ဘၣ်တဘျီန့ၣ် အီးစဖိး (Oxford) ကၠိဖိတဖၣ်အဂီၢ်, နံၣ်ကယၤ ၁၉, ပှၤအဲကလံးဖိ ပၤပၤ (Bishop), ဝ့လယၢၣ် ထဲ(မ)ပဲၣ် (William Temple), ဟ့ၣ်ဝဲတၢ်ကစီၣ်, ဒီးမၤကတၢၢ် အတၢ်ကစီၣ်လၢ ထါတၢ်သးဝံၣ် ‘တုၤယကွၢ်ထံ ထူၣ်ဖျၢၣ်လီၤလး’ (When I Survey the Wondrous Cross- ထါအသီ ၈၁) အပူၤ အတၢ်ကတိၤတဖၣ်န့ၣ်လီၤ. ဘၣ်ဆၣ်, ဟ့ၣ်ပလီၢ်ကၠိဖိတဖၣ်, ဒ်သိးအသုတသးဝံၣ်ဝဲလၢ တၢ်ပာ်သးကလီကလီတဂ့ၤအဂီၢ်န့ၣ်လီၤ. ထဲ(မ)ပဲၣ် စံးဝဲဒၣ် “တၢ်သးဝံၣ် အဖျၢၣ်တဖၣ် အခီပညီမ့ၢ်အိၣ်လၢသုဂီၢ်န့ၣ်ဒီး, သးဝံၣ်ထီၣ်ဒိၣ်ဒိၣ် လၢသူၣ်ဒီဖျၢၣ်သးဒီဖျၢၣ်န့ၣ်တက့ၢ်. အခီပညီမ့ၢ်တအိၣ်လၢသုဂီၢ်န့ၣ်ဒီး, အိၣ်ဘှ့ၣ်အိၣ်ဘှီၣ်န့ၣ်တက့ၢ်. လၢနဂီၢ် အခီပညီအိၣ်ဝဲဒၣ် တဆံးတက့ၢ်, ဒီးနမ့ၢ်အဲၣ်ဒိးလၢ အခီပညီအိၣ်အါထီၣ်န့ၣ်ဒီး, သးဝံၣ်အီၤ ကပုာ်လုးကဖီလီဖိန့ၣ်တက့ၢ်.” ဖဲကမျၢၢ်တဖၣ် ကွၢ်ဝဲဒၣ် တၢ်သးဝံၣ်အဖျၢၣ်တဖၣ်အကတီၢ်, အိၣ်ဘှ့ၣ်အိၣ်ဘှီၣ်ဝဲတစိာ်ဖိန့ၣ်လီၤ. ကမျၢၢ်အကလုၢ် လၢအကထိတဖၣ် စးထီၣ်သးဝံၣ်ဝဲဒၣ်လၢ အကလုၢ်ကသွံဒံဖိ, ဒီးဖဲတၢ်သးဝံၣ်အကတၢၢ်တကျိၤ ‘အတၢ်အဲၣ်ဒိၣ်အဃိ, ကြၢးဟ့ၣ် ယသး, နီၢ်ခိ, ယတၢ်ကိးမံၤ’ န့ၣ် သးဝံၣ်သတြီထီၣ်ဝဲဒိၣ်ဒိၣ်န့ၣ်လီၤ.
တၢ်စူၢ်က့ၤနာ်က့ၤ, ဒီးတၢ်ပိာ်ကစၢ်ယ့ၣ်ရှူးအခံန့ၣ် မ့ၢ်တၢ်ဃုထၢလၢအကါဒိၣ်တမံၤ, တၢ်ဃုထၢ ဒ်အမ့ၢ်တၢ်အၢၣ်လီၤသးဆူ တၢ်အဲၣ်လၢအဃ့ပှၤတၢ်လၢအအိၣ်ဒီးပှၤခဲလၢာ်အဃိ, အီးစဖိး ကၠိဖိတဖၣ် နၢ်ပၢၢ်ဝဲဒၣ် တၢ်စူၢ်က့ၤနာ်က့ၤ, ဒီးတၢ်ပိာ်ကစၢ်ယ့ၣ်ရှူးအခံ အတၢ်မ့ၢ်တၢ်နီၢ်နီၢ်န့ၣ်လီၤ. တၢ်လူၤပိာ် ကစၢ်ခရံာ်အခံန့ၣ် လိၣ်ဘၣ်ဝဲဒၣ် ပတၢ်အိၣ်မူဒီတစိၤ, ပနီၢ်ခိ, နီၢ်ကစၢ် ပတၢ်မ့ၢ်တၢ်ခဲလၢာ်န့ၣ်လီၤ. မး ၁၃:၂၄ အပူၤန့ၣ်ကစၢ်ယ့ၣ်ရှူး စံးဘၣ် အပျဲၢ်အဘီၣ်ဆှဲဆှဲဖိ ‘ပှၤမ့ၢ်မိၣ်ပိာ်အသး လၢယခံတဂၤဂၤန့ၣ်, မ်အညိကွံာ်အသးဒၣ်ဝဲ, ဒီးဟံးန့ၢ်အထူၣ်စုညါ ဒီးပိာ်ယခံတက့ၢ်’ န့ၣ်လီၤ. တၢ်ဃုထၢတမံၤအံၤ, ပှၤတကြၢးဃုထၢအီၤလၢ တၢ်ပာ်သးကလီကလီအပူၤ နီၤတဂၤဘၣ်န့ၣ်လီၤ.
တၢ်လူၤပိာ်ထွဲ ကစၢ်ယ့ၣ်ရှူးအခံ စံးတၢ်န့ၣ် မ့ၢ်ကျိၤကျဲတမံၤလၢ တၢ်ဃုထံၣ်န့ၢ် ပတၢ်သးခုအဒိၣ်ကတၢၢ်န့ၣ်လီၤ. ပကဃုထံၣ်န့ၢ်, တၢ်အိၣ်မူလၢ ပအဲၣ်ဒိးအီၤနီၢ်နီၢ်န့ၣ် မ့ၢ်တၢ်အိၣ်မူအိၣ်ဂဲၤဒီးကစၢ်ခရံာ်န့ၣ်လီၤ. တၢ်အံၤလီၤဂာ်ဒီး တၢ်ဂ့ၢ်ခံထံၣ်လၢအထီဒါလိာ်အသးဘၣ်ဆၣ်, နီၢ်နီၢ်န့ၣ်တထီဒါလိာ်အသးဘၣ်န့ၣ်လီၤ. ဘၣ်ဆၣ်, ပမ့ၢ်စံးဆၢမၤဆၢ ကစၢ်ယွၤ အတၢ်အဲၣ်, စူၢ်က့ၤနာ်က့ၤကစၢ်ခရံာ်, စူးကွံာ်ညိကွံာ် တၢ်အဲၣ်လီၤပသး, ဒီးတၢ်မိၣ်န့ၢ်သးလီၤ ကလီကလီတဖၣ်န့ၣ်ဒီး, ဒ်အဆၢဖိ ၂ ပာ်ဖျါဝဲအသိး, ပကထံၣ်န့ၢ် တၢ်လၢပသးဆၢမိၣ်န့ၢ်သးလီတၢ်တဖၣ်န့ၣ်လီၤ.
