါအီၤန့ၣ်လီၤ. ယသံကွၢ်အီၤ “နတၢ်ပူၤလီၢ်န့ၣ် ဆါဧၣ်” န့ၣ်ဒီး, စံးဆၢဝဲလၢ “ယတတူၢ်ဘၣ်တၢ်နီၤတမံၤဘၣ်” န့ၣ်လီၤ.’
အဝဲစံးကတိၤတၢ်ဝံၤ, ယသ့ၣ်ညါယဲဒၣ်တဘျီဃီ, ဒ်ယတံၤသကိးတဂၤအသိး ယသ့ၣ်ညါအီၤ လၢနံၣ်တဖၣ်အပူၤန့ၣ်, ခီဖျိလၢ အတၢ်ဘၣ်ဒိဘၣ်ထံးအဃိ, ဟူးဂဲၤဝဲ တန့ၢ်, အတၢ်ဆါတဆါစ့ၢ်ကီး တကလၢၢ်ဘၣ်ဝဲလၢၤဘၣ်န့ၣ် ယတသ့ၣ်ညါပာ်သူၣ် ပာ်သးဝဲဒၣ်ဘၣ်န့ၣ်လီၤ. လၢအတၢ်ဘၣ်ဒိဘၣ်ထံးအဃိ, ယကဘၣ်သ့ၣ်ညါနၢ်ပၢၢ် အါထီၣ် တၢ်လၢအတူၣ်ဘၣ်ခီၣ်ဘၣ်ဝဲကိးမုၢ်နံၤဒဲးဘၣ်ဆၣ်, မ့ၢ်လၢယတသူၣ်ကညီၤ သးကညီၤဘၣ်အီၤအဃိ, ယမဲာ်ဆှးလီၤက့ၤယသးဒၣ်ယဲန့ၣ်လီၤ.
ယတအိၣ်ဒီး တၢ်ကွၢ်ဆိကမိၣ်တၢ်လၢ ယတံၤသကိးအဂီၢ်န့ၣ် ဒုးသ့ၣ်နီၣ်ထီၣ်က့ၤယၤ တၢ်တမံၤ, လၢယူဒၤအစီၤပၤ ဃံးစကံယၤ မၤဝဲဒၣ်န့ၣ်လီၤ. ၂ စီၤ ၂၀:၁၇-၁၈ အပူၤန့ၣ် ဝံယရှါယၤ တဲဘၣ်အီၤလၢ မုၢ်တနံၤန့ၣ် ကယဲၢ်တၢ်အိၣ်လၢနဟံၣ်ပူၤတဖၣ် “တၢ်ကစိာ်ထီၣ်ကွံာ်အီၤဆူဘၤဘူၤလိၣ်,” ဒီး “ကစိာ်ထီၣ်ကွံာ်နဖိခွါလၢအလီၤစၢၤ လၢနၤ, လၢနထီၣ်ဖိ” န့ၣ်လီၤ. အဆၢဖိ ၁၉ ပာ်ဖျါဝဲ စီၤပၤဃံးစကံယၤ အတၢ်သူၣ်မံသးမံ, “ဒီးစံးဝဲဒၣ်, တၢ်ဃူတၢ်ဖိး, ဒီးတၢ်မ့ၢ်တၢ်တီကအိၣ်ဝဲလၢ ယမုၢ်နံၤတဖၣ်အပူၤန့ၣ် တမ့ၢ် ဘၣ်ဧါ” န့ၣ်လီၤ. အဝဲမ့ၢ် စီၤပၤလၢအဂ့ၤတဂၤဘၣ်ဆၣ်, ကွၢ်ဆိကမိၣ်ပညိၣ်ဝဲဒၣ်လၢ အနီၢ်ကစၢ်ဒၣ်ဝဲအဂီၢ်န့ၣ် အါန့ၢ်ဒံး ပှၤဂုၤပှၤဂၤတဖၣ် ကဘၣ်ကွၢ်ဆၢၣ်မဲာ်တၢ်တဖၣ်န့ၣ်လီၤ.
တၢ်မၤအံၤလီၤဆီလိာ်အသးဒီးကစၢ်ယွၤထဲလဲၣ်ညါလဲၣ်. ၁ယိၤ ၄:၁၀ န့ၣ် စီၤယိၤဟၣ် စံးဘၣ်ပှၤလၢ “တၢ်အံၤမ့ၢ်တၢ်အဲၣ်တၢ်ကွံ, လၢပအဲၣ်ယွၤတမ့ၢ်ဘၣ်. မ့ၢ်လၢအဝဲအဲၣ်ပှၤ, ဒီးမၢလီၤအဖိခွါ, ဒီးမၤပူၤမၤဖျဲးပတၢ်ဒဲးဘး” န့ၣ်လီၤ. ကစၢ်ယွၤ အသူၣ်အိၣ်သးအိၣ်ပှၤ ဒိၣ်ဒိၣ်ယိာ်ယိာ်အဃိ, ဒ်သိးပကအိၣ်မူအိၣ်ဂဲၤ လီၤထူလီၤယိာ်လၢ အတၢ်အဲၣ်အပူၤအဂီၢ်, တူၢ်ဝဲတၢ်နးတၢ်ဖှီၣ်လၢပဂီၢ်န့ၣ်လီၤ.
