ဖဲလါနိၣ်ဝ့ဘၢၣ် တၢ်ခုၣ်ဒိၣ်မးမုၢ်နံၤတနံၤန့ၣ်, လၢပှၤဟံၣ်တအိၣ်ဃီတအိၣ်တဖၣ်အဂီၢ်, ပတၢ်အိၣ်ဖှိၣ် ကတဲာ်ကတီၤ ချၢဝံထၢၣ်အဖျၢၣ်ခံကယၤန့ၣ်လီၤ. ဒ်သိးပှၤကမၤပှဲၤ ချၢဝံထၢၣ်တဖၣ်အဂီၢ်, ယရဲၣ်ကျဲၤမၤစၢၤ, ဒီးတၢ်ဘိၣ်လၢပှၤမၤဘူၣ်ဃာ်တဖၣ်အကျါ ယဃုထၢပာ်ဖှိၣ် ပိးလီလၢအဒ်သိးလိာ်သးတဖၣ်န့ၣ်လီၤ. ယဃ့ထုကဖၣ်ယဲလၢ ယကထံၣ်စုဖျီၣ်အသီ, ခိၣ်သလုး, ခီၣ်ဖျီၣ်, ယၣ်လုးတဖၣ်န့ၣ်လီၤ. မိၣ်ဟဲသၣ်အကိ, ဒီးကိၣ်စဲ ဒဝ့း(ခၠ) (sandwiches) တဖၣ်စ့ၢ်ကီး ပၣ်ဃုာ်လၢ တၢ်ဟ့ၣ်တဖၣ်အကျါန့ၣ်လီၤ. ဝံၤန့ၣ်ဒီး, လၢတၢ်ကမၢကမၣ်အပူၤန့ၣ်, ယပာ်သူၣ်ပာ်သး တၢ်ဘိၣ်တဘိၣ် လၢအမ့ၢ် ပှၤကသ့ထူးစီပနီၢ်ကစၢ်အဂီၢ် တၢ်ကံးညာ်က့အဆံးဖိတဖၣ်န့ၣ်လီၤ. ယပညိၣ်ပာ်ဖှိၣ် မၤစၢၤပှၤကညီတဖၣ် ဒ်သိးကအိၣ်ဘၣ်လၢၤလၢၤ, ဒီးကအီၣ်ဘၣ်အီဘၣ်အဂီၢ်န့ၣ်လီၤ. ဘၣ်ဆၣ်, ပှၤအိၣ်ဝဲဒၣ်တဂၤ, လၢအသ့ၣ်နီၣ်မၤစၢၤဝဲဒၣ် ပှၤလၢကဒိးန့ၢ်ဘၣ်တၢ်တဖၣ်ဒ်သိးကမၤကဆှဲကဆှီအသးအဂီၢ်န့ၣ်လီၤ.
လံာ်စီဆှံ စံးကတိၤပာ်ဖျါဝဲ – သးဖျၢၣ်ဒီးနီၢ်သးအတၢ်ကဆှီ လၢအမ့ၢ်”တၢ်မၤကဆှီတၢ်” အဂၤတကလုာ်န့ၣ်လီၤ. ကစၢ်ယ့ၣ်ရှူး ဒုးနဲၣ်ဖျါထီၣ်တၢ်ဂ့ၢ်အံၤ, ဖဲအစံး ကတိၤပာ်ဒ့ၣ်ပာ်ကမၣ် ပှၤသ့လံာ်တၢ်သိၣ်တၢ်သီတဖၣ်, ဒီးပှၤဖၤရံၤရှဲတဖၣ်န့ၣ်လီၤ. အဝဲသ့ၣ်အိၣ်မူမၤလၢပှဲၤ တၢ်သိၣ်တၢ်သီအဆံးကတၢၢ်ဘၣ်ဆၣ်, ကစၢ်ယ့ၣ်ရှူး စံးဝဲဒၣ်လၢ, “မ့မ့ၢ်တၢ်သိၣ်တၢ်သီလၢ အဃၢဒိၣ်တက့ၢ်တဖၣ်န့ၣ်,တၢ်စံၣ်ညီၣ်, ဒီးတၢ်သးကညီၤဒီးတၢ်နာ်တဖၣ်န့ၣ် သုပာ်လီၤတဲာ်ကွံာ်အီၤ” န့ၣ်လီၤ(မး၂၃:၂၃). အဆၢဖိ ၂၅-၂၆ န့ၣ် ကစၢ်ခရံာ် စံးဘၣ်အဝဲသ့ၣ်လၢ “သုသ့စီလီခီအချၢဒီးသီတ့ၤအချၢလီၤ. မ့မ့ၢ်အပူၤန့ၣ်, ပှဲၤဝဲဒီးတၢ်အီၣ်ကဘျံးအီၣ်ကဘျၣ်, ဒီးတၢ်တတီတလိၤဘၣ်လီၤ. သ့စီဆိလီခီဒီးသီတ့ၤအပူၤ, ဒ်သိးအချၢကစီစ့ၢ်ကီးတက့ၢ်” န့ၣ်လီၤ.
ပမ့ၢ်တဃုထံၣ်န့ၢ် တၢ်မၤကဆှီ, မၤစီတၢ်လၢ ကစၢ်ခရံာ်အပူၤ, ဒီးပမ့ၢ်ပာ်မၤပသးဒ်ပနီၢ်သးကဆှဲကဆှီအသိးန့ၣ်ဒီး, ကမ့ၢ်ဒၣ် ပပာ်ဖျါမၤဂ့ၤပသးလၢတၢ်ချၢလၢနီၢ်ခိန့ၣ်လီၤ. ထါတၢ်သးဝံၣ် စံးထီၣ်ပတြၢၤယွၤ အလီၢ်လံၤတယုၢ်စံးဝဲ “မ့ၢ်မနုၤသ့စီယၤသ့ (လၢယတၢ်ဒဲးဘး), ထဲကစၢ်ယ့ၣ်ရှူးအသွံၣ်” န့ၣ်လီၤ. ပှၤကသ့ထူးစီပနီၢ်ကစၢ်အဂီၢ် တၢ်ကံးညာ်က့အဆံးအသီဖိန့ၣ် ကမ့ၢ်ဝဲ တၢ်ဟ့ၣ်တမံၤ ဒ်သိးပကသ့စီပသးလၢ တၢ်ချၢအဂီၢ်န့ၣ်လီၤ. ကစၢ်ယ့ၣ်ရှူးတခီ ကသ့စီဝဲဒၣ် ပနီၢ်သး, တၢ်လၢအအိပူၤ, ကသ့စီကွံာ် ပတၢ်ဒဲးဘးအနးကတၢၢ်တဖၣ်ဒၣ်လဲာ်န့ၣ်လီၤ.
