စဲးသံၣ် (Sethie) အဖိခွါ အသးအနံၣ်အလါအိၣ်ဝဲ သၢနံၣ် န့ၣ် ဘၣ်ထီၣ် တၢ်ဆါဟံၣ်, ဒီးလၢဟီၣ်ခိၣ်ဒီဘ့ၣ် ပှၤဃ့ဘါထုကဖၣ်ဝဲလၢအဂီၢ်န့ၣ် ပှၤကအိၣ်လၢအကထိန့ၣ်လီၤ. ဖဲကသံၣ်သရၣ်တဖၣ် တဲဝဲဒၣ် စဲးသံၣ်လၢ အဖိခွါ ရှံလိၣ် (Shiloh) တဂၤ “အခိၣ်နူၣ် အတၢ်ဟူးတၢ်ဂဲၤန့ၣ် တအိၣ်ဒီးတၢ်အခီပညီဘၣ်” န့ၣ်ဒီး, အဝဲကတိၤတၢ်ဒီးယၤ ခီဖျိလၢကွဲၤဒီနၢ်န့ၣ်လီၤ. အဝဲစံးဘၣ်ယၤလၢ “ဘၣ်တဘျီတဘျီန့ၣ်, ယပျံၤဘၣ်ယိၣ်ယဲလၢ ယတအိၣ်မူအိၣ်ဂဲၤလၢ တၢ်နာ်အလၢအပှဲၤဘၣ်န့ၣ်လီၤ.” “ယသ့ၣ်ညါယဲလၢ ကစၢ်ယွၤမၤဘျါ ရှံလိၣ် သ့ဝဲဒၣ်, ဒီးကပျဲ ရှံလိၣ်လၢ ကဟဲက့ၤဆူ ဟံၣ်ဃုာ်ဒီးပှၤန့ၣ်လီၤ. ကစၢ်ယွၤ မ့ၢ်မၤဘျါက့ၤ အတၢ်ဆါ, ခီဖျိလၢတၢ်ကိးက့ၤအီၤဆူ မူခိၣ်န့ၣ်ဒီး, သးအတၢ်မုာ်တၢ်ပၢၤကအိၣ်ဒီးယၤစ့ၢ်ကီးန့ၣ်လီၤ.” လၢတၢ်မၤလီၤတံၢ်အီၤအဂီၢ်, ယတဲအီၤလၢ ကစၢ်ယွၤနၢ်ပၢၢ် တၢ်သ့န့ၢ်ဒံး ကယဲၢ်ပှၤကညီတဖၣ်ခဲလၢာ်, “မ့ၢ်လၢနဟ့ၣ်လီၤနသးဆူ ကစၢ်ယွၤ အစုပူၤ ဝံၤလံ. တၢ်မၤအံၤ မ့ၢ်တၢ်နာ်အလၢအပှဲၤ” န့ၣ်လီၤ. စှၤသီပူၤကွံာ်ဝံၤ, ကစၢ်ယွၤ ကိးက့ၤဝဲအဖိလုၢ်ဒိၣ်ပှ့ၤဒိၣ်ဆူမူခိၣ်န့ၣ်လီၤ. အဖိခွါ အသးသမူလီၤမၢ်အဃိ, ဘၣ်ကျဲးစၢးဂဲၤလိၣ်ဝဲဒီး တၢ်သူၣ်အုးသးအုးဘၣ်ဆၣ်, စဲးသံၣ် စံးဘျုးကစၢ်ယွၤ, ဒီးကမျၢၢ်တဖၣ်လၢ အဃ့ဘါထုကဖၣ်တၢ်န့ၣ်လီၤ. အဝဲတဲဝဲ, “ယနာ်လၢ ယွၤန့ၣ်ဂ့ၤဝဲ, ဒီးမ့ၢ်ကစၢ်ယွၤအဖၢမုၢ်န့ၣ်လီၤ”
၁ ပ့း ၁:၆ စံးဘၣ်ပှၤ လၢဟီၣ်ခိၣ်ချၢအံၤ, တချုးလၢ ကစၢ်ယ့ၣ်ရှူး ဟဲကဒီးဝဲ လၢခံတဘျီန့ၣ်, ပကဘၣ် “သူၣ်အုးသးအုး တစိၢ်လၢ တၢ်လ့ပစီအါမံၤအဃိ” န့ၣ်လီၤ. တၢ်သးဘၣ်ဒိဆါ အမ့ၢ်အတီတဖၣ်အဃိ, အလီၢ်အိၣ်လၢ ပကဘၣ်ရဲၣ်ကျဲၤသုးကျဲၤ ပတၢ်သူၣ်ဟူးသးဂဲၤနီၢ်နီၢ်တဖၣ်န့ၣ်လီၤ. ဘၣ်ဆၣ်, ကယဲၢ်ပှၤကိးဂၤလၢ “အိၣ်ဖျဲၣ်ကဒီးအသီ” လၢကစၢ်ခရံာ်အပူၤတဖၣ် အတၢ်အိၣ်မူန့ၣ် ကအိၣ်ဂၢၢ်ဆိးကျၢၤဝဲလၢ တၢ်အဲၣ်ဘၣ်ကစၢ်ယ့ၣ်ရှူး(:၃), ဒီးကဘၣ် “တၢ်မၤလၢပှဲၤဒီး တၢ်လၤကပီၤဒီးတၢ်သးခု လၢပစံးတသ့ဘၣ်” န့ၣ်လီၤ(:၈). အဆၢဖိ ၉ စံးဘၣ်ပှၤ, ပစူၢ်က့ၤနာ်က့ၤ ကစၢ်ခရံာ် အကတၢၢ်အစၢန့ၣ် ကမ့ၢ်ဝဲ “တၢ်အုၣ်က့ၤခီၣ်က့ၤပသး” န့ၣ်လီၤ.
ဒ်သိးပကအိၣ်ဒီးတၢ်စူၢ်တၢ်နာ်အလၢအပှဲၤအဂီၢ်, သးစီဆှံ ဟ့ၣ်စိဟ့ၣ်ကမီၤပှၤ-ပကအိၣ်မူဃုာ်ဒီးပတၢ်ထုကဖၣ်, ဒီးပတၢ်အိၣ်အသးတဖၣ်န့ၣ် ပကဟ့ၣ်လီၤဆူ ကစၢ်ခရံာ် အအိၣ် လၢတၢ်နာ်အဂၢၢ်အကျၢၤအပူၤန့ၣ်လီၤ.
