ဘၢး (BERT) တီၢ်ထီၣ်လံာ်ပျဲ လၢပှၤပှ့ၤတၢ်သ့ ခီဖျိတၢ်ဟံးန့ၢ်က့ၤ ကျိၣ်စ့အိၣ်ပာ်စၢၤ လၢစ့တၢးန့ၣ်လီၤ. ပှၤကွၢ်ထွဲတၢ်အီၣ်အကျးတဂၤ ဟံးန့ၢ်လံာ်ပျဲဝံၤ ထံၣ်ဝဲတၢ်ကွဲးလၢလံာ်ပျဲအလိၤ, ဒီးသံကွၢ်ဝဲဒၣ် “အိၣ်ခိး, ပှၤစံးဝဲလၢ, ‘ယဲဒၣ်အံၤယမ့ၢ်ကျဲ, တၢ်မ့ၢ်တၢ်တီ ဒီးတၢ်မူန့ၣ် မ့ၢ်မတၤတဂၤလဲၣ်. တၢ်ကတိၤလၢအပာ်ဖျါ တၢ်ဆိကမိၣ်အဂ့ၤန့ၣ်လီၤ.’” ဘၢး သ့ၣ်ညါနၢ်ပၢၢ်ဝဲလၢ ပှၤမၤတၢ်ဖိတဂၤအံၤ ကတိၤဆၢ ကစၢ်ယ့ၣ်ရှူး အတၢ်ကတိၤလၢလံာ်ပျဲအလိၤ, ဖျါဖဲ လံာ်ယိၤဟၣ် ၁၄:၆ အပူၤ, ဘၣ်တၢ်စဲကျံးအီၤလၢ ဘၢး အပှၤခရံာ်ဖိကျိၣ်စ့ခီပနံၣ်န့ၣ်လီၤ. ဘၢး အသူၣ်ခုသးခု မ့ၢ်လၢပှၤမၤတၢ်ဖိတဂၤ, အသးအိၣ် သ့ၣ်ညါတၢ်ဂ့ၢ်အံၤအဃိ, ဒီးတဲနၢ်ပၢၢ်အီၤလၢ “ပှၤတဂၤအံၤ” မ့ၢ်ပှၤလၢအလုၢ်ထီၣ်အသးသမူ ဒ်သိးကနဲၣ်ဆှၢပှၤဆူ ကစၢ်ယွၤအအိၣ်အဂ့ၢ်န့ၣ်လီၤ.

ဖဲပဘၣ်ကွၢ်ဆၢၣ်မဲာ်ဒီး ပှၤဂုၤပှၤဂၤ, ပှၤလၢအတသ့ၣ်ညါ ပတၢ်စူၢ်တၢ်နာ်နီတမံၤတဖၣ်န့ၣ်, ဘၣ်သ့ၣ်သ့ၣ် ပကစံးဆၢက့ၤအဝဲသ့ၣ်လၢ တၢ်နံၤဘၣ်ဖၣ်လဲ, ဒီးတၢ်စံၣ်ညီၣ်ဃၣ်ပှၤဂၤန့ၣ်လီၤ. ဘၣ်ဆၣ်, ၁ပ့း ၃:၁၅ ပာ်ဖျါထီၣ်ဝဲ ပှၤတၢ်မၢဖိ စီၤပ့းတရူး အတၢ်တၤပှၤ, ဒီးစံးဝဲဒၣ် “ကယဲၢ်ပှၤလၢအသံကွၢ်သုလၢ တၢ်မုၢ်လၢ်အိၣ်လၢသုပူၤအဂ့ၢ်အကျိၤကိးဂၤဒဲးန့ၣ်, အိၣ်ကတီၤသုသးထီဘိ လၢတၢ်စံးဆၢ” န့ၣ်လီၤ. ဝံၤန့ၣ်ဒီး, အဝဲဟ့ၣ်ပလီၢ်ပှၤလၢ “မ့မ့ၢ်လၢတၢ်သူၣ်စူၤသးစူၤဒီး တၢ်ပျံၤတၢ်ဖုးတက့ၢ်” န့ၣ်လီၤ. ကလီး ၄:၆ အပူၤန့ၣ် စီၤပီလူး ပာ်ဖျါထီၣ်ဝဲလၢ တၢ်စံးဆၢဒ်သိးအံၤ အစိကမီၤန့ၣ် မ့ၢ်ဝဲ “သုဂ့ၤစံးဆၢပှၤတဂၤလၢ်လၢ် ဒ်လဲၣ်ဒ်လဲၣ်, ဒ်သိးသုကသ့ၣ်ညါဒီး, မ်သုကလုၢ်ကထါအိၣ်ဒီးတၢ်ဘျုးတၢ်ဖှိၣ်ဒီး ဟီဒီးအံသၣ်တဘိယူၢ်ဃီတက့ၢ်” န့ၣ်လီၤ. ဒ်အံသၣ်ဒုးဂ့ၤအါထီၣ် ပတၢ်အီၣ်တၢ်အီအရီၣ်အသိး, တၢ်စံးဆၢ အဝံာ်အဘဲတဖၣ်န့ၣ် ကွဲမုာ်ဝဲဒၣ် ပှၤဂုၤပှၤဂၤတဖၣ် ဒ်သိးကဟဲသုးဘူးအသးဆူ ပတၢ်စူၢ်တၢ်နာ်အဂီၢ်န့ၣ်လီၤ.

တၢ်သံကွၢ်တဖၣ်န့ၣ် လၢတၢ်တဆိကမိၣ်အပူၤ, ဟဲခီဖျိသ့ဝဲဒၣ် လၢပှၤတသ့ၣ်ညါကစၢ်ခရံာ်လ့ၤတက့ၢ်အအိၣ်န့ၣ်လီၤ. ဖဲပစံးဆၢက့ၤတၢ် လၢတၢ်သူၣ်စူၤသးစူၤ, ဒီးလၢတၢ်ဘျုးတၢ်ဖှိၣ်အပူၤန့ၣ်, ပတၢ်စံးဆၢတဖၣ် မ့ၣ်အိၣ်ပှဲၤဒီးအံသၣ်အတၢ်ဟီ, လၢအထုးန့ၢ်သူၣ်န့ၢ်သးန့ၣ်ဒီး, ပှၤလၢအသံကွၢ်တၢ်တဖၣ် ကဆၢမိၣ်န့ၢ် သ့ၣ်ညါအါထီၣ်ဝဲဒၣ်
န့ၣ်လီၤ.