ဖဲအပၢ်ကွံာ်လီၤအတခွဲဆူ ထံကမါအပူၤန့ၣ်ဒီး, ဖိသ့ၣ်ခံနံၣ်ဖိ သီမၢး(စ) (Thomus) တဂၤ ဒ်အပၢ်မၤဝဲအသိး, မၤဒိးဝဲ, ဒီးကွံာ်လီၤ အတၢ်လိၣ်ကွဲ တခွဲဘိဖိဆူ ထံကျါန့ၣ်လီၤ. လၢခံန့ၣ်, ဖဲအဂဲၤဆၢထၢၣ်ဝဲလၢ ထံကမါအနံၤ ထံစှီၣ်အလီၢ်န့ၣ်ဒီး, သီမၢး(စ) ကျဲးစၢးမၤဒိးဝဲ ဒ်အပၢ်ကွံာ်လီၤကဒါက့ၤညၣ်ဆူ ထံကမါပူၤ, ခီဖျိလၢစုၣ်လီၤဘျၢတခွဲဘိဆူထံကျါ, ဒီး “ထဲးထီၣ်ဘှါဆှဲ” ထံဃံၢ်အထံးတဖၣ်န့ၣ်လီၤ. ဖဲအထဲးန့ၢ်ဝဲ ထံဃံၢ်တဘျီစုာ်စုာ်ဝံၤ, တချုးတ့ၢ်လီၤကဒါက့ၤ ထံဃံၣ်တဖၣ်ဆူ ထံကမါအပူၤန့ၣ် ဒ်သိးအပၢ်ကကမၢကမၣ်အဂီၢ်, သီမၢး(စ) စိာ်ကစီၤထီၣ် ထံဃံၣ်တဖၣ်လၢ အစုလိၤန့ၣ်လီၤ.
ပဆၢမၤလိန့ၢ်- တၢ်လၢအဂ့ၤအဝါ, ဒီးတၢ်လၢအတဂ့ၤခံမံၤလိာ်- ခီဖျိပအိၣ်ခိးကွၢ်, ဒီးပမၤဒိးပှၤဂုၤပှၤဂၤတဖၣ်န့ၣ်လီၤ. လၢတၢ်န့ၣ်အဃိ, လံာ်စီဆှံအသီတကတြူၢ်အပူၤန့ၣ်, ဘၣ်သ့ၣ်သ့ၣ် ကစၢ်ယ့ၣ်ရှူး အပျဲၢ်အဘီၣ်တဖၣ် ဘၣ်တၢ်ဟ့ၣ်ဂံၢ်ဟ့ၣ်ဘါအဝဲသ့ၣ်လၢ ကကွၢ်ဃီၤဝဲ တၢ်သးခုကစီၣ် အခ့အပှၤအတီအလိၤတဖၣ် ဒ်သိးကမၤလိမၤဒိးတၢ်အဂီၢ်န့ၣ်လီၤ. (ကွၢ် ၂ သ့း ၃:၄, ဧ့ၤဘြံၤ ၁၈:၇, ၃ ယိၤ ၁:၁)
ဖဲ ၂ သ့းစၤလနံ ၃:၆,၁၁ အပူၤန့ၣ်, စီၤပီလူး ပာ်ဖျါထီၣ် ဒ်သိးပသုတအိၣ်မူမၤပိာ်ထွဲ တၢ်အိၣ်မူအိၣ်ဂဲၤဟ့ၣ်ဒိတဖၣ် (ပှၤအကၢၣ်အကျူ, ပှၤလၢအမၤကီမၤခဲတၢ်, ဒီးပှၤမၤကျီၣ်ကျဲတၢ်ဒီးပှၤဂၤအတၢ်တဖၣ်), ဒီးအဆၢဖိ ၇-၁၀ န့ၣ် စီၤပီလူး စံးဘၣ်အပှၤဖးလံာ်ဖိတဖၣ်လၢ ကအိၣ်မူမၤပိာ်ထွဲ တၢ်အိၣ်မူဟ့ၣ်ဒိ ဘၣ်ဃးဒီးတၢ်သူၣ်တီသးရၤ ခိဖျိလၢအတၢ်အိၣ်မူ, ဒီးခိၣ်နၢ်အဂုၤအဂၤတဖၣ်အတၢ်အိၣ်မူအပူၤန့ၣ်လီၤ. ဒီးအဆၢဖိ ၁၃ အပူၤန့ၣ် စီၤပီလူး ဟ့ၣ်ဂံၢ်ဟ့ၣ်ဘါ ပှၤသ့းစၤလနံဖိတဖၣ်လၢ “မ့မ့ၢ်သုဝဲသ့ၣ်အံၤ, … မၤတၢ်ဂ့ၤန့ၣ် သုသုတလီၤဘှံးလီၤတီၤတဂ့ၤ” န့ၣ်လီၤ.
ဘၣ်ဆၣ်, ၁ ကရံၣ်သူး ၁၁:၁ အပူၤန့ၣ် စီၤပီလူး သ့ၣ်ညါ, ဒီးပာ်ဖျါထီၣ်ဝဲလၢ အတၢ်အိၣ်မူဟ့ၣ်ဒိန့ၣ် မ့ၢ်ဒုးနဲၣ်ဖျါထီၣ် တၢ်နာ်သန့ၤသးလၢ ကစၢ်ခရံာ်အလိၤန့ၣ်မး ကမ့ၢ်တၢ်အိၣ်မူလၢအကြၢးမၤဒိးအိၣ်မူထွဲဝဲဒၣ်န့ၣ်လီၤ. ပမ့ၢ်သူၣ်လီၤ ပတၢ်အိၣ်မူ ထဲဒၣ်လၢ တၢ်စူၢ်က့ၤနာ်က့ၤကစၢ်ခရံာ်, ဒီးလၢကစၢ်ခရံာ် အစိကမီၤအပူၤန့ၣ်ဒီး, ပကဒိၣ်ထီၣ်လၢ ယွၤအတၢ်ဘျုးတၢ်ဖှိၣ်, ဒီးလၢတၢ်ကူၣ်သ့အပူၤကသ့ဝဲဒၣ်န့ၣ်လီၤ.
