ယတံၤသကိးမုၢ်တဂၤ, ဒ်အမ့ၢ်တီၤဖုၣ်ကၠိသရၣ်မုၣ်တဂၤန့ၣ်, ဘၣ်လဲၤဆှၢအပျဲၢ်တဖၣ်ဆူ တၢ်မၤလိတီၤဒၢးအဂၤတဖၣ်, လၢအမ့ၢ်တၢ်သူၣ်ဝံၣ်သးဆၢ, တၢ်ဒ့တၢ်အူ, ဒီးတၢ်တ့ခဲၣ်တၢ်ဂီၤသ့ၣ်တဖၣ်န့ၣ်လီၤ. ဒ်သိးကလဲၤဆူ တၢ်မၤလိဒၢးအဂၤအဂီၢ်, ဖဲသရၣ်မုၣ်မၢဝဲဒၣ် ယဲၢ်တီၤကၠိဖိတဖၣ် ရဲၣ်လီၤအသးန့ၣ်ဒီး, ကၠိဖိတဖၣ် ဂုာ်ဟံးန့ၢ်တၢ်လီၢ်, ဒီးကၠိဖိတနီၤန့ၣ် ဂုာ်ဟံးန့ၢ်တၢ်လီၢ်လၢ အမဲာ်ညါကတၢၢ်, တၢ်လီၢ်တၢ်ကျဲလၢပှၤကိးဂၤဒဲးအဲၣ်ဒိးဝဲန့ၣ်လီၤ. ဘၣ်ဖဲမုၢ်တနံၤန့ၣ်, ဂျဲနံၣ် (Jenni) မၤကမၢကမၣ် ကၠိဖိတဖၣ် ခီဖျိလၢဟံးန့ၢ်ဝဲဒၣ် တၢ်လီၢ်လၢအလီၢ်ခံကတၢၢ်န့ၣ်ဒီး, ကၠိဖိတဖၣ်န့ၣ်လၢတၢ်ကမၢကမၣ်အပူၤ, မၤသီၣ်ထီၣ် အကလုၢ်လၢ “တၢ်မနုၤလဲၣ်” န့ၣ်လီၤ.

ဖဲဟါတၢ်အီၣ်အစီၢ်နီၤခိၣ်အကတီၢ်န့ၣ်, ကစၢ်ယ့ၣ်ရှူး ပာ်သူၣ်ပာ်သးဝဲဒၣ်လၢ တၢ်ဂုာ်မၤန့ၢ်တၢ်လီၢ်တၢ်လၤဒ်သိးအံၤအဃိ, အဝဲစံးဆၢမၤဆၢဝဲဒၣ် ခီဖျိလၢပာ်ဖျါထီၣ် တၢ်ကတိၤဟ့ၣ်ဒိတထံၣ်, လၢအကဲထီၣ် တၢ်ကမၢကမၣ်နီၢ်နီၢ်ဆူ အပှၤသမှံၤလၢ အပိာ်အခံတဖၣ်အဂီၢ်န့ၣ်လီၤ. လူၤ ၁၄:၈-၁၀ န့ၣ် ကစၢ်ယ့ၣ်ရှူး စူးကါဝဲဒၣ် ပူတယုၢ်လၢ အဘၣ်ဃးဒီးတၢ်တူၢ်လိာ်မုာ် တၢ်တ့တၢ်ဖျီအမူးအဂ့ၢ်, ဒီးကစၢ်ယ့ၣ်ရှူး နဲၣ်လိပှၤဂီၢ်မုၣ်ဒ်သိး “အသုတဆ့ၣ်နီၤလၢ လီၢ်ဆ့ၣ်နီၤအဂ့ၤကတၢၢ်တဂ့ၤ,” မ့မ့ၢ် “ကလဲၤဆ့ၣ်နီၤသန့ၤလၢအလီၢ်လာ်ကတၢၢ်” န့ၣ်လီၤ. အဆၢဖိ ၁၁ န့ၣ် ကစၢ်ယ့ၣ်ရှူး စံးဝဲဒၣ် “အဂ့ၢ်ဒ်အံၤ, ပှၤလၢအပာ်ထီၣ်ထီအသးဒၣ်ဝဲ ကိးဂၤဒဲးန့ၣ်, ကဘၣ်တၢ်ဆီၣ်လီၤအီၤလီၤ. ဒီးပှၤလၢ အဆီၣ်လီၤအသးဒၣ်ဝဲန့ၣ်, ကမၣ်တၢ်ပာ်ထီၣ်ထီအီၤလီၤ,” ဒီးပာ်ဖျါထီၣ်ဝဲ အတၢ်သးတံာ်တာ် ဘၣ်ဃးဒီးပှၤကညီတဖၣ်အတၢ်ရ့လိာ်သးအထူသနူၤအဂ့ၢ်န့ၣ်လီၤ.

ပှၤကတူၢ်လိာ် ယွၤအဘီမုၢ်အတၢ်သိၣ်တၢ်သီတမံၤအံၤ ကဲထီၣ်တၢ်ဂ့ၢ်ကီသ့ဝဲဒၣ်, လီၤဆီဒၣ်တၢ်, ခါဆူညါ ဒ်သိးပကမ့ၢ် ပှၤအဆိကတၢၢ်အဂီၢ်, ခ့ခါအဆၢကတီၢ်န့ၣ် ပကဘၣ်ဃုထၢဝဲတၢ်လီၢ်လၢ အလီၢ်ခံကတၢၢ်ဘၣ်ဆၣ်, မ့ၢ်လၢပဝဲပှၤဟီၣ်ခိၣ်ဖိတဖၣ်တၢ်လ့ပစီလီၤဘၣ်ပှၤလၢ တၢ်ပညိၣ်ပာ်ဖှိၣ်ဒၣ်ထဲ “တၢ်မၤနၢၤတၢ်” န့ၣ်လီၤ. ဘၣ်ဆၣ်, ကစၢ်ခရံာ် ထိၣ်ဟူးထိၣ်ဂဲၤထီၣ်ပှၤလၢ ပကပိာ် အတၢ်အိၣ်မူဟ့ၣ်ဒိ, ဒီးကမ့ၢ်တၢ်မၤစၢၤလၢပကထိၣ်လိၤက့ၤ ပတၢ်ဆိကမိၣ်အဂီၢ် ပကကွၢ်ထီၣ်အီၤ, ဒ်သိးပကထံၣ်န့ၢ် တၢ်ဆီၣ်လီၤသး, အိၣ်ဆိးလၢတၢ်လီၢ်ခံကတၢၢ်, ဒီးလၢတၢ်လီၢ်အဖုၣ်, ဒ်အမ့ၢ် တၢ်လၤတၢ်ကပီၤ အလီၢ်အကျဲနီၢ်နီၢ်န့ၣ်လီၤ.