ဘရဲၣ်ယၢၣ် (Brian) ဒုးနဲၣ်အသးဒီးကသံၣ်သရၣ် လၢအယါဘျါသးဖျၢၣ်တၢ်ဆါန့ၣ် ယံာ်ဝဲဒၣ်တနၣ်ရံၣ်ဘျဲၣ်လံန့ၣ်လီၤ. အတံၤသကိး အိၣ်ခိးအီၤလၢ တမှံၤအဒၢး, ဒီးဃ့ဘါထုကဖၣ်ဝဲဒၣ် အတံၤသကိးလၢ အိၣ်တဆူၣ်တဂၤ ကဒိးန့ၢ်ဝဲ တၢ်ကူၣ်သ့, ဒီးတၢ်ကယါဘျါက့ၤအီၤအဂီၢ်န့ၣ်လီၤ. အကတၢၢ်န့ၣ်, ဘရဲၣ်ယၢၣ် ဟဲက့ၤဝဲဒၣ်ဆူ တမှံၤအဒၢး, ဒီးကသံၣ်သရၣ်ဟ့ၣ်လီၤအီၤ လံာ်ကဘျံးတဖၣ်န့ၣ် ပၣ်လီၤဝဲလၢစီၢ်နီၤခိၣ်အလိၤ, ဒီးဒုးနဲၣ်အတံၤသကိး, ဒီးစံးကတိၤသကိးဝဲ ကျိၤကျဲဘၣ်ဃးဒီးတၢ်ကူဆါယါဘျါ အတၢ်အိၣ်အသးလၢ အလီၤပျံၤတမံၤအံၤအဂ့ၢ်န့ၣ်လီၤ. တၢ်ကူဆါယါဘျါလၢခံတဆီအဂီၢ်, အဝဲသ့ၣ်ခံဂၤ စံးကတိၤသကိးလိာ်သး ဒ်သိးဒီးကဘါထုကဖၣ်, ဒီးဃ့တၢ်ကူၣ်သ့လၢ ယွၤအအိၣ်န့ၣ်လီၤ. ဒီးဘရဲၣ်ယၢၣ် စံးဝဲဒၣ်, “ခါဆူညါတၢ်ကမၤ အသးတမံၤဂၤတမံၤန့ၣ်, ယအိၣ်ယဲဒၣ်လၢ ကစၢ်ယွၤအစုပူၤ” န့ၣ်လီၤ.

၂ စီၤ ၁၉:၁၄ ပာ်ဖျါဝဲ စီၤပၤဃံးစကံယၤ “သလၣ်ထီၣ်လံာ်လၢ ယွၤအမဲာ်ညါလီၤ.” လံာ်ပရၢအပူၤ တၢ်ကတိၤတဖၣ်န့ၣ် တမ့ၢ်တၢ်မၤပျံၤမၤဖုး တၢ်အိၣ်ဆူၣ်အိၣ်ချ့ဘၣ်. မ့မ့ၢ်
ပှၤအၤရှုၢ်ဖိ, ဒုၣ်ဒါလၢ အစိဒိၣ်ကမီၤဒိၣ် အတၢ်မၤပျံၤမၤဖုးတဖၣ် လၢအဒုးန့ၢ်ဝဲ ယူဒၤ အဝ့ၢ်အဂၢၢ်အကျၢၤတဖၣ်, ဒီးကတဲာ်ကတီၤအသးလၢ ကဒုးန့ၢ်ဝဲ ပှၤယူဒၤ အဝ့ၢ်ခိၣ် ယရူၤရှလ့ၣ်န့ၣ်လီၤ. အဆၢဖိ ၁၅-၁၉ န့ၣ် စီၤဃံးစကံယၤ ဃ့ဘါထုကဖၣ်ဝဲလၢ, “ယွၤအံၣ်စရ့လး အကစၢ်လၢ အအိၣ်လၢ ခ့ရူၣ် အဘၢၣ်စၢၤတဂၤဧၢ, နမ့ၢ်ကစၢ်နဲလၢ ဟီၣ်ခိၣ်အဘီအမုၢ် ခဲလၢာ်အဖီခိၣ်လီၤ. နတ့လီၤမူခိၣ်ဒီးဟီၣ်ခိၣ်လီၤ….. ဒီးခဲကနံၣ်အံၤ, ယွၤပကစၢ်ဧၢ, အုၣ်က့ၤခီၣ်က့ၤပှၤလၢ အစုပူၤတက့ၢ်” န့ၣ်လီၤ. တယံာ်ဘၣ်န့ၣ်ဒီး, ဝံယရှါယၤ ဆှၢလီၤတၢ်ကစီၣ်ဆူ စီၤပၤ ဃံးစက့ယၤအအိၣ်, ဒီးအဆၢဖိ ၂၀ န့ၣ် စံးဘၣ်အီၤလၢ, “ယွၤအံၣ်စရ့လး အကစၢ်စံးဝဲဒ်အံၤ, တၢ်လၢနဘါထုကဖၣ်ယၤ လၢအၤရှုၢ်အစီၤပၤ စၤနဃ့ရံာ် အဂ့ၢ်န့ၣ် ယနာ်ဟူလံ” န့ၣ်လီၤ. ဒီးအဆၢဖိ ၃၅ ပာ်ဖျါဝဲ “တၢ်လၢမုၢ်တနၤန့ၣ်” ယွၤအကလူးန့ၣ် ဟးထီၣ်, ဒီးကျီကွံာ် ပှၤကညီ တကလီၢ်ဃိးကလး ဒီးယဲၢ်ကထိ လၢအၤရှုၢ်သူၣ်ဒဲအပူၤ … ဒီးကွၢ်ကွၢ်, ပှၤတဖၣ်ခဲလၢာ်န့ၣ် မ့ၢ်ပှၤအစီၣ်လီၤ.

မုၢ်တနံၤအံၤ, ဖဲနဘၣ်ကွၢ်ဆၢၣ်မဲာ်တၢ် တမံၤဂ့ၤတမံၤဂ့ၤန့ၣ်, ပာ်ဖျါထီၣ်အီၤလၢ ကစၢ်ယွၤအမဲာ်ညါ, ဒ် ဖံ ၄:၆ ပာ်ဖျါဝဲ “ဘိးဘၣ်သ့ၣ်ညါယွၤလၢ နတၢ်အဲၣ်ဒိးတဖၣ်” အသိး
န့ၣ်တက့ၢ်. ကစၢ်ယွၤ ကဒိကနၣ်နၤ, ဒီးကအိၣ်ဒီးနၤန့ၣ်လီၤ. ဖဲလၢနသးကလၢၢ်ဘၣ် ယွၤအတၢ်ကူၣ်သ့, အတၢ်အဲၣ်, ဒီးအတၢ်မုၢ်လၢ်အကတီၢ်, နအိၣ်ဘှံးလၢ ကစၢ်ယွၤအစုပူၤ ကသ့ဝဲဒၣ်န့ၣ်လီၤ.