ပှၤနီၣ်ကၠိအသိလ့ၣ်တဂၤ ဖဲအနီၣ်သိလ့ၣ်အကတီၢ် တနီၣ်အသး, ဒီးသံတယူာ်ဝဲဒၣ်, ဒီးသိလ့ၣ်ဖးဒိၣ်တခိၣ်လၢ အအိၣ်ပှဲၤဒီးကၠိဖိအဂၤ ဃုဆံန့ၣ် တၢ်ပၢၤက့ၤအီၤတန့ၢ်လၢၤဘၣ်. တကီၢ်ခါန့ၣ် ပှၤဃိးတီၤကၠိဖိ ဒ့လိ(န) ရံး (Dillon Reeves) ဟးထီၣ်ဝဲလၢ အခးဆ့ၣ်နီၤ, ဒီးဃ့ၢ်သဖှိဝဲဆူ ပှၤနီၣ်သိလ့ၣ်အလီၢ်, ဒီးယီၢ်လီၤဝဲဒၣ် ဘရ့း (brake), တချုးသိလ့ၣ်ဘၣ်ဒိဘၣ်ထံးဝဲ အကတီၢ်ဖိန့ၣ်လီၤ. ပှၤမၤလိတၢ်ဖိအါဂၤ အတၢ်မၤအါဝဲလၢ တၢ်ကွဲးလံာ်ဆှၢလံာ် မ့တမ့ၢ် လိာ်ကွဲလၢ အကစၢ်ဒၣ်ဝဲ အကွဲၤဒီနၢ်အကတီၢ်, ဒ့လိ(န)- ပှၤလၢအကွဲၤဒီနၢ်တအိၣ်တဂၤ- မ့ၢ်လၢအထံၣ်စိဝဲတၢ်မၤအသး ဘၣ်ဆၢဘၣ်ကတီၢ်အဃိ, ဒီးမၤဆၢဝဲဒၣ်န့ၣ်လီၤ. ပှၤနီၣ်သိလ့ၣ် မၤဝဲဒၣ်န့ၣ် မ့ၢ်လၢ ဒ့လိ(န) ထံၣ်ဝဲဒၣ် အါဘျီလံအဃိ, ကဘၣ်ယီၢ်လီၤ ဘရံး ကယီၤကယီၤဖိန့ၣ် သ့ၣ်ညါဝဲဒၣ်န့ၣ်လီၤ. ဒ်သိးပှၤအိၣ်လၢ သိလ့ၣ်အပူၤခဲလၢာ်အသးသမူ ကပူၤဖျဲးဝဲအဂီၢ်, ဒ့လိ(န) အတၢ်အိၣ်ကတီၤ ပလီၢ်သူၣ်ပလီၢ်သး, ဒီးတမ့ၢ်လၢ တၢ်ဆိကမိၣ်မၤဒံဝ့ၤဒံဝီၤအသးန့ၣ် ကဲထီၣ်ဝဲဒၣ်တၢ်မၤစၢၤန့ၣ်လီၤ. ပၣ်ဃုာ်ဒီး ပှၤနီၣ်သိလ့ၣ် လၢအတၢ်အိၣ်ဆူၣ်အိၣ်ချ့ ဂ့ၤထီၣ်ကဒါက့ၤတဂၤန့ၣ်လီၤ.

ဖဲ စီၤမိၤရှ့ တအိၣ်လၢၤဘၣ်လၢ ပှၤနဲၣ်ဆှၢတၢ် ခိၣ်နၢ်အလီၢ်အလၢၤအကတီၢ်, ဒ်သိးကနဲၣ်ဆှၢ ပှၤအံၣ်စရ့လးဖိတဖၣ်အဂီၢ်, လၢတၢ်ပာ်ဆူၣ်သးအပူၤန့ၣ် စီၤယိၤရှူ ဟံးန့ၢ်ဝဲ ခိၣ်နၢ်အလီၢ်န့ၣ်လီၤ. ယိၤရှူ ၁:၂ န့ၣ်ယွၤ စံးဘၣ်အီၤလၢ “ယခ့ယပှၤ စီၤမိၤရှ့ သံလံဝဲလံ, ဒီးခဲကနံၣ်အံၤ ဂဲၤဆၢထၢၣ်လဲၤခီဂာ် ယၢ်ဒ့ၣ်အံၤ..” န့ၣ်လီၤ. အဆၢဖိ ၇ န့ၣ်, ယွၤဒုးနဲၣ်အါထီၣ်အီၤလၢ “ပာ်ဆူၣ်နသးဒီးတံးတဟီၣ်တက့ၢ်. ဒ်သိးနကပလီၢ်နသး ဒီးမၤတၢ်ဒ်ကယဲၢ် တၢ်သိၣ်တၢ်သီလၢ ယခ့ယပှၤ စီၤမိၤရှ့ မၤလိာ်နၤန့ၣ်တက့ၢ်. စုထွဲမ့ၢ်ဂ့ၤ စုစ့ၣ်မ့ၢ်ဂ့ၤ ဃၣ်ကပၤလၢအီၤတဂ့ၤ” န့ၣ်လီၤ. ယွၤစံးဘၣ် စီၤယိၤရှူ လၢမ်အသုတမၤဒံဝ့ၤဒံဝီၤအသး, ဒီးကဘၣ်ပညိၣ်ပာ်ဖှိၣ်အသး, ဒီးကဘၣ်ကွၢ်ထဲဒၣ် တၢ်သိၣ်တၢ်သီတထံၣ်ဃီလၢ ယွၤဟ့ၣ်လီၤအီၤ-
ဒ်အဆၢဖိ ၈ ပာ်ဖျါဝဲ, “မ့မ့ၢ်နဘၣ်ဆိကမိၣ်လၢအပူၤ လၢမုၢ်ဆါဒီးလၢမုၢ်နၤ” အသိးန့ၣ်လီၤ.

တၢ်ကွၢ်ကွဲၤဒီနၢ်, ကွဲၤထံၣ်ဟူတဖၣ်, ဒီးတၢ်စူးကါပိးလီအဂုၤအဂၤတဖၣ်န့ၣ်, မၤဒံဝ့ၤဒံဝီၤပသး, ဒ်သိးပသုတကွၢ်ထီၣ် ကစၢ်ယွၤ, ဒ်သိးပသုတသ့ၣ်ညါ တၢ်ကူၣ်သ့လၢ လံာ်စီဆှံအပူၤ (၂တံၤ ၃:၁၆-၁၇) ဘၣ်န့ၣ်လီၤ. အလီၢ်န့ၣ်, ပမ့ၢ်အိၣ်ဒီးတၢ်ပလီၢ်သူၣ်ပလီၢ်သး, ဒ် ဧ့ၤဘြံၤ ၁၂:၂ ပာ်ဖျါဝဲအသိး, “ခီဖျိပကွၢ်ဃီၤတၢ်ဆူ ယ့ၣ်ရှူးအအိၣ်” န့ၣ်ဒီး, ဖဲကစၢ်ယွၤ ကိးပှၤအကတီၢ်န့ၣ် ပစံးဆၢမၤဆၢသတူၢ်ကလာ်, သ့ဝဲဒၣ်န့ၣ်လီၤ.