ဖဲတၢ်ပိးတၢ်လီ ဒီးဆၣ်ဖိကီၢ်ဖိ အိၣ်ဒီးတၢ်စံးကတိၤဟူးဂဲၤ တၢ်ဂီၤမူ Toy Story အပူၤ, ဖိသၣ်ဆံးတဂၤ အတၢ်လိာ်ကွဲ တၢ်ဂီၤဖိတဖၣ် အသးသမူနုာ်လီၤဆူအပူၤ ဖဲဖိသၣ် ဟးထီၣ်လၢဒၢးပူၤမ့ၢ်ဂ့ၤ မ့တမ့ၢ် ဖိသၣ်ဖိ မံဘၣ်အသးမ့ၢ်ဂ့ၤ အခါန့ၣ်လီၤ. တၢ်လိာ်ကွဲဖိတခါ, မူပျီ အသုးဖိ လၢအမံၤမ့ၢ် Buzz Lightyear တဂၤ, ကိးသတြီထီၣ် “ဆူအယံၤကတၢၢ်ဒီး ဆူညါ”… ဖဲအဒုးနဲၣ်အတၢ်သ့တၢ်ဘၣ် လၢအသ့ယူၤလၢဒၢးပူၤအခါ န့ၣ်လီၤ. တၢ်န့ၣ်မ့ၢ်တၢ်ကတိၤလၢအမၤကဒံကဒါ ပှၤအါဂၤအသးလီၤ. တၢ်အယံၤကတၢၢ်န့ၣ် တမ့ၢ်တၢ်ယံၤလၢ နလဲၤသ့အကတၢၢ်ဘၣ်ဧါ. တၢ်တမံၤမံၤလၢ အအိၣ်ဒံးလၢ တၢ်အယံၤ ကတၢၢ်အဘးခီဆူညါ မ့ၢ်အိၣ်ဒံးဧါ.

မ့ၢ်ဘၣ်ထုးန့ၢ် အခီပညီလၢ လၢပျၢၤ ဟ့းလ့ၣ်တၢ်သ့ဆိကမိၣ်တၢ်ယိာ်ယိာ် အပှၤကူၣ်ဘၣ်ကူၣ်သ့တဖၣ်အအိၣ်, တၢ်ဂံၢ်တၢ်ဒွးအပှၤကူၣ်ဘၣ်ကူၣ်သ့, Ian Stewart ဟ့ၣ်ထီၣ် အတၢ်ဆိကမိၣ်လၢ, တၢ်လၢအအိၣ်လၢ တၢ်အယံၤကတၢၢ်အဘးခီဆူညါန့ၣ် မ့ၢ်တၢ်အယံၤကတၢၢ်လၢ အဒိၣ်အါထီၣ်တဖၣ်လီၤ. ဒိၣ်အါထီၣ်ဆူညါဆူညါ ကွ့ၢ်ကွ့ၢ်လီၤ.

ယ့ၣ်ရှူးန့ၣ်ဖျါလၢ အဒိးလဲဟံးန့ၢ်သူ တၢ်ထဲးဂံၢ်ထဲးဘါလၢ အအါထီၣ် ဒီးချ့ထီၣ် ဒ်သိးအံၤ လၢတၢ်ပျၢ်တၢ်ကမၣ် အဘၢၣ်ကဝီၤအပူၤလီၤ. ဖဲစီၤပ့းတရူးသံကွၢ် ယ့ၣ်ရှူး ဘၣ်ဃး တၢ်ပျၢ်ပှၤဂၤ အတၢ်ကမၣ်အဂ့ၢ်အခါ “ယကဘၣ်ပျၢ် အတၢ်န့ၣ် ပှံၤစုလဲၣ်… တုၤအပှဲၤထီၣ်နွံစုဧါ”, ယ့ၣ်ရှူးစံးဆၢ “ယတစံးဘၣ်တုၤအပှဲၤထီၣ်နွံစုဘၣ်, မ့ၢ်တုၤအပှဲၤထီၣ် နွံစုအဘျီနွံဆံလီၤ” (မး ၁၈:၂၁-၂၂). ယ့ၣ်ရှူး စံးအါထီၣ်ကဒီးဆူညါ ဘၣ်ဃး စီၤပၤလၢအသ့သးကညီၤတၢ်, ဒီးကုၢ်လၢအတအိၣ်ဒီး တၢ်သးကညီၤ အတၢ်ကတိၤဒိပူ, ဒီးပာ်ဖျါတၢ်ဂ့ၢ်မိၢ်ပှၢ်လၢအကါဒိၣ် လၢဖဲပှၤတဂၤဂၤ ပီၢ်ယၢ်လီၤအတၢ်မၤကမၣ် နီၢ်ကီၢ်န့ၣ်, တၢ်ကဘၣ်ပျၢ်အီၤ, တၢ်ကမၣ်လၢအနီၢ်ဂံၢ် ဘၣ်တၢ်ကီၤပာ် တအိၣ်ဘၣ်. ပကဘၣ်ပျၢ် ပှၤဂၤဒ်ကစၢ်ယွၤပျၢ်ပှၤအသိး – အါန့ၢ်အါန့ၢ်, ဆူညါဒီးဆူညါန့ၣ်လီၤ.

တၢ်န့ၣ်ဖျါလၢ ကဲထီၣ်ဝဲလၢ ပဂီၢ်တသ့ဘၣ်. လၢတၢ်န့ၣ်အဃိ ပလိၣ်ဘၣ်လၢ ပကဃ့ကစၢ်ယွၤအတၢ်မၤစၢၤ ထီဘိန့ၣ်လီၤ.

ထဲဒၣ်လၢယွၤအဂံၢ်အဘါအပူၤ ပမၤတၢ်အံၤ ကသ့ဝဲလီၤ. ပှၤလၢအဘၣ်တၢ်ပျၢ်အီၤန့ၣ် ပျၢ်ပှၤဂၤအတၢ်, ဆူအယံၤကတၢၢ် ဒီးဆူညါဆူညါလီၤ.