တၢ်ပာ်ခူသူၣ်, ဒီးတၢ်တကနာ်ဃုာ် တၢ်အစုၣ်အပျၢ်အခီၣ်ထံးခီၣ်ဘိတဖၣ်အဃိ, အကတၢၢ်တၢ်အစၢအၢအၢသီသီတဖၣ် ကဲထီၣ်အသး သ့ဝဲဒၣ်န့ၣ်လီၤ. ဒ် ဝီ စထရံး ကၠၢနၢၣ် (The Wall Street Journal) အတၢ်ပာ်ဖျါတထံၣ် စံးဝဲလၢ, တဲၤလံၣ်ကိ (Telecom- ကွဲၤလ့လိၤ, ကွဲၤဒီနၢ်, ကွဲၤထံၣ်ဟူ ဒီးဂုၤဂၤတဖၣ်) အခီပနံၣ်တဖၣ် ပာ်လီၤတဲာ်တ့ၢ် စၢၢ်သူအပျံၤဖးထီလၢတၢ်ကးဘၢဃာ်တဖၣ် ကအါန့ၢ်ဒံး အဘိခံကထိ လၢကီၢ်အမဲရကၤ ဒီတကီၢ်အပူၤန့ၣ်လီၤ. စၢၢ်သူ အစုၣ်တဖၣ်န့ၣ် ရၤလီၤအသးလၢထံဖီလာ်, “လၢဟီၣ်ခိၣ်ညၣ်ထ့ၣ်အကျါ, ဒီးလၢ တၢၣ်တဖၣ်အလိၤ” န့ၣ်လီၤ. စၢၢ်သူန့ၣ် မ့ၢ်ဟးဂီၤ, အထံမ့ၢ်ပှံၢ်လီၤန့ၣ်ဒီး, စၢၢ်သူအစုၣ်တဖၣ် လဲၤကတၢၢ်ဝဲဆူ “ပှၤအိၣ်ဆိးတၢ်, ဖံးတၢ်မၤတၢ်, ဒီးလိာ်ကွဲတၢ်” အလီၢ်အကျဲတဖၣ်န့ၣ်လီၤ. တဲၤလံၣ်ကိ ခီပနံၣ်တဖၣ်အကျါ, တနီၤန့ၣ် သ့ၣ်ညါတ့ၢ်ဝဲဒၣ် စၢၢ်သူအစုၣ်တဖၣ် အတၢ်ဂ့ၢ်ကီ အါနံၣ်အါလါလံအဃိ, တၢ်ကွၢ်ဆၢၣ်မဲာ် စၢၢ်သူအစုၣ်တဖၣ် ယွၤနုာ်လီၤဆူ ခိၣ်ဃၢၤန့ဆၢၣ်အတၢ်ဂ့ၢ်ကီန့ၣ် ဘၣ်စံးကတိၤလိာ်သး နးနးကျံးကျံးန့ၣ်လီၤ.
တၢ်တအၢၣ်လီၤ, ဒီးတၢ်တပာ်ဖျါထီၣ် တၢ်ဒဲးဘးအစုၣ်အပျၢ်စ့ၢ်ကီး ဒုးအိၣ်ထီၣ် တၢ်အစၢအၢအၢသီသီတဖၣ် လၢပတၢ်အိၣ်မူအပူၤသ့ဝဲဒၣ်န့ၣ်လီၤ. ဖဲလၢပှၤတဂၤဂၤ မၤကမၣ်တၢ်န့ၣ်ဒီး, ဒ်သိးကစၢ်ယွၤဒီးပှၤဂုၤပှၤဂၤ အသုတသ့ၣ်ညါဝဲအဂီၢ်, ညီနုာ်အဝဲကျဲးစၢး မၤဘံၣ်မၤဘၢ, မ့တမ့ၢ် ပာ်ခူသူၣ်ဝဲဒၣ်န့ၣ်လီၤ. ဘၣ်ဆၣ်, ကတိၤ ၂၈:၉ ပာ်ဖျါဝဲဒၣ် တၢ်လၢအတဘၣ်ကစၢ်ယွၤအသး, ဒီးထီဒါယွၤအတၢ်မၤလိာ်တဖၣ်အပူၤ ပှၤမ့ၢ်အိၣ်မူမၤမုာ်အသးလၢတၢ်တဒိကနၣ် ဒီးပာ်ခူသူၣ်အတၢ်ဒဲးဘး, (မ့) ကတိၤပူၤဖျဲးအသး တဖၣ်န့ၣ် မ့ၢ်ဒၣ်ပှၤဟးဂီၤဖိအတၢ်မၤန့ၣ်လီၤ. အဆၢဖိ ၁၃ န့ၣ် ပှၤကွဲးလံာ်ကတိၤဒိ ပာ်ဖျါထီၣ်ဝဲ, “ပှၤလၢအကျၢၢ်ဘၢအတၢ်သရူးကမၣ်န့ၣ် တဘီၣ်ထီၣ်တညီထီၣ်ဘၣ် ဘၣ်. မ့မ့ၢ်ပှၤလၢ အတဲလီၤကျဲၤလီၤ ဒီးညိကွံာ်ဝဲန့ၣ် ကဒိးတၢ်သးကညီၤ” န့ၣ်လီၤ.
ပမ့ၢ်အၢၣ်လီၤ ပတၢ်ဒဲးဘးတဖၣ်ဆူယွၤအအိၣ်န့ၣ်ဒီး, ကစၢ်ယွၤအကလုၢ်ကထါ ပာ်ဖျါဝဲဒၣ် ခီဖျိလၢယွၤအဘျုးအဖှိၣ်ထူးထူးတီၤတီၤအပူၤန့ၣ်, ယွၤကမၤကဆှီက့ၤပှၤလၢပတၢ်ဒဲးဘး, ဒ် ၁ ယိၤ ၁:၉ စံးဘၣ်ပှၤအသိး, “ပမ့ၢ်တဲာ်လီၤကျဲၤလီၤပတၢ်ဒဲးဘးဒီး, အဝဲဒၣ် အကလုၢ်တီ, ဒီးတီဝဲလိၤဝဲ ဒ်သိးအကပျၢ်ကွံာ် ပတၢ်ဒဲးဘး, ဒီးသ့စီကွံာ်ပှၤလၢ ကယဲၢ်တၢ်အၢတၢ်သီခဲလၢာ်” န့ၣ်လီၤ. လၢတၢ်န့ၣ်အဃိ, တချုးလၢ တၢ်အစုၣ်အပျၢ်ယွၤနုာ်လီၤဆူပသးပူၤ, ဒီးနုာ်လီၤဆူ ပှၤဂုၤဂၤအတၢ်အိၣ်မူန့ၣ် မ်ပကဃ့ယွၤလၢကမၤစၢၤပှၤ ဒ်သိးပကအၢၣ်လီၤပတၢ်ဒဲးဘး လၢတၢ်သးတီအပူၤန့ၣ်တက့ၢ်.